De Vorsterman Bijbel

§ Dat .iiij. Capittel.

1

⁺DOen antwoorde Eliphas van Thema, ende sprac,

+ A

2

Ghi en hebbet messchien niet

[p. Ff7v]

geerne ist datmen met v pijnt te spreken, maer wie mach verdraghen die reden die ghi voor neemt?

3

Siet, ghi hebter veel onderwesen, ende vermoeyde handen ghesterct,

4

uwe reden heeft die vallende opgerecht, ende die beuende knien hebdi ghesterct,

5

⁺Maer nv is die plaghe op v gecomen, ende ghi zijt verslaghen, ende nvse v noopt, sidy verstoort,

+ B

6

Waer is uwe vreese? waer is v stercheit? waer is v lijdtsaemheit? waer is die volmaectheyt dijnre wegen?

7

Ick bid v vragende, waer is een onsculdighe vergaen? oft waer zijn dye gerechtighe verlaten?

8

Maer ic heb meer gesien die quaetdoenders, die zaeyden pijnen ende oochstense oock in,

9

dat si door den adem gods zijn vergaen, ende vanden geest zijnder gramscappen, verteert worden,

10

Dat briescen der leeuwen ende de stemme der leeuwinnen ende die tander der ionger leeuwen zijn gebroken,

11

dye leeuwe is verghaen, om dat hi niet meer en roofde, ende die ionge leeuwen zijn verstroeyt,

12

Want sekerlijc tot mi is een heymelic woort gecomen, ⁺ ende mijn oore heeft heymelijck die aderen zijns rumoers ontfaen,

+ C

13

in die veruaernisse vanden nacht gesichte als den slaep op die lieden valt,

14

quam mi vreese ende beuen aen, ende alle mijn gebeenten verscricten,

15

ende doen den geest voor bi mi ghinc, soo stonden mi die haren te berge aen mijn lichaem,

16

Doen stont een wiens aensicht ic niet en kende, een beelt voor mijn oogen, ende ic hoorde een stemme als een saecht windeken,

17

Mach oock die mensche bi gode geleken gerechtueerdicht worden? oft een man reynder zijn, dan die hem ghemaect heuet?

18

⁺Siet dye hem dienen en zijn niet stantaftich ende in zijn ^* engelen) heeft hi quaetheyt geuonden, ⁺

+ D

* theb. boden

+ Esa. xxxiij.

19

hoe veel meer die in leemen huysen woonen ende die welcke op daerde gefundeert zijn sullen alle verslint worden als vanden motten,

20

Van smorgens totten auont sullen si af gehouwen worden, ende oock dat niemant en verstaet inder eewicheyt sullen si vergaen,

21

Maer die ouer bliuen van hen sullen wech ghehaelt worden, si sullen steruen, ende niet ^* in wijsheden.)

* the. onuersiens.

§ Hoe Iob noch berispt wert, hoet den sotten verghaet, ende vander rechtueerdicheyt Gods