De Vorsterman Bijbel

§ Dat :v. Capittel.

1

⁺ROept dan, offer iemant is die v antwoorde? ende keert v tot eenigen vanden heyligen,

+ A

2

Maer eenen dullen doodet die gramschap wel, ende den cleynen die nijdicheyt,

3

Ick sach eenen dullen vast gewortelt, ende ic vloecte haestelijc zijn schoonheit,

4

Sijn kinderen sullen verre zijn vander salicheyt, ende sullen verslaghen worden inder poorten, daer en sal gheen verlosser zijn,

5

Die hongerige sal sinen oogst eten, ende die gewapende sullen dien nemen, ende [kolom] die dorstige sullen zijn goet wt suypen,

6

Inder aerden en geschiet niet sonder sake, ende wt der ^* aerden) en groeyt gheen smertte,

* theb. acker

7

⁺Maer die mensche wort totten arbeyt geboren, ghelijc die vogels vliegen,

+ B

8

Hierom sal ic den HERE bidden, ende ic sal mijn wtsprake tot God voegen, ende van hem tracteren

9

die groote dingen doet, die niet te ondersoecken en zijn, ende wonderlicheden die niet te tellen en zijn,

10

Die den regen opt lant geeft, ende maect alle dinck vochtich met wateren,

11

Dye dye nedere stelt int hooghe, ende den verdructen op waerts helpet met ghesontheyt,

12

⁺Hi doet te niet, die ghepeysen der quaetlistiger, ⁺ dat het haer hant niet voluoeren en can dat si begonst hadden,

+ C

+ i.Cor. iij.b

13

Hi vaet die wisen in haerder listicheyt, ende maect der quaden raet te niet,

14

dat si des dages in die duysternisse sullen loopen, ende tasten inden middach als inder nacht,

15

Hi sal behouden den armen vanden sweerde, ende van haeren monde, ende vander ouerweldiger hant des machtigen,

16

ende hi sal zijn des armen hope, want die boosheyt haeren mont sal moeten toe houden,

17

Salich is die mensche die van God gestraft wort, daerom en veracht v der castijnge der HEREN niet,

18

⁺Want hi quetst ende gheneest, hi slaget, ende zijn handen sullent heelen,

+ D

19

Wt ses tribulatien sal hi v verlossen, ende in die seuenste en sal v gheen quaet raken,

20

Inden dieren tijt sal hi v vander doot verlossen, ende in die oorloge van des sweerts hant,

21

Ghi sult worden verborgen voor die geessele der tongen, ghi en sult dye armoede nyet ontsien als si coemt,

22

Int verderuen ende hongher sult ghi lacchen, ende voor die wilde dieren inden lande niet vreesen,

23

Maer v verbont sal zijn metten steenen opten velde, ⁺ ende die wilde dieren opt lant sullen vrede met v houden,

+ Amos. iij.a

24

ende sult beuinden dat uwen wooninge vrede heeft, ende ghi sult v ^* ghelijckenis besoecken) ende niet sondigen,

* the. huysinge besorgen.

25

ende ghy sult onderuinden dat ws zaets veel sal worden: ende uwe nacomelingen, gelijc dat gras der aerden,

26

ende sult inden ouderdom ten graue comen, ghelijc eenen hoop tarwen ingheuoert wort tot zijnder tijt,

27

Siet, dat hebben wi ondersocht, ende tis alsoo, Nv ghelijc ghijt gehoort hebt, ouerlegghet in v gedachten.

§ Hoe Iob antwoorde, seggende, dat zijn pijne meerder dan zijn schult was