De Vorsterman Bijbel

§ Dat .xlij. Capittel.

1

⁺ENde Iob antwoorde den HERE, ende sprac,

+ A

2

Ic weet wel dat ghi alle dinghen vermoecht, ende geen ghedachte en is voor v verborgen.

3

Wie is dese die sinen raet heelt sonder konste? Daerom heb ic onwijsliken ghesproken, dingen die bouen mate mijn conste te bouen gaen.

4

Hoort ende ic sal spreken, Ic sal v vraghen, antwoort mi.

5

Metten hooren mijnder ooren heb ic v gehoort, maer nv siet v mijn ooghe,

6

Hierom straf ic mi seluen, ende doe penitentie in voncken ende asschen.

7

Na dien als nv die HERE dese woorden tot Iob gesproken hadde, so sprac hi tot Eliphas van Theman, Mijn gramscap is teghen v verbolgen, ende tegen uwe twee vrienden. Want ghi en hebt niet recht voor my ghesproken, ghelijck mijn knechte Iob.

8

Daeromme [kolom] neemt met v seuen varren, ⁺ ende seuen rammen, ende ghaet heenen tot minen knechte Iob, ende offert brantoffert voor v, ende mine knecht Iob sal voor v bidden, Ick sal zijn aenschijn ontfangen, so dat dese dwaesheyt v niet en verwite in sculde geschict en worde Want ghi en hebt nyet voor minen ooghen gherechtelicken gesproken, ghelijc Iob mijn knecht.

+ B

9

Aldus ghingen wech Eliphas van Theman, ende Baldath van Suith, ende Saphar van Naamath, ende hebben ghedaen ghelijckerwise als God tot hen ghesproken hadde, ende die HEERE ontfinc Iobs aenschijn,

10

Ende die HEERE keerde hem tot Iobs penitencie, als hi voor zijn vrienden badt

⁺ Ende die HERE gaf Iob tweefout also veel als hi ghehadt hadde.

+ C

11

Ende alle sine broeders, ende alle zijn susters, ende alle die hem te voren kenden, quamen tot hem, ende aten met hem broot in zijn huys, ende keerden dat hooft tot hem, ende troosten hem, ouer alle dat quaet, dat die HERE ouer hem hadde laten comen, ende elck ghaf hem een schaep, ende een gulden oorrinck.

12

Ende dye HERE ghebenedide Iobs eynde meer dan den beghinne, Alsoo dat hi vercreech veerthien duysent schapen, ende ses duysent kemelen, ende duysent iock runders, ende duysent ezelinnen,

13

⁺Ende hi creech seuen sonen, ende drie dochteren,

+ D

14

Ende hiet die eerste Iemina, die andere Kezia, ende dye derde Kerenhapuh,

15

ende soo schoonen vrouwen en werden niet gheuonden in allen den landen, als dye dochteren Iob, Ende haer vader gaf hen haer erfdeel onder haeren broederen,

16

Ende Iob leefde na desen hondert ende .xl. iaer dat hi sach zijn kinderen, ende kints kinderen, tot in dat vierde lidt ende Iob sterf, out ende vol van daghen.

§ Dat eynde des boecks Iob.