De Vorsterman Bijbel

§ Dat .iij. Capittel.

[kolom]

1

⁺DOen sonden die coningen ende princen van allen steden ende lantscapen haer legaten te weten, ooc van Syrien ende Mesopotamien, ende Syriesobal, ende Libien, ende Cilicie, die welcke tot Holofernem quamen, ende seyden,

+ A

2

Laet v verbolgentheyt ophouden tegen ons, want tis beter dan wi den grooten coninc Nabuchodonosor leuende dienen, ende dat wi v onderdanich zijn, dan dat wi steruen met onser verderuinge, ende selue die scade ons diensts liden

3

Alle onse stadt, ende alle onse besittinge, alle bergen, ende houelen, ende velden, ende die kudde der ossen, ende der scapen, ende gheyten, ende paerden, ende kemelen, al onse ghoet ende ghesinnen zijn in uwen aensichte,

4

Laetse al onder uwe wet zijn,

5

wi ooc ende onse kinderen zijn uwe knechten,

6

Coemt ons een vreedsaem heere ende besighet onsen dienst, alsoot v behaecht.

7

⁺Doen troc Holofernes af, vanden berghen metten reysers, met grooter crachte, ende nam alle vaste stadt in, ende alle dinwoonders des landts,

+ B

8

Ende hi nam hem van allen steden hulpelike stercke mannen, ende wtgecoren totter oorloge,

9

Ende dien lantschapen viel soo grooten vreese, dat die inwoonders alle dier steden, princen ende gheeerde tsamen metten volc wtgingen, den comenden te gemoet,

10

⁺ontfangende hem met croonen ende tortsen dansende op tamboeren ende hoornen,

+ C

11

Nochtans dit doende en mochten si die wreetheyt zijns herten niet versaechten,

12

Want hi verderf haer steden, ende hieu haer boskens af,

13

Want die coninck Nabuchodonosor hadde hem geboden, dat hi al die goden des lants wt soude worpen, te wetene, op dat hi alleen God soude worden geheeten van dien natien, die midts Holofernis machticheyt mochten onder dat iock ghebrocht worden.

14

⁺Ende hi doorghaende Syrien Sobal,ende alle Appamien, ende alle Mesopotamien, quam totten Idumeen, int landt Gabaa,

+ D

15

Septopoli, ende nam haer steden, ende sadt daer .xxx dagen, in den welcken dagen hi geboot alle theyr zijnder cracht verghadert te worden.

§ Hoe die kinderen van Israel haer lant bestelden, om Holoferni te wederstaen.