De Vorsterman Bijbel

Dauids .xxxix. Psalm, om hooch te singen. ⁺ § Expectans ex.

+ int heb. den xl. Psalm.

2

⁺AL beydende heb ick den HEERE verwacht, ende hi heeft op mi ghemerct,

+ A

3

Ende hi heeft mijn ghebet verhoort, ende leyde [kolom] mi wt den kuyle der armoeden, ende wt den slijme des ^* vuylheyts.) Ende hi heeft mijn voeten geset op eenen steen ende gheschict mijn ghanghen.

* oft ghifts.

4

Ende heeft mi een nieu liet in minen mont gesonden, eenen nieuwen sanc, onsen Gode veel menschen sullent sien, ende vreesen, ende in den HEERE hopen.

5

Salich is die man, wiens hope is den naem Gods, ende en heeft niet aenghesien ^* in ydelheyden, ende valsche raserijen.)

* the. den houeerdigen ende die met logenen om gaen

6

HEERE mijn God, ghi hebt veel wonderlicheden ghedaen, ende uwe ghedachten op ons, en is niemant die v ghelijck is. ⁺ Ick hebt vercondicht ende ghesproken, si zijn vermenichfuldicht bouen ghetale.

+ B

7

Ghi en hebt niet ghewilt offerhande, noch spijsoffer, maer die ooren hebt ghi mi ^* volmaect) Ghi en eyschte noch brantoffer noch voor die sonde.

* the. gheopent

8

Doen sprac ic, Siet ic come, int beghin van den boeck is van mi gheschreuen.

9

Om uwen wille te doen, mijn God, ic hebt gewilt, ende uwe wet is int midden mijnder herten.

10

Ick heb die rechtuaerdicheyt gebootscapt, inder grooter ghemeynten, Siet, ick en sal mine lippen niet verbieden, HEERE ghi wetet.

11

⁺Ick en heb uwe rechtueerdicheyt niet verborghen in mijn herte, want uwe waerheyt ende salicheyt heb ic gesproken, Ic en heb niet verborghen uwe barmherticheyt ende waerheyt ^* van veel raets.)

+ C

* theb. in die groote vergaderinge

12

Maer ghi HEREE, en wilt uwe ontfermherticheyden niet verre van mi doen, uwe bermherticheyt ende uwe waerachticheyt hebben mi altoos ontfanghen.

13

Want mi hebben vele quade dinghen omuaen, dier gheen getal en is, Mijn misdaden hebben mi begrepen, dat ick niet ghesien en conste, Si zijn vermenichfuldicht meer dan dat har mijns hoofts, ende mijn herte heeft mi verlaten.

14

HEERE, latet v behaghen, dat ghi mi verlost, ^* siet) om mi te helpen.

* theb. haest

15

Beschaemt moeten si worden, ende weder hen te samen schamen, die mijn ziele soecken, dat si, die wech souden nemen. Laetse achterwaerts gekeert worden, ende hen schamen die mi quade dingen ghonnen.

16

Ter stont moeten si huer schaemte dragen, die tot mi segghen, vry so, vry so.

17

Alle die v soecken, moeten hen verbliden ende vrolijck zijn, ende moeten altijt segghen,

[p. Ii2v]

die uwe salicheyt beminnen, Die HEERE si hoochlijck ghelouet.

18

Want ick ben ^* een bedelaer) ende arm, die HERE besorcht my, Ghi zijt mijn hulper, ende bescermer, mijn God en vertoeuet niet.

* h. elendich