De Vorsterman Bijbel

§ Dat .vij. Capit.

1

⁺DEs ander daechs geboot Holofernes sinen heyrscharen dat si op souden trecken tegen Bethulien,

+ A

2

ende der strijtbaer knechten waren .c. duysent ende .xx. duysent, ende der reysers .xxij. duysent, behaluen die bereydinge der mannen, die geuangen hadden gheweest ende daer waren gebrocht vanden landen ende steden der geheelder ioncheyt,

3

Alle tsamen bereyden si hen ten stride tegen de kinderen van Israel ende si quamen door duyterste des berchs totten toppe toe die daer ouer Dothaim siet vander plaetsen die heet Helma tot Chelmon toe die daer is teghen Esdrelon,

4

Doen die kinderen van Israel haer groote menichte sagen, so vielen si plat neder ter aerden worpende asscen op haer hoofden, biddende eenmoede-[kolom]lijc, dat God van Israel zijn barmherticheyt toonen woude, ouer zijn volc,

5

Ende nemende tot hen haer oorloochs wapenen, saten si op de plaetsen, die daer stieren den pat des engen weechs tusschen die geberchten, ende si bewaerdense alle den dach ende nacht,

6

Maer doen Holofernes die stadt omghinck vont hi dat die fonteyn, ⁺ die in haeren wtganc vloeyde, van den zuyden deel, buyten der stadt haer rechtede ende geboot haeren waterganc af te sniden,

+ B

7

Daer waren nochtans fonteynen niet verre vanden mueren, wt welcken si dieflijc schenen water te putten, meer om te lauen dan om te drincken

8

Maer die kinderen Ammon ende Moab gingen tot Holofernem seggende, Die kinderen van Israel en betrouwen noch in glauie, noch in gescutte, maer de bergen bescermense, ende die houelen, die daer ghestelt zijn int afuallende, die makense sterc,

9

Hierom dat ghise sonder beloop des strijts mocht verwinnen, so sedt bewaerders der fonteynen, dat si daer niet en mogen putten, ⁺ ende ghi sultse sonder swaert dooden, oft vermoeyt zijnde sullen si haer stadt ouerleueren, die si meinen dat niet gewonnen en mach worden, inden bergen gelegen,

+ C

10

Ende dese woorden behaechden voor Holoferne, ende voor alle zijn ruyteren, ende hi steldeder .c. rontsom, om elc fonteyne,

11

Ende doen dese bewaringe .xx dagen volbracht was, so gebraken die putten ende die vergaderinge der wateren, allen den genen die te Betulien woonden, also datter niet in der stat en was, daer si eenen dach af versaet mochten worden, Want den volc wert dagelijcs bi mate water ghegeuen,

12

Doen vergaderden tot Oziam, alle die mannen ende vrouwen, ende ionge kinderkens, ende seyden al te samen met eender stemmen,

13

God oordeele tusscen ons ende v want ghi hebt quade dingen tegen ons gedaen, niet willende vredelic spreken metten Assiriers, ⁺ ende daerom heeft ons God in haer handen vercoft

+ Exod. v.d

14

ende daerom en isser niemant die ons verlost als wi vernedert worden voor haer oogen in dorst ende groote verderuinge

15

ende nv vergadert al die in tstadt zijn, ⁺ dat wi ons den volc Holofernis vanselfs ouerleueren,

+ Trenor. iiij.d

16

⁺Want tis ons beter datwi geuangen den HERE leuende gebenedien, dan wi steruen, ende zijn een lachter allen vleesche, als wi onse huysfrouwen, onse ionge kinderen voor onse oogen sien steruen,

+ D

17

Wi betuygen huyden hemel ende aerde, ende god onser vaderen die ons straft na onse sonden, dat ghi de stadt nv ouer geeft inde hantder ruyterscap Holofernis, op dat ons einde cort si inde scerpte des sweerts dwelc langer wort inde droochte des dorsts,

18

ende als zijt geseit hadden, isser een groote

[p. Ee5v]

weeninge ende huylinge geschiet van allen in die vergaderinge, ende si riepen vele vren lanc met een stemme totten HEERE, seggende

19

Wi hebben met onse vaders gesondicht, wi hebben onrechtuaerdelijc gedaen, wi heben ongerechticheden gedaen,

20

Ghi die goedertieren zijt, ontfermt onser, wreect onse onrechtuaerdicheyt in v gheessel, ende en wilt die gene die v beliden niet ouer leueren, den volcke, dat v niet en kent,

21

op datmen onder die heydenen niet en segge, waer is haer god?

22

Ende als si vermoeit waren, mits desen roepen, ende mits dese weeningen, wat geswegen hebben,

23

so stont Ozias op beghoten met tranen, ende seyde, Sijt wel gemoet mijn broeders, ende laet ons dese v. dagen ontfermherticheyt vanden HEERE verwachten,

24

hi sal misschien zijn verbolgenheit afsniden, ende sal sinen name eere geuen,

25

Maer ist datter gheen hulpe en coemt als .v. dagen voorbi zijn, soo sullen wi dese woorden doen die welcke ghi ghesproken hebt.

§ Hoe Iudith, die priesters straft, dat si die stadt hadden willen ouergeuen, ende si vermaentse te bidden.