De Vorsterman Bijbel

§ Dat .xxviij. Capittel.

1

⁺DAt siluer heeft dbeghin zijnder aderen ende dat gout zijn plaetse daert groeyt

+ A

2

yser brengtmen wter aerden, ende den steen smiltende van hitten verwandelt in coper,

3

Den duysternissen heeft hi een eynde ghesedt, ende hy merct het eynde van allen desen Den steen der scheemeringhe ende schaduwe der doot

4

dye scheyt die vloet vanden vreemden volcke, dye des armen volcs voet vergheten heeft ende die verdoelde,

5

Daerde daer bouen broot opwies in sine plaetse is met den vier bedoruen,

6

der saphyren plaetsen is haer steen, ende haer leem is gout,

7

Den padt en heeft gheen voghel bekendt, ende gheens ghiers ooghe en heeften ghesien,

8

Die cooplieden kinderen en hebben daer nyet op ⁺ ghetreden, ende daer en is gheen leeuwinne ouerghegaen,

+ B

9

Ooc slaet hy zijn handt aen, den steen, ende graeft dye berghen omme van ondere die wortelen,

10

hi snijdet riuieren inde steenen, ende al wat costelic is heeft zijn ooghe ghesien,

11

Hy heeft doorsocht dye diepte der vloeden ende brocht dat veborghen, dat daer inne is, aent licht

12

Maer waer vintmen die wijsheyt, ende waer is dye plaetse des verstants?

13

Nyemant en weet haer weerde, noch si en wort in dye [kolom] landen daermen soetelic leeft, niet geuonden

14

Den afgront seyt, si en is in mi niet, Ende dye zee seyt, Si en is met mi niet,

15

⁺Men en salder gheen ghefineert gout om gheuen, noch siluer ouer gheweghen om die te coopen,

+ C

16

Men salse niet rekenen teghen dye gheuerwede verwen wt Indien, noch den aldercostelicsten steene Sardonico, ende den Saphyre en salse niet gheleken worden,

17

By haer en salmen niet rekenen gout ofte glas, ende inder comenscappen en salmen voor haer niet betalen hooghe ghulden vaten,

18

Ende si en sullen nyet eens ghenoemt zijn in haerder gelijckenisse, Want die wijsheyt trectmen wt den verborghen

19

Wandt Topasius wt Moorren landt en sal by haer niet ghelijck wesen, Ende men en salse nyet weerderen teghen costelijcke ende suyuer gheuerwede lakenen.

20

Van waer coemt dan dye wijsheyt? ende welcke is die plaetse des verstandts?

21

⁺Si is verborghen voor die ooghen van allen leuenden, oock verborghen den voghelen onder den hemel,

+ D

22

Die verdoemenisse ende die doot segghen, Wi hebben met onsen ooren haer fame gehoort,

23

God weet den wech daer toe, ende hy kent haer plaetsen,

24

Want hi siet dye eynden der aerden, ende bescout al dat onder den hemel is,

25

hy heeft den winde zijn ghewichte ghemaect, ende dat water gheweecht in maten, ⁺

+ Psal. c.x.a Proue. x.a

26

Doen hy den reghen een wet stelde, ende den donder ende blixem den wech,

27

doen sach hijse, ende verteldese, bereydese, ende vantse,

28

ende sprack totten mensche. Siet die vreese des HEEREN, die is wijsheyt, ende dat quaet te schouwen, dat is verstandt.

§ Hoe Iob des voorleden tijts voorspoet beclaecht