De Vorsterman Bijbel

§ Dauids .xlix. Psalm tot Assaph. ⁺ § Dominus Deus.

+ int heb. den l. Psalm.

1

⁺GOd die HERE der Goden heeft ghesproken, ende heuet dat aertrijck bi een gheroepen vanden opghanck der Sonnen totten neder ghanck toe.

+ A

2

Wt Syon schijnt die ^* ghedaente zijnder schoonheyt)

* h. zijn volcomen scoonte.

3

God sal openbaer comen. Onse God sal comen ende niet swijghen, Het vyer sal in zijn ooghen beghinnen te bernen ende rontsom hem een groot onweder.

4

Hi heeft den hemel van bouen geroepen, ende die aerde om zijn volck te ^* onderscheyden.)

* th. oordeelen.

5

Vergadert hem sine heylighen, die ^* zijn testament oordineren) bouen offerhande.

* the. mijn verbont achten.

6

Ende die hemelen sullen zijn rechtuaerdicheyt vercondighen, Want God is een rechter.

7

Hoort mijn volck, ende ick sal spreken, Israel ende ick sal v ghetuyghen, want ick God, ben uwe God.

8

⁺Van ws offers weghen en sal ick v niet straffen, Vwe brantoffers zijn toch altoos voor minen ooghen.

+ B

9

Ick en sal van uwen huyse gheen ^* kalueren) nemen, noch bocken van uwen ^* cudden.)

* th. verren

* th. schaepstallen.

10

Want alle ghedyerten des wouts zijn mijn, ende vee op die berghen, ende die ossen.

11

Ick kenne alle gheuoghelte der hemelen, ende ^* die schoonheyt) des ackers is met mi.

* h. alle dyer

12

Ist dat mi honghert, ick en salt v niet segghen, Want den omganck der aerden is mijn, ende alle zijn volheyt.

13

Meynt ghi dat ick vleesch eten wil vanden ossen, oft bloet drincken vanden bocken?

14

Offert Gode een offerande des loues, ende betaelt den alderhoochsten uwe gheloften.

15

Ende aenroept mi inder tijt der noot, ende ick sal v verlossen, so sult ghi mi eeren.

16

⁺Maer totten ongodlijken heeft God gesproken Waerom verteldy mijn rechtuaerdicheden, ende nemet mijn ^* testament) in uwen monde?

+ C

* th. verbont.

17

Daer ghi nochtans onderwijsinghe haet, ende worpt mijn woorden achter v.

18

Als ghi eenen dief saghet, so liept ghi met hem ende v deel steldet ghi metten ouerspeelders.

19

Vwen mont oueruloeyde van boosheyt, ende v tonghe brocht bedriechlicheden tsamen.

[p. Ii4v]

20

Ghi saedt, ende spraect teghen uwen broeder ende teghen den sone uwer moeder steldet ghi lachteringhe in erghernissen.

21

Dat hebt ghi ghedaen, ende ick sweech, doen meyndet ghi booslijcken dat ick zijn soude, ghelijck als ghi, Maer ick sal v straffen, ende voor uwe ooghen stellen.

22

Merct doch dit, ghi die Gods verghetet, dat hi in eenighen tijt niet eens wech en neme, ende daer en si gheen verlosser.

23

Den offer des loues sal mi eeren, ende daer is den wech, waer henen ick hem thoonen sal, die salicheyt Gods.