De Vorsterman Bijbel

§ Dat .xli. Capittel

1

⁺ICk en sal hem niet verwecken, ofte ick wreet waer, want wie mach minen aensichte weder staen?

+ A

2

Ende wie heeft mi te voren yet gegeuen, dat ict hem weder verghelden mach? Het is mine, wat onder af den hemel is,

3

Ic en sal hem niet sparen door machtige woorden, die versiert zijn om te bidden

4

Wye sal dat aensicht zijns cleets ontdecken? ende wie sal ingaen int middel van sinen mont?

5

Wye sal dye poorten zijns aensichts open doen? Inde omghaende rondicheyt zijnder tanden is vreese,

6

Sijn lichaem is als ghegoten schilden te samen geuoecht met schulpen die drucken,

7

Die eene handt vast aen die andere, datter niet een wijndeken door en gaet

8

Deene sal vast aen dandere geuoecht worden, ende houdende hen te samen, en sullen si in gheender manieren van malcanderen gescheyden worden

9

Sijn niesen is gelijc een claerheit des viers

[p. Hh2r]

Sijn oogen zijn ghelijc die oochscelen der dageraet,

10

wt sinen mont varen lampen gelijc tortsen, van bernende vier,

11

wt sinen nuesgaten rooc ghelijc wten heeten potten,

12

Sinen adem doet coude colen bernen, ende wt sinen monde gaen vlammen.

13

In sinen hals sal stercheit gheduerlic woonen, ende behoeffelike armoede sal voor zijn aensicht gaen.

14

Die lidtmaten zijns vleeschs hangen aen malcanderen, hi sal teghen hem blixemen seynden, ende si en sullen in geen ander plaetse geuoert worden.

15

⁺Sijn herte sal worden verhart als eenen steen ende verhardet ghelijc eens smits aenbildt.

+ C

16

Als hi hem sal verheffen, sullen die enghelen vreesen, ende die veruaert zijn sullen suyuer gemaect worden.

17

Als hem dat swaert beuanct, so en sal hi dat niet mogen verdragen, noch ooc lancie, noch borst ghetuych,

18

Want hi sal dat yser achten als caf, ende het metael als verrot hout,

19

Een scutter en sal hem niet veriagen, Die steenen der slingeren zijn hem verandert in stoppelen.

20

Hi sal den hamer achten als stoppelen, ende sal den gheenen die de glauie roert bespotten.

21

Onder hem sullen wesen die stralen vander sonnen, hy sal dat gout onder hem spreyen als slijc,

22

Hi sal die diepte der zee doen vallen als eenen pot, ende salse stellen ghelijck alsmen dye saluen menget.

23

Achter hem sal den pat licht schinen, Ende hi sal den afgront achten, als eenen die oudt wort.

24

Daer en is gheen macht op aerden die by hem gheleken mach worden, want hi is ghemaect dat hi niemant en sal ontsien.

25

Alle hooghe dinck siet hy.

Hi is een Coninck ouer alle kinderen der houaerdicheyt.

§ Hoe Iob Gode antwoort, ende zijn misdaet bekende.