De Vorsterman Bijbel

§ Dauids .xcvi. Psalm ⁺ § Dominus regnauit exultet terra.

+ int heb. den xcvij. psal.

1

⁺DIie HEERE heeft geregneert, dies verblijde hem dat aertrijcke, ende vele eylanden moeten vrolijck zijn.

+ A

2

Wolcken met schemeringhe, is rontsomme hem, rechtuaerdicheyt ende oordeel is zijns stoels ^* bereydinghe.)

* thebr. wooninghe

3

Het vier sal voor hem gaen, ende aensteken ronts omme sine vianden.

4

Sine blixemen lichten op dat aertrijcke, Dat aertrijcke sach dat aen, ende beefde.

5

Die berghen versmilteden ghelijc als was vanden aenschijn des HEEREN, Vanden aenschijne des HEEREN des gheheelen aertrijcks.

[p. A6v]

6

Die hemelen vercondichden zijn rechtueerdicheyt, Ende alle volcken saghen zijn eere.

7

Beschaemt moeten si worden alle die beelden aenbidden, ende die hen beroemen van haer afgoden, Aenbedet hem alle zijn ^* enghelen)

* the. goden

8

Sion heuet ghehoort ende is blide, Ende die dochteren van Iuda zijn vrolijck, HERE, om uwer oordeelen wille.

9

⁺Want ghi HEERE, zijt die alder hoochste in allen landen, ghi zijt zeer verhooget bouen alle Goden.

+ B

10

Ghi die den HEERE beminnet, hatet dat arghe, Die HEERE bewaert die zielen zijnder heyligen, vander hant der ongodliker, sal hise verlossen.

11

Den rechtuaerdigen, is een licht opgegaen ende blijschap den oprechtighen van herte.

12

Ghi rechtuaerdige verblijdet v, inden HERE, ende belijdet die gedachtenisse zijnder ^* heylichmakinghe.)

* the. heylicheyt