De Vorsterman Bijbel

§ Dauids .xxiiij. Psalm ⁺ § Ad te leuaui animam meam

+ int heb. den xxv. psalm.

1

HERE tot v heb ic mijn siele opgeheuen

2

Mijn God, ic heb mijn betrouwen op v en laet mi niet bescaemt worden.

3

⁺Noch en laet mijn vianden mi niet bespotten Want alle dye v beliden en sullen nyet bescaemt worden.

+ A

4

Laetse bescaemt worden alle gader die boosheit doen in ydelheden. HERE wijst mi uwe weghen, ende leert mi uwe paden.

5

Leyt mi gescictelijc in uwe waerheit, ende leert mi, want ghi zijt die God mijn salichmaker ende ic heb v den geheelen dach verwacht.

6

HERE gedenct op v ontfermherticheit, ende op uwe ontfermherticheden, dye van des werelts beginne geweest zijn.

7

⁺Der sonden mijnre ioncheit noch mine onwetentheden en wilt niet ghedencken. Maer gedenct mijns ghi na uwer ontfermherticheit om uwe goetheits wil HERE

+ B

8

Die HERE is goet ende recht, daerom sal hi de sondaers een wet gheuen inden wech.

9

Hi sal die verduldige te recht bescicken int ordeel, ende sal die sachtmoedige zijn wegen leeren

10

⁺Alle die weghen des HEREN zijn bermherticheit ende warachticheit den genen die sine verbont ende getuygenisse verwaren.

+ C

11

Om ws naems wil Here suldi wesen genadich mijnder misdaet, want mijn sonden zijn vele

12

Wie is die mensche die den HERE vreest? hi heeft hem geordineert een wet inden wech dien [kolom] hi vercoos.

13

Sijn siele sal woonen in goeden, ende zijn zaet sal dat lant besitten in erffenissen.

14

Die HERE is een vasticheit dien die hem vresen, op dat hem zijn verbont openbaer soude worden ghemaect.

15

Mijn oogen zijn altoos totten HERE, want hi sal mijn voeten wt den stric trecken.

16

Siet op mi ende zijt mi genadich, want ick ben eenich ende arme.

17

Den druc mijns herten is vermenichfuldicht wt minen nooden verlost mi.

18

Aensiet mijn vernederinge ende minen arbeyt ende vergeeft mi alle mijn sonden.

19

⁺Siet aen mijn vianden want si vermenichfuldicht zijn, ende met onrechten hate haten si mi.

+ D

20

Bewaert mijn siele ende verlost mi, Ic en sal mi niet scamen want ic heb in v ghehoept.

21

Die onsculdige ende rechtuaerdige hebben met mi aengehangen, om dat ic v verbeit heb.

22

O God verlost Israel wt alle sinen druck.