De Vorsterman Bijbel

§ Dauids .L. psalm, ⁺ doen die Propheet Nathan tot hem quam als hi tot Bersabee inghegaen was. ⁺ § Miserere mei.

+ int heb. den li. Psalm.

+ ij.Reg. xij.

3

⁺GOd zijt mi ghenadich na uwer grooter barmherticheyt, Ende na die menichfuldicheyt uwer ontfermherticheden, wisschet wt mijn ^* ongherechticheyt.)

+ A

* th. ouertredinghen.

4

Wasschet mi noch meer van mijnder misdaet, ende reynicht mi van mijnder sonde.

5

Want ick bekenne mijn ^* quaetheyt) ende mine sonde is altoos teghen mi.

* th. ouertredinghen

6

Ick heb v alleen ghesondicht, ende quaet voor v ghedaen, om dat ghi rechtuaerdich ghemaect sout worden in uwen woorden, ende verwinnen als ghi gheoordeelt wort.

7

Want siet, ick ben in onduechden ontfanghen ende mijn moeder heeft mi in sonden ontfaen.

8

Want siet, ghi hebt liefghehadt die waerheyt, Ghi hebt mi gheopenbaert die onseker ende verborghentheden van uwer wijsheyt.

9

Ghi sult mi bespreyden met Ysope, ende ick sal suyuer worden, ⁺ Ghi sult mi wasschen, ende ick sal bouen die snee ghewit worden.

+ B

10

Ghi sult minen ghehoor gheuen vruechde ende ghenuechte, ende die verootmoedichde beenderen sullen hen verblijden.

11

Keert af v aenschijn van minen sonden, ende doet alle mijn misdaden wt.

12

Schept in mi God een reyn herte, ende vernyeut in minen inghewande eenen oprechten gheest.

13

En verworpt mi niet van uwen aensichte, ende en neemt uwen heylighen gheest niet van mi wech.

14

Gheeft mi wederom die vruechde van uwer salicheyt, ende maect mi sterck met den alder ouersten gheest.

15

Ick sal den quaden menschen uwe weghen leeren, ⁺ ende die sondaers sullen tot v bekeert worden.

+ C

16

Verlost mi vanden bloedighen sonden, God ghi die mijns salicheyts God zijt, ende mijn tonghe sal verblijdende louen uwe gherech-[kolom]ticheyt.

17

HERE ghi sult mijn lippen open doen, ende minen mont sal uwe lof vercondighen.

18

Want haddy ghewilt, ick hadde certeyn een offerande ghegheuen, ghi en sult v niet verblijden inden offer die gheheel verbrant wort

19

⁺Die offerande tot God, is eenen bedructen gheest, een vermorwet ende vernedert herte en suldy God niet verachten.

+ D

20

HEERE doet Sion goedertierlijck in uwen goeden wille, op dat die mueren tot Ierusalem ghetimmert worden.

21

Dan sult ghi in danck nemen die offerande der rechtuaerdicheyt, heel offeren ende offer die heel verbrant worden, dan sullen si kalueren op uwen outaer setten.