De Vorsterman Bijbel

§ Dat .ix. ca.

1

⁺INder twaelfster maent, dat is die maent die wi nv te voren Adar genoemt hebben, inden dertiensten dage dien des conincs woort ende gebot, gestelt hadde, datment iuyst opten seluen dach, doen die vianden die Ioden gedoot souden hebben, ende daer toe reetscap maecten, ende haer vianden verlangden om bloet te storten, keerde dat omme, dat die ioden haere vianden verweldichden.

+ A

2

Doen vergaderden hen die ioden in haer steden, in allen landen des conincs Assweri, dat si die handen souden slaen aen die gene die hen quaet wilden, ende niemant en dorste hen weder staen. Want die vreese haerder grootheit was ouer allen volcken ghecomen.

3

Ooc alle douerste des lants, ende princen, ende prouoosten, ende officiers des conincx verhieuen die ioden, om die vreese Mardochei

4

want si wisten dat hi prince des pallays was ende veel vermochte, ende zijn fame van sinen naem wies alle dage, ende maecte gheruchte, vlieghende door die monden van allen menschen.

5

Also sloegen die ioden aen allen haeren vianden, met des swaerts slach, ende doodense, ende vernieldense, ⁺ ende geuende hen wederom dat si hen toe ghescict hadden te doen,

+ B

6

soo dat si te Susan dooden, ende verdeden die Ioden ccccc. mannen,

7

behaluen Pharasandatha, Delphon, espatha,

8

phorata, Adalia, Aridata,

9

phermestha, Arisai, Aridai, Vaiezaha, die .x. sonen Aman des Agagiten, der ioden viandt.

10

Maer als si dese ghedoot hadden, aen haer goeden en sloeghen si die handen niet, om te roouen

11

Ter seluer tijt quam dat ghetal der ghedooder tot Susan voor den coninck.

12

Ende de coninc sprac totter coninghinnen. Die ioden hebben tot Susan .ccccc. mannen ghedoot, ende verdaen, ende ooc die thien sonen Aman, Wat meendy hoe grooten dootslagen si doen inden anderen landen? Wat bidt ghi datmen v geue? ende wat eyscht ghi meer, dat ict ghebiede te ghesciedene? [kolom]

13

⁺Ende Hester sprac tot hem. Behaget den coninc so laet die ioden morgen tot Susan ooc doen, na dat gebot van heden, ende dat si die thien sonen Aman doen aen galgen hangen.

+ C

14

Ende die coninc hiet also doen, ende dat gebot wert terstont tot Susan opgeslagen, ende die .x. sonen Aman werden gehangen.

15

Ende die ioden vergaderden hen tot Susan, opten .xiiij. dach der maent Adar, ende verdeden op eenen dach tot Susan .ccc. mannen, maer aen haeren goeden en sloegen si die handen niet.

16

Maer die ander Ioden inden landen des conincs quamen tsamen, ende stonden voor haer leuen, ende sloegen haer vianden, ende dooden van haeren veruolgers vijfentseuentich duysent, maer aen haer goeden en sloegen si die hant niet.

17

⁺Dat ghesciede opten dertiensten dach der maent Adar, ende sie lieten af van dootslaen opten veertiensten dach der seluer maent, dien maectemen tot eenen feestdach, datmen voortaen allen tijden in dien dach becommeren soude met brassingen, blijscappen, ende maeltijden.

+ D

18

Maer die ioden tot Susan waren tsamen gecomen beyde opten dertiensten ende viertiensten dage, ende waren onleech in dootslaen, ende hielden opten vijftiensten dach, ende dien dage maecten si tot eenen dach der brassinghen ende der blijscappen.

19

Daerom maecten die ioden die opten dorpen ende onbemuerde steden woonden den veerthiensten dach der maent Adar, tot eenen dage des brassens, ende der blijscappen, ende deen seynde den anderen giften vanden maeltijden ende spijsen.

20

Ende Mardocheus bescreef dese gesciedenisse, ende seynde die brieuen tot alle den ioden, die in allen den landen des conincs woonachtich waren, ⁺ beyde die na ende verre waren,

+ E

21

dat si den veertiensten ende vijftiensten dach der maent Adar souden ontfaen, ende houden iaerliken tot feestdaghen, met feestliker eeren,

22

Want in desen wraken hen die ioden van haere vianden ende haer smerte in bliscap, ende haer leet in goede dagen verkeert was, dat si die selue souden houden voor dagen des brassens ende vruechden, ende der blijscappen, ende dat deen den anderen gerechten van spijsen souden seynden, ende den armen mede deylen haer giften.

23

Ende die ioden ontfingent tot een feestelike gewoonte dat si hadden begonst te doen, ende dat Mardocheus tot hen screef met brieuen gebiedende.

24

⁺Want Aman die sone Amadati, die Agagite, alre ioden viant gedacht hadde, al die ioden te vernielen, Ende dat lot laten worpen om hen te veruaren ende ooc te vernielen,

+ F

25

Ende hoe Hester daer na totten coninc gheghaen was

[p. Ff4v]

biddende, dat door brieuen sine scalcke voornemingen te niet gedaen souden worden, ende tquaet dat hi teghen die ioden gedachte, op zijn hooft gekeert soude worden. Ende hoemen hem ende sine sonen aen galgen vast gemaect hadde.

26

Daer af si voortaen van dien tijt af die dagen Phurim noemden, nae den name des lots ^* dat inder cruycken geworpen was) na allen den woorden des briefs, ende wat si selue gesien hadde, ende wat hen ouercomen was.

* ten is nyet int hebre

27

Ende die ioden rechtent op, ende nament op hen, ende op haere zaet, ⁺ ende op alle die hen tot deser menscen leuen wilden voeghen, datsi niet voorbi en mogen gaen, iaerlicx dese .ij. dagen te houden, gelijc si bescreuen ende gestelt werden,

+ G

28

Dat dese dagen niet te vergeten, maer te houden zijn, bi kints kinderen, bi allen geslachten in allen landen ende steden. Het zijn die dagen Phurim, die welcke niet voorby gegaen en sullen worden vanden ioden, ende haer gedachtenisse niet vergaen bi haeren zade ^* dat tot desen vierten verbonden zijn).

* Ten is nyet int he.

29

Ende die coninginne Hester die dochter Abihahil, ende Mardocheus die iode screuen met gheheelder macht te vieren dese daghen in toecomenden tijden desen anderen brief van Phurim,

30

ende seynden die brieuen tot allen ioden, in .c. ende .xxvij. landen des conincrijcs Assweri met vriendeliken ende getrouwen woorden,

31

dat si dese dagen Phurim souden beuestigen op haeren ghesetten tijt, so Mardocheus ende Hester ouer hen beuestighet hadden. Also hebben si op haer sielen ende haer zaet beuestiget, die gesciedenisse der vasten ende haers roepens ^* ende dye dagen des lots,

* h. ende hester beual dese gesciedenissen van deser Phurim te beuestighen: ende in een boeke te scriuen.

32

ende die gesciedenissen deser Phurim te beuestigen al dat in desen boec (die Hester heet) ghescreuen is).

§ Hoe Asswerus tzijnsbaer maecte alle die landen.