De Vorsterman Bijbel

§ Dauids .xxvi. Psalm. ⁺ § Dominus illuminatio.

+ int heb. den xxvij. psal.

1

⁺DIe HERE is mijn licht, ende mijn salicheit, wien soude ic vreesen? Die HERE is mijns leuens ^* beschermer) voor wien soude mi grouwelen?

+ A

* th. cracht

[p. Hh7r]

2

Als die boose comen ouer mi, om mijn vleesche te eten. Mijn vianden die mi quellen, si zijn cranck gheworden ende gheuallen.

3

Al ist dat hem tegen mi een heyr leet, soo en sal nochtans mijn herte niet vreesen, Al verhief hem eenen strijt teghen mi, daer in sal ic hopen

4

Een dinc heb ic gebeden vanden HERE, dat sal ic eysschen, dat ic inden huyse des HEEREN, mach woonen al die daghen mijns leueuens, ⁺ Om dat ic soude sien den ^* wille) des HEREN, ende dat ic sinen tempel besoecke.

+ B

* the. lust.

5

Want hi heeft mi geborghen in zijn wooninge, inden dach der boosheyden, ende hi bescermde mi int verborgen van zijnder wooninghe.

6

Hi verheffet mi op eenen steen, ende nv heeft hi mijn hooft verheuen ouer mijn vianden Ic heb omgegaen ende geoffert in zijn wooninge een offerande des roepens, ic sal singen, ende sal den HERE een psalmlof segghen

7

HERE verhoort mijn stemme, daer ic mede tot v hebbe geroepen, Sijt my genadich ende verhoort mi.

8

Mijn herte heeft tot v geseyt, mijn aenschijn heeft v gesocht, HEERE ic sal v aenschijn versoecken.

9

En keert v aensicht niet van mi ende en gaet niet wech van uwen knecht in gramschappen. Sijt mijn hulper, en verlaet my nyet, noch en versmaet mi niet, god mijn salichmaker

10

Want mijn vader ende mijn moeder hebben mi verlaten, maer dye HEERE heeft my opghenomen.

11

⁺HERE sedt mi een wedt in uwen wech, ende schict mi in eenen effen sipat, om mijnder vianden wille,

+ C

12

En leuert mi niet inde sielen der gheender die mi quellen, Want daer zijn valsche getuyghen teghen mi opgestaen, ende die onrechtueerdicheyt heeft haer seluen gelogen.

13

Ic gelooue ymmer dat ic sien sal die goeden des HEEREN inden lande der leuendiger.

14

Verwacht den HERE, ende werct manlicken, ende laet v herte verstercken, ende verbeydet den HERE.