De Vorsterman Bijbel

§ Dat .x. Capittel.

1

ENde die coninc Asswerus leide tzijns opt lant, ende op die eylanden der zee,

2

Maer allet werc zijnder gewelt ende macht, ⁺ ende die grote heerlicheit Mardochei, die hem de coninc gaf, siet, dat is gescreuen in de Cronijcke der coningen van Meden ende van Persen.

+ A

3

Want Mardocheus die iode, was die tweede na den coninc Asswerus, ende groot onder die ioden, ende aengenaem onder die menichte zijnder broederen, die voor zijn volc goet sochte, ende sprac dat beste voor alle zijn zaet. ⁺

^* Dat int hebreeus staet, dat heb ic getrouwelic wt gesproken. ⁺ Maer dat hier na volcht dat heb ic in die gemeyn translatie, die welcke int griecks bescreuen is, geuonden, ende so moet dit capittel na dat eynde des boecs ge-[kolom]stelt, dwelc wi na onser gewoonten met eender sterren voor geteekent hebben)

+ Hier eyndt dat boec hester int he.

* De woorden Ieronymi.

+ B

4

Ende Mardocheus seyde, dese dingen zijn van Gode gedaen,

5

Ic hebbe dies drooms gedacht, dien ic sach, ⁺ die dit selue betekende, noch daer en is niet af voor bi gegaen, ⁺

+ C

+ Hester .xi.d

6

Die cleyne fonteyne is ghewassen in een riuiere, ende is verandert in licht, ende in die sonne, ende ouer geuloet in veel wateren, dat is Hester, die welc die coninc tot een huysurouwe nam, ende woude, dat si een coninghinne soude zijn.

7

Die twee draken, ben ick ende Aman,

8

maer die lieden die daer vergadert waren, zijn die gene, die arbeyden om der ioden name wt te doen.

9

Maer mijn volck is Israel, die totten HERE riepen ende die HERE behielt zijn volck, ende verloste ons van allen quaden, ende hi dede grote teekenen ende wonderlicheden ouer die heydenen

10

⁺Ende hi beual twee loten te gesciede, dat een den volcke Gods, ende dat andere allen heidenen.

+ D

11

Ende beyde die loten quamen tot een insettinge, van dier tijt aen, voor Gode, ende allen heydenen,

12

ende die HERE gedacht zijns volcs, ende ontfermde zijnder erffenissen.

13

Ende dese daghen sullen onderhouden worden, in die maent Adar, opten .xiiij. ende .xv. dach der seluer maent, met alle naersticheit ende blijscapen, alst volc vergadert is, in een vergaderinge, hier na in allen gheslachten des volcs van Israel.

§ Hoe Mardocheus eenen droom sach.