De Vorsterman Bijbel

§ Dat .ij. Capittel.

1

⁺INden .xiij. iaer Nabuchodonosor des conincs, den .xxij. dach der eerster maent, so isser een woort gheschiet inden huyse Nabuchodonosor des conincs van Assyrien, dat hi hem soude beschermen,

+ A

2

Ende hi riep alle die meeste van ghebuerte, ende alle zijn hertogen, ende campuechters, ende hi had met

[p. Ee3v]

hen die verholentheyt zijns raets,

3

Ende hi seyde, dat zijn gedachte daer inne was, dat hi alle daertrijck onder zijn heerscappie soude brengen,

4

Doen hi dit geseyt hadde, ende het allen behaechde, soo riep Nabuchodonosor die coninc, Holofernem den prince zijns heyrs,

5

⁺ende hi seyde hem, Gaet wt tegen alle rijck van Westen, ende sonderlinge tegen die gene die mijn gebot versmaet hebben,

+ B

6

V ooge en sal gheen rijck sparen, ende ghi sult mi, alle vaste stadt onder mijn iock brenghen.

7

Doen riep Holofernes, die princen ende meesterschappen der cracht der Assyrien, ende hi telde die mannen, tot der heyruaert ghelijc hem die coninc beuolen hadde, hondert ende twintich duysent strijtbaer voetknechten, ende twaelf duysent schutters te paerde,

8

⁺Ende hi dede alle zijn heyruaert voorghaen in menichte der ontallijcker kemelen met die dinghen die den heyrscharen oueruloedelijck genoech waren, ooc kudden der ossen, ende kudden der schapen, dier gheen getal en was.

+ C

9

Ende hi beual tcoren van allen Syrien te bereyden in sinen doorghanc,

10

Ende hi nam met hem wter maten veel gouts ende siluers, van des conincs huys,

11

Ende hi is ghereyst, ende alle theyr, met waghenen ende reysers, ende schutters, die daenschijn der aerden bedecten als sprinchanen,

12

Ende doen hi die eynden van Assyrien door was gegaen, so quam hi totten grooten berghen Ange, die aldaer zijn ter slincker siden van Cilicien, ende hi clam op alle haer casteelen, ende creech alle vaste besette plaetsen,

13

Ende hi brack die alder vernaemste stadt Melothi, ende hi beroofde alle die kinderen van Tharsis, ende die kinderen van Ismael die daer waren teghen dat aenschijn der woestinen, ende zuydtwaerts des lants Cheleon,

14

⁺Ende doorghinc Euphraten, ende quam in Mesopotamien, ende brac alle hooge steden, die daer waren vander beken Mambre, tot datmen coemt totter zee,

+ D

15

ende hi besette haer palen, van Cilicien totten eynden Iaphet, die zuytwaert zijn,

16

Ende hi leyde wech alle die kinderen Madian, ende hi beroofde alle haer rijcdom, ende alle die hem wederstonden versloech hi metten scerpten des swaerts

17

Ende na dese dingen trock hi af, op die velden Damasci, inden tijt des oogsts, ende hi aenstac al dat staende coren, ende alle boomen, ende hi dede afsniden die wijngaerden,

18

Ende zijn vreese viel ouer alle die opter aerden woonende waren

§ Hoe die steden henseluen Holoferni ouer ghauen, van denwelcken hi hulpers nam, ende nochtans alle die steden omwierp daer hi in quam