De Vorsterman Bijbel

§ Dat .xiij. Cap.

1

⁺SIet, mijn ooghe heeft alle dese dingen ghesien ende mijn oore ghehoort, ende ick hebt elck bisonder verstaen,

+ A

2

Na uwer verstandenisse weet ict ooc, ende en ben niet neerdere dan ghi,

3

Nochtans sal ic tot den almachtigen spreken, ende ic begeere met God te disputeren,

4

maer eerst sal ic bewisen dat ghi smeden der lueghenen ende oeffenaers van verkeerder leeringen zijt,

5

ende och oft ghi doch sweecht so sout ghi wijse worden gheacht,

6

Hoort doch mine straffinge, ende aenmerct dat ordeel van minen lippen,

7

⁺Heeft God uwe lueghenen ghebreck, dat ghi loosheit voor hem moet spreken?

+ B

8

En neemde ghi niet zijn aensicht, ende arbeyt voor God te ordeelen? oft salt hem behagen daer niet voor verborghen en mach zijn?

9

Oft sal hi bedrogen worden als een mensche met uwer scalcheyt ende boeuerie?

10

Hi sal v straffen want ghi neemt zijn aensicht int heymelick,

11

ende ter stont als hi hem om sal roeren sal hy v verstooren, ende sine vreese sal ouer v vallen,

12

uwe gedachtenisse sal der asschen gelijc worden, ende uwe necken sullen in eenen leem hoope verkeert worden,

13

Swighet een weynich, op dat ick spreke, dat mijn ghedachte my ingheeft,

14

⁺waer om schoore ic mijn vleesch met mijnen tanden, ende draghe mine siele in minen handen?

+ C

15

Al waert ooc dat hi mi doode, ic sal in hem hopen, nochtans wil ic mine wegen voor hem straffen,

16

ende hi sal ymmer mijn salichmaker zijn, want daer en sal gheen hypocrite voor sinen aensichte comen,

17

hoort mine reden ende mine wtlegghinge ontfanget met uwen ooren,

18

Ist dat ic geoor-

[p. Gg2r]

deelt worde, Ic weet dat ic oprecht sal zijn geuonden,

19

wie is die met mi sal worden gheoordeelt, Waerom wort ic al swigende verteert Laet hem comen.

20

Tweederhande dinghen alleen en doet mi niet, so en sal ic voor v nyet verborghen zijn,

21

⁺Doet v hant verre van my zijn, ende uwen anxt en veruare my niet.

+ D

22

Roept my, ic wil v antwoorden, oft certeynlick ick sal spreken, antwoort ghi mi.

23

Hoe veel is mijn misdaet ende mine sonden? ende vertoont my mijn ouertredinge ende sonden,

24

waerom verbercht ghy v aensichte, ende hout mi voor uwen viant,

25

tegen een blat, dat metten winde op ghenomen wort toondy v macht, ende veruolcht een dorre stoppele,

26

want ghi scrijft teghen mi bitterheden ende wilt mi verdoen, om der sonden wille mijnder ioncheit.

27

Ghi hebt minen voet inden stoc gheset, ende hebt achte op alle mine paden, ende hebt ghemerct die voetstappen mijnre voeten,

28

Ic die verteert sal worden als vuyle ettere, ende als een cleet dat van dye motten gegheten wort.

§ Hoe Iob des menschen leuen bescrijft, ende hi voorseit dat die verrisenisse is toecomende.