De Vorsterman Bijbel

§ Dat .vi. Ca.

1

⁺HEt is gesciet doen si ophielden te spreken, dat Holofernes zeer verbolgen wert, ende seyde tot Achior,

+ A

2

Want ghi ons hebt ghepropheteert seggende, dat volc van Israel van sinen god wort bescermt, op dat ic v toone datter er geen god en is dan Nabuchodonosor,

3

als wise al geslagen hebben als eenen mensce, dan suldi ooc vergaen met hen met der Assirien sweert, ende alle Israel sal met v vergaen metter doot,

4

ende dan sult ghi beuinden dat Nabuchodonosor een heere si der geheelder aerden Ende dan sal tsweert mijnder ruterschap door v siden gaen, ende ghi sult doorsteken vallen onder die gewonde Israels, ende ghi en sult niet uwen adem verhalen, tot dat ghi met hen gedoot wort,

5

Maer ist dat ghi meynt dat v prophecie warachtich si, so en verualle v aenschijn niet, ende die bleecheyt die v aensicht heeft vercregen die gae van v, ist dat ghi meynt dat dese mijn woorden niet veruult en mogen worden,

6

⁺Maer op dat ghi weet, dat ghi dese dingen met hen tsamen sult onderuinden, siet, so suldi van deser vren hearen volc toegeuoecht worden, op dat als si weerdige peyn mijns sweerts ontfaen, ghi selue mede der wraken onderworpen zijt,

+ B

7

Doen geboot Holofernes zijnen knechten, dat si Achior souden vangen, ende hem leyden in Bethulien, ende hem ouerleueren in die handen der kinderen van Israel,

8

Die knechten Holofernis namen hem, ende zijn ghereyst door die velden, maer doen si genaecten totten geberchten, so gingen die slinger worpers tegen hen wt.

9

Maer si keerden af ter siden des berchs, ende bonden Achior met handen ende voeten aen eenen boom, ende lieten hem also met zeelen gebonden ende keerden weder tot haren heere

10

mar die kinderen van Israel daelden van bethulien ende quamen tot hem, den welcken si ontbonden, ende leyden hem tot Bethulien, ende hem int middel des volcs stellende, vraechden si hem, wat waere, ⁺ dat die Assyriers hem gebonden hadden gelaten.

+ C

11

In dien dage waren daer die princen Ozias die sone Micha, vanden geslachte Simeons Charmim die ooc Gothoniel heet,

12

Aldus seyde Achior int middel vanden ouderen, ende in dat aensichte haerder allen, alle die dinghen die hi ghesproken hadde van Holoferne gheuraecht zijnde, ende hoe dat volck Holofernis hem, om dat woort had willen

[p. Ee5r]

dooden,

13

ende hoe Holofernes selue gram was ende geboden had, datmen hem, om dier saken wil, den Israeliten soude leueren, op dat als hi die kinderen van Israel verwonne, dat hi dan ooc Achior selue met verscheyden pinen soude gebieden te verdoen, Daerom dat hi geseit had God des hemels is haer bescermer

14

Ende doent Achior altemael wt had gheseit soo viel alle tvolck op zijn aensicht den HERE aenbiddende, ⁺ ende met eender gemeynder claghe ende weeninghe, hebben si den HEERE haer ghebet wtgestort

+ D

15

seggende, HEERE God des hemels ende der aerden, aensiet haer hoouaerdicheyt, ende aenscout onse verootmoedicheyt, ende aenmerct dat aensicht uwer heyligen, ende betoont, dat ghi niet en verlaet die hen beroemen van v, ende vernedert die hen van henseluen beroemen ende van haere cracht verbliden,

16

Aldus doen dese weeninghe was voleynt, ende dat gebet des volcs al den dach door veruult was, so hebben si Achior getroost

17

seggende, onser vaderen god wiens cracht ghi vercondicht hebt, die selue sal v dese veranderinge geuen, dat ghi meer haer vernielinge sult sien,

18

Ende als die HEERE onse god zijn knechten dese vriheyt geuen sal so si God ooc met v int middel van ons, op dat ghijt alsoot v belieft met allen den uwen met ons conuerseert,

19

Ende doen Ozias den raet voleynt had, so ontfinck hi hem in zijn huys ende maecte een groot auontmael,

20

Ende hi riep alle die priesters te samen, na dat die vasten voleynt was, aten si te gader ende vermaecten hen,

21

Ende daerna is alle tvolc te samen geroepen, ende al den nacht baden si binnen der verghaderinge der gheloouighen begherende hulpe van God van Israel.

§ Hoe Holofernes Bethulien beleet heeft, ende met dorst worden die borgers benaut, ende willen de stadt opgheuen ende Ozias begeeert noch vijf dagen te beyden.