De Vorsterman Bijbel

§ Dauids .lv. Psalm, Een gulden cleynoot vander stommer duyuen onder die vremde, doen hem die Philistijnen grepen tot Geth. ⁺ § Miserere mei deus, quoniam.

+ int heb. den lvi. psalm.

2

⁺GOd ontfermt v mijnder, want die mensche heeft mi vertreden, al den gheheelen dach beuechtende heeft hi mi ghequelt.

+ A

3

Mine vianden vertreden mi alle den gheheelen dach door, Want vele isser strijdende tegen mi stoutelijck.

4

^* Vander hoocheyt des daghes sal ick vreesen, maer ick sal in v hopen.)

* the. wanneer ick vreese, so hope ick op v.

5

In Gode sal ick mine redene prijsen, ick hebbe in Gode ghehopet. Ick en sal niet vreesen, wat mi dat vleesch soude doen.

[p. Ii5v]

6

Den gheheelen dach verachten si met vloecken, mijn woorden, alle haer ghedachten zijn teghen mi int quaet.

7

^* Si sullen inwoonen ende verberghen) si sullen selue op mijn versenen wachten, Ghelijck si mijn zeele ghewacht hebben ^*

* h. Si houden tsamen ende ligghen verborghen

* th. men helpse wt om des misdaets wille

8

Ghi sultse om niet ghesont maken) inden toorne suldy tvolck ontstucken breken.

9

^* God mijn leuen heb ick v ghebootschapt, ghi sette mijn tranen in uwe aenschijn. Ende ghelijck in uwer gheloften,)

* th. telt minen wtloop vaet mijn tranen in uwe flesse, ende teltse.

10

dan sullen mijn vianden achterwaert ghekeert worden. In wat dach dat ick v aenroepe, Siet ick bekenne dan dat ghi mijn God zijt.

11

⁺In Gode sal ick prijsen dat woort, Inden HEERE sal ick die redenen louen, ick heb in God ghehoept, ende en sal niet vreesen wat mi die mensche doet.

+ B

12

In mi o God zijn v gheloften, die ick v tot dancklof wederom sal gheuen.

13

Want ghi hebt mijn ziele vander doot verlost, mijn voeten vanden valle, op dat ick behaechlijck worden soude voor God int licht der leuender.