De Vorsterman Bijbel

§ Dauids .xxxi. Psalm.. Dauids onderwijsinge. ⁺ § Beati quorum.

+ int heb. den xxxij. psalm

1

⁺SAlich zijn si dien haer misdaden vergeuen zijn, ende die haer sonden bedect zijn.

+ A

2

Salich is die man den welcken die HERE geen sonde toe gerekent en heeft tot schulde, noch in sinen geeste geen bedroch en is.

3

Want doen ic sweech zijn al mijn beenderen veroudert, doen ic den heelen nacht door riepe.

4

Want uwe hant is dach ende nacht verswaert op mi, Ic ben omgekeert in mijn alendicheit alst ruggebeen doornagelt wert.

5

Mijn misdaet heb ic v te kennen gegeuen, ⁺ ende mijn onrechtueerdicheyt en heb ic niet verborgen Ic seide, Ic sal den HERE teghen mi beliden, mijn onrechtueerdicheit, ende de boosheyt mijnder sonden hebdi mi vergheuen.

+ B

6

Voor dese sal alle heylige tot v bidden, inden bequamen tijt. Maer nochtans in die diluuie van oueruloet van vele wateren, en sullen si tot hem niet ghenaken.

7

Ghi zijt mijn toeulucht vander quellinghe die mi omuanghen heeft, ⁺ mijn vruechde verlost mi vanden ghenen die mi omuanghen.

+ C

8

Ic sal v verstant gheuen ende onderwisen v inden wech daer ghi door sult gaen, Ic sal mijn ooghen op v vestighen.

9

En wilt niet worden gelijc een peert oft muyle, inden welcken geen verstandenisse en is. Met den thoome ende met tgebidt benaut hen haer kinnebacken, ⁺ die tot v niet en ghenaken.

+ D

10

Vele geesselen behooren den sondaer, Maer die inden HERE hoept, sal de bermherticheyt omuanghen.

11

Ghi rechtuaerdighe verhuecht v inden HERE ende weest vrolic, ende alle die oprecht van herten zijt glorieert.