De Vorsterman Bijbel

§ Dat .xij. Capittel.

1

⁺DOen antwoorde Iob ende sprack,

+ A

2

so dan zijt ghi alleen menschen, ende met v sal die wijsheyt ^* steruen?)

* oft oprijsen

3

Ic heb alsoe wel een herte als ghi, ende en ben niet neerdere dan ghi ende wie ist, die dat nyet en weet, dat ghi wetet.

4

Wie van sinen vrient bespot wort als ick die sal God aenroepen, die sal hem verhooren, Want die slechtheyt des rechtueerdichs wordet bespot,

5

ende is een lampe den rijcken, verachtet in huerder herten, maer bereyt ^* tot eenen ghescicten tijt)

* theb. dat si die voeten daeraen stooten

6

die wooninghen der roouers zijn, vol van oueruloedicheyt, ende si verwecken God stoutelijc tot gramscappen, al ist dat God alle dinghen in haer handen heeft ghegeuen.

7

Vraecht doch den vee, dat salt v leeren, ⁺ ende die voghelen des hemels sullent v seggen

+ B

8

oft spreect metter aerden, die sal v antwoorden, ende die visschen inder zee sullent v vertellen,

9

Wie en weet dat niet, dat des HEREN hant al dit gemaect heeft?

10

in zijnder hant is die siele, ende al datter leeft, ende die geest van allen vleesche des menschen?

11

En proeft dye oore die reden niet, ende die kaken des eters den smake der spijsen?

12

Inden ouderen is wijsheyt ende voorsichticheyt in veeltijdighe,

13

By hem is wijsheyt ende machticheyt, hy heeft raet ende verstant,

14

als hi breect soo en is nyemant diet timmert, als hi yemanden besluyt, soe en isser nyemant diet open doet,

15

⁺Siet als hy dwater ophout, soo wordet alle dinck drooghe, ende als hijt wtlaet, so sullense daertrijc omkeeren,

+ C

16

bi hem is stercheyt ende wijsheyt, hi kent den ghenen die bedriecht, ende hem dye bedroghen wort. [kolom]

17

Hy leyt die raetgeuers tot eenen dwasen eynde, ende die rechters tot verwonderinghe

18

Hi ontbint der coningen gordele, ende gordet hare lendenen met eenen zeele,

19

Hi leyt die priesters als in oneeren, ende die edelen treet hi onder zijn voeten,

20

⁺Hi keert wech die lippen der warachtiger, ende neemt die leeringe der ouders wech,

+ D

21

Hi stort verachtinge op die princen, ende dye verdruct waren heft hy weder om op

22

Hi openbaert die diepheden van den duysternissen, ende brenget wt dye scaduwe der doot int licht,

23

Hi vermenichfuldicht dat volck, ende vernieltse, ende dye bedoruen waren sedt hy inden eersten state,

24

hi verandert dat herte der princen des volcs des landts, ende bedriechtse, dat si moeten wandelen op eenen onwech, daer ghenen wech en is,

25

Si sullen tasten gelijc in duysterheden ende sonder licht, ende salse doen dolen als droncken lieden.

§ Iob straft zijn vrienden wt haren eyghen woorden, ende dye gheueynstheyt verdoemt hi