De Vorsterman Bijbel

§ Dauids .lxxi. Psalm, van Salomon. ⁺ § Deus iudicium.

+ int heb. den lxxij. psal.

2

⁺GOd gheeft v oordeel, den coninck, ende uwe rechtuaerdicheyt des conincx sone. Hi sal v volck oordeelen in rechtuaerdicheyt, ende uwe armen inden oordeele.

+ A

3

Laet die berghen den vrede ontfangen, den volcke, ende die houelen die rechtuaerdicheyt

4

Hi sal oordeelen die arme des volcs, ende sal der armer kinderen salich maken, ende vernederen den beclapper.

5

^* Ende sal dueren met die zonne, ende voor die [kolom] mane van gheboorte tot gheboorte.)

* the. Men sal v vreesen, so langhe als de zon ende die mane dueret, van kinde tot kints kinderen.

6

⁺Hi sal neder dalen ghelijck den regen op dat vlies, gelijck die druppels die dat lant vochtighen.

+ B

7

In zijn daghen sal die rechtuaerdicheyt opgaen, ende oueruloedicheyt des vredes, tot dat die mane ^* wech genomen wort.)

* th. niet en si.

8

Ende hi sal heerschappen vander eender zee tot aen dander, ende vanden water aen, totter werelts eynde toe.

9

Voor hem sullen nederuallen die Moorianen, ende sine vianden sullen stof lecken.

10

Die coninghen van Tharsen, ende vanden eylanden sullen ghiften offeren, Die coninghen van dat rijck van Arabien ende Saba sullen gauen brenghen.

11

Ende alle coninghen sullen hem aenbeden, Alle manieren van volcke sullen hem dienen.

12

⁺Want hi sal den armen verlossen vanden ^* machtighen,) ende den ellendighen die gheenen hulper en heeft.

+ C

* th. geroep.

13

Hi sal sparen den ellendighen ende den armen, ende die zielen der armer sal hi ghesont maken

14

Hi sal haer zielen wt den woecker, ende onrechtuaerdicheyt verlossen, ende haeren name is eerlijck voor hem.

15

Hi sal leuen, ende men sal hem gheuen vanden goude wten rijck van Arabien, ende voor dien sullen si altoos bidden den gheheelen dach, daer salmen hem louen.

16

Het sal op aerden ^* een vasticheyt) zijn bouen op die berghen, Sijn vrucht sal verheuen worden bouen Libanum, ende sal groeyen in die steden ghelijck tgarsch opter aerden.

* th. een ghedenckelijcke tarwe

17

Sinen naeme moet eewelijck ghebenedijt zijn, voor die zonne blijft sinen name. ⁺ Alle die gheslachten des aertrijcs sullen in hem ghebenedijt worden, alle manieren van volcke sullen hem grootelijck louen.

+ D

18

Ghebenedijt si die HEERE, die God van Israel, die alleen wonderlijke dinghen doet.

19

Ende ghebenedijt si den name zijnder moghentheyt inder eewicheyt, ende alle landen sullen zijnder veruult worden met zijnder moghentheyt, ^* Dat gheschiede also, Dat gheschiede also.)

* th. Amen, Amen.

20

§ Die ghebeden Dauids des soons Isai eynden.