De Vorsterman Bijbel

§ Dat .vij. Capittel.

1

⁺DEs menscen leuen is eenen strijt opter aerden, ende zijn daghen zijn als eens daechs huerlincs.

+ A

2

Gelijc een ^* herte) verlanct na de scaduwe, ende eens dachs huerlinc dat sinen arbeyt wt si,

* th. knecht

3

Also heb ic wel geheele maenden te vergeefs gearbeyt, ende allendige nachten heb ic mi veel getelt,

4

Als ic soude slapen, wanneer sal ic opstaen seyde ic, ende wederom sal ick wachten den auont ende sal veruult worden van smerten, tot dat duyster wort,

5

Mijn vleesche is alomme gecleet met rootheyt, ende veruuylt Mijn huyt is vercrompen ende verdorret.

6

Mijn dagen zijn lichter wech geulogen dan eens weuers ^* webbe af gesneden wort) ende zijn vergaen sonder eenighe hope.

* th. spoel.

7

Gedenct dat mijn leuen eenen wint is, ende dat mijn ooge niet weder en sal comen te sien dat goede,

8

⁺ende geen gesichte des menscen en sal mi meer sien, ⁺ Dine oogen sien teghen mi, ende ic en sal niet gedueren.

+ B

+ iob. ix.c

9

Gelijckerwijs een wolcke wort te niet ende gaet voorbi,

10

Also wie inder hellen onder vaert, die en sal niet weder opwaerts comen, noch niet weder op in zijn huis ende zijn plaetse en sal hem niet meer kennen.

11

Daerom en sal ic minen mont niet sparen, Ic sal spreken vander benautheit mijns gemoets, ende ic sal kallen met die bitterheit mijnder sielen

12

Ben ic dan een zee, oft walvisch, want ghi my omuangen hebt met eenen kercker?

13

⁺Segge ic, mijn bedde sal my troosten, ende ic sal verlicht worden,

+ C

14

als ic met my seluen spreke op mijn bedde, so suldi veruaren met droomen ende ghi sult door anxtelike ghesichten my met veruaernisse bestooten,

15

daerom wenscet mijn siele verhangen te zijn, ende mijn gebeente den doot,

16

ic hebbe mistroostich geweest, ic en sal niet meer leuen. HEERE spaert mi want mijn daghen zijn niet.

17

Wat is een mensche dat ghi hem groot maect? ⁺ oft waerom becommert ghi v herte tegen hem?

+ D

18

ghi besoect hem vroech inder morgenstont, maer ghi proeft hem ter stont.

19

Hoe lange en spaerdi mi niet, ende en laet mi niet toe dat ic mijn speecsel in swilge?

20

Ic heb gesondicht, wat sal ic doen, o ghi menscen bewaerder? Waerom hebdi mi gestelt dat ic v contrarie ben, ende ben mi seluen swaer geworden?

21

waerom en neemdi niet wech mijn sonden? ende waerom en haeldi mijn onrechtuaerdicheit niet af? Siet nv sal ic int stof der aerden slapen, ende ist dat ghi my des morgens soect, ic en sal dan niet wesen.

[p. Ff8v]

§ Hoe bewesen wort dat Iob die pine verdient hadde, dye geneychtheyt wert hier bescreuen.