De Vorsterman Bijbel

§ Dat .xi. ca.

1

⁺DOen antwoorde Zophar van Naamach, ende sprac,

+ A

2

Sal niet een dye veel spreect ooc hooren? oft sal een man van veel woorden gherechtuerdicht worden?

3

Sullen dye lieden v alleen verswigen, ende als ghi alle dander bespot, en suldi van niemant beschaemt worden?

4

want ghi hebt geseyt, mine leeringe is reyne, ende ic ben suyuer in dinen aenscouwen,

5

Ende och oft God met v sprake, ende dede sine lippen open,

6

ende verthoonde v die heymelicheyt der wijsheyt. ende dat zijn wet menichfuldich is, ende ghi soudet dan verstaen dat v veel min gheeyscht wort van hem dan v boosheyt verdient,

7

ter auontueren suldy Gods voetstappen begripen, ende ghi sult totter volmaectheyt den almachticheyt vinden?

8

Hy is hoogher dan den hemel, wat wilt ghi doen? dieper dan die helle, ⁺ waer van sult ghi hem bekennen?

+ B

9

langher dan dye aerde is zijn mate ende breeder dan die zee,

10

Ist dat hijt al omme keert, oft in eenen hoope benauwe, wie sal teghen hem steken, oft wie sal hem moghen segghen, waer om doedi alsoo?

11

Want hy kent die ydelheyt der lieden, Hy siet dye onduecht, ende en mercket hi niet?

12

Een ydel man verheft hem in houerdien, ende hi meynt dat hi vri gheboren is, als een volen van eenen wilden ezele.

13

⁺Maer ghi hebt v herte beuesticht, ende uwe handen tot hem wt ghestrect,

+ C

14

waert dat ghi die onduechde die in uwer handt is

[p. Gg1v]

verre van v had gedaen, ende dat in uwen wooninghe gheen ongherechticheyt en bleue,

15

so mocht ghi v aensicht op heffen sonder smette ende soudt vast zijn, ende v niet vreesen,

16

Ende dan sout ghi der armoeden vergheten, ende dye niet ghedencken, als des waters, dat voorbi ghegaen is,

17

⁺Ende hi sal v tsauonts opstaen, als smiddaechs claerheyt, Ende als ghi meynen sult dat ghi al verteert zijt, suldi op gaen als die morgen sterre,

+ D

18

ende ghi sult betrouwen hebben als v die hope te voren geleet is, ende als ghi begrauen sult wesen,

19

suldi vrijlic slapen ende ghi sult rusten, ende daer en sal niemant zijn die v sal veruaren, ende veel lieden sullen v aensicht bidden,

20

Maer die ooghen der ongodliker sullen vergaen, ende alle toeulucht sal van hem vergaen, Want haer hope is der sielen onweerdich.

§ Hoe Iob zijn lijdsaemheyt bewees, ende Gods mogentheyt vercondicht.