De Vorsterman Bijbel

§ Dauids .xxxij. Psalm. ⁺ § Exultate iusti in domino.

+ int heb. den xxxiij. psal.

1

⁺UErhuecht inden HERE ghi rechtueerdige, den oprechten betaemt die louinge.

+ A

2

Belijdet den HERE metter harpen, ende lof singet hem opten psalter van thien snaren.

3

Singet hem een nieuwe liedt, singt wel lofsange tot hem in roepinge.

4

Want des HEREN woort is recht, ende alle zijn wercken ghetrouwe.

5

Hi bemint bermherticheit, ende oordeel Daerde is vol van bermherticheit des HEREN

6

Die hemelen zijn doort woort des HEREN vast gemaect, ende alle haer crachte door den [kolom] geest zijns monts.

7

Hi vergadert dat water in die zee ghelijc in een flesse, ⁺ ende legt die diepten inde scatcameren

+ psal. c.xlviij

8

Alle die werelt vreese den HERE, ende van hem berueren hen alle die op dat aertrijck woonen

9

⁺Want hi heeft gesproken ende tis gesciet, hi heeft geboden ende si zijn ghescapen.

+ B

10

Die HERE doet te niet den raet der heydenen, ende veracht die gedachten der volcken ^* ende verworpt die raden der princen).

* Ten is nyet int he.

11

Maer den raet des HEREN blijft eewelijc Sijns herten ghedachten van geslachte tot gheslachten.

12

⁺Salich is dat volc den welcken die HERE haer God is, Dat volck dat hi tot erffenisse vercoren heeft.

+ C

13

Die HERE heeft neder gesien vanden hemel ende heeft ghesien alle kinderen der menschen

14

Van zijnder bereyder wooninge heeft hi neder gesien die opter aerden woonen.

15

Hi heeft geset haerder alder herten elc bisonder, hi verstaet alle haer wercken.

16

Een coninc en wort niet behouden door zijn grote macht, Een ruese en sal niet behouden worden in menichfuldicheit zijnder crachten.

17

Een peert is bedriechlic totter behoudenisse ten sal niet behouden worden in oueruloedicheyt zijnder crachten.

18

⁺Siet des HEREN ooghe siet op die ghene die hem vreesen, ende op hen die hopen op zijnder bermherticheit.

+ D

19

Op dat hi haer sielen verlosse vander doot ende voetse inden tijt des hongers.

20

Onse siele verbeydet den HERE, want hi is onse hulper ende bescudder.

21

Want onse herte sal verbliden in hem, ende wi sullen hopen in sinen heyligen name.

22

V bermherticheit HERE si ouer ons, also wi in v hebben ghehoept.