De Vorsterman Bijbel

§ Dat .iiij. Capittel

1

⁺DOen die kinderen van Israel die daer woonden inden lande van Iuda, dese dingen hoorden, vreesden si zeer voor zijn aensicht

+ A

2

Haeren sinnen quam ooc beuen ende veruaernis aen dat hi dat Ierusalem ende den temple des HEREN soude doen, dat hi den anderen steden ende haeren templen had gedaen,

3

Ende si sonden in alle Samarien rontsom tot Iericho toe, ende besloegen al die toppen der bergen,

4

ende si omcingelden haer straetkens met mueren, ende si ver-

[p. Ee4r]

gaderden coren tot bereydinghe des strijts

5

⁺Die priester Eliachim schreef ooc tot alle die daer waren teghen Esdrelon, dwelck daer is tegen dat aensicht des grooten velts bi Dothaim, ende alle den ghenen, door welc den doorghanck des weechs mocht zijn,

+ B

6

op dat si souden moghen vercrigen die opganghen der berghen, door welcke dye wech mocht zijn tot Ierusalem, ende dat zijt souden bewaren, daer eenen enghen wech tusschen die bergen mocht zijn,

7

Ende die kinderen van Israel deden na dat hen die priester des HEREN Eliachim had geset,

8

Ende al tvolc riep met grooter gestadicheyt totten HEERE, ende si verootmoedichden haer zielen in vasten ende ghebeden, si selue ende haer wiuen

9

Ende die priesters deden harige cleederen aen ende die sprakeloose kinderkens leyden si plat neder ter aerden teghen dat aensicht des tempels des HEEREN, ⁺ Ende den outaer des HEEREN bedecten si met een harighe cleet,

+ C

10

Ende riepen eenmoedelic totten HERE Israels Godt, dat haer sprakeloose kinderkens niet tot eenen roof en souden worden ghegheuen, noch haer huysurouwen tot een deelinghe, noch haer steden tot een verderuinghe, noch haer heylighe dinghen tot besmettinghe, ende dat si soo den heydenen tot een beschimpinghe werden.

11

⁺Doen omginc die groote priester des HEREN Eliachim alle Israel ende heeftse aengesproken,

+ D

12

seggende, Weet dat die HEERE v ghebeden sal verhooren, ist dat ghi volherdelic blijft in vasten, ende gebeden int aensichte des HEREN,

13

Sijt gedachtich Moysi des HEEREN knecht, ⁺ die Amalech betrouwende in zijn cracht ende moghentheyt, ende in zijn heyr, ende in zijn scilden, ende in zijn waghenen, ende in zijn reysers nederwierp, niet met yser stridende, maer met heylighe ghebeden biddende.

+ Exo. xiij.d

14

Alsoo sullen alle Israels vianden zijn, ist dat ghi volhert in dat werc, dat ghi begonst hebt,

15

Aldus tot dese zijn vermaninge, bleuen si den HERE biddende in dat aenghesicht des HEEREN,

16

Alsoo dat oock die ghene die den HEERE brantoffer offerden begordet met harighen hemden den HEERE offerhanden offerden, ende daer waren asscen op haer hoofden

17

Ende si baden alle God wt haerder geheelder herten, dat hi zijn volc Israel wilde besoecken.

§ Hoe Holofernes na tvolc van Israel vraecht, ende Achior hem antwoort dat die God des hemels dat volc bescermt.