De Vorsterman Bijbel

§ Dauids .lxx. Psalm. ⁺ § In te domine speraui.

+ int heb. den lxxi. psal.

1

⁺HEERE ick heb ghehoept op v, en laet mi nymmermeer beschaemt worden.

+ A

2

Verlost mi door uwe rechtuaerdicheyt, ende helpet mi wt, Neycht uwe ooren tot mi, ende maect mi salich.

3

Weest mi tot een God die beschermer, ende in een vaste plaetse, dat ghi mi ghesont maect Want ghi zijt mijn vasticheyt ende mijn toeulucht.

4

Mijn God verlost mi wt der hant des sondaers, ende wt der hant des onrechtuaerdighen, ende die teghen die wet doet

5

⁺Want ghi zijt mijn ^* lijtsaemheyt) HEERE, HERE mijn hope van mijnder ioncheyt aen

+ B

* the. toeuersicht.

6

^* Ick ben in v gheuesticht wten buyck) van mijns moeders lichaem sidy mijn beschermer. In v is altoos minen sanck,

* th. ghi hebt mi wt den buyc mijns moeders getrocken.

7

ick ben velen gheworden als een vremt wondere, ende ghi zijt een sterck helper.

8

Laet minen mont veruult worden met lof, op dat ick singhe uwe eere, ende den heelen dach uwe grootheyt.

9

En verworpt mi niet inder tijt mijns ouderdoms, En verlaet mi niet als mijn crachte af neemt.

[p. Ii8v]

10

Want mijn vianden spraken tot mi, ende die op mine ziele wachten, berieden hen met malcanderen.

11

⁺Ende seggen God heeft hem verlaten, veruolget ende grijpt hem, want daer en is gheen verlosser.

+ C

12

God en zijt niet verre van mi, Mijne God siet om, haest mi te helpen.

13

Si moeten hen schamen, ende ontbreken, die mijnder zielen teghen zijn, met achterclappe, met versmaetheyt ende schimpe moeten si ouerdect worden, die mijn ongheluck soecken.

14

Maer ick sal altoos hopen, ende sal altoos tot uwen loue meer toe doen.

15

Minen mont sal vercondighen uwe rechtueerdicheyt, daghelicx v salicheyt. Want ick niet ghekent en hebbe die rekeninghe.

16

So sal ick gaen in die warachticheden Gods, HEERE ick sal alleene uwe rechtueerdicheyt ghedencken.

17

God, ghi hebt mi van mijnder iuecht op gheleert, ende ick sal tot noch toe vercondighen uwe wonderen.

18

Oock en verlaet mi niet God, int ouderdom, als ick grijsch worde. Tot dat ick uwen arm vercondighe alle den gheslachten die noch comen sullen. ⁺ Vwe machticheyt

+ D

19

ende uwe rechtueerdicheyt God, ende grote wercken die ghi ghedaen hebt tot int hoochste, God wie is ws ghelijck?

20

Hoe veel drucs ende zeer quaet hebdy mi verthoont? ende omghekeert hebdy mi leuende ghemaect, ende wt den afgronden der aerden hebdy mi wederom gheleyt.

21

Ghi hebt v groote mildicheyt vermenichfuldicht, ende v omkeerende hebdi mi vertroost

22

Want ick sal v oock ^* belijden) inden psalter God uwe waerheyt, Ick sal v lof singhen opter herpen, ghi heylighe Israel.

* th. dancken.

23

Mijn lippen sullen verblijden, als ic v lof sal singen, ende mijn ziele die ghi verlost hebt

24

Oock sal mijn tonghe in ghedachten oeffenen uwe rechtueerdicheyt, als si beschaemt sullen wesen, ende hen wederom schamen, die mi quaet soecken.