De Vorsterman Bijbel

§ Dat .xiiij. Capittel.

1

⁺ENde die redenen Tobie zijn voleynt, Ende na dat Tobias weder siende was gheworden, leefde hi .xlij. iaer, ende hi sach die kinderen ^* der kinderen zijns soons)

+ A

* zijnder rechter neuen kinderen

2

Ende doen .c. ende .ij. iaren veruult waren, is hi eerlic begrauen tot Niniue,

3

wanthi was .lvi. iaer out, doen hi tlicht zijnder oogen verlore, ende tot sinen .lx. iaren ontfinck hijt weder.

4

Maer den anderen tijt zijns leuens was hi in bliscap, ende met goede vorderinge der vreesen Gods, is hi gereyst in vrede,

5

Maer inder vren zijnder doot, heuet hi Tobiam sinen sone tot hem geroepen, ende vij. iongen, sine sonen, zijn neefkens, ende hi seyde hen,

6

⁺Die verderuinge van Niniue is nabi want dat woort des HEREN en is niet veruallen, ende onse broeders die verstroyt zijn vanden lande van Isrsael, die sullen daer weder toecomen,

+ B

7

Ende al haer woeste lant sal veruult worden, ende thuys Gods dat daer in aen is gesteken sal weder getimmert worden, ende daer sullen weder keeren alle die God vreesen,

8

ende die heydenen sullen haer afgoden verlaten, ende si sullen te Ierusalem comen, ende daer in woonen,

9

ende alle die coningen der aerden sullen hen in haer verblijden, aenbiddende Israels God,

10

Hierom mijn sonen, hoort uwen vader, Dient den HEERE inder waerheyt ende ondersoect, dat ghi tgene doet, dat hem behagelic is,

11

beueelt uwen kindren, dat si gerechticheden ende aelmoesen doen, ⁺ dat si Gods gedencken, ⁺ ende hem gebenedien in alre tijt, inder waerheyt, ende in al haerder cracht,

+ C

+ Iosue. xxiiij.c.

12

Nv hier om ghi sonen, hoort mi, ende en wilt hier niet bliuen, Maer in sowelcken dage ghi v moeder sult begrauen hebben bi mi in een graf so rechtet v gangen, dat ghi van hier gaet,

13

Want ic sie, dat haer ongherechticheyt hen een eynde sal geuen.

14

Ende tis gheschiet na die doot zijnder moeder, dat Tobias van Niniue is gescheyden met zijn huysfrou, ende kinderen, ⁺ ende met zijnder kinder kinderen,

+ D

15

ende keerde weder tot zijns wijfs ouders, ende hi vantse gesont in goeden ouderdom, ende hi droech haerder sorghe, ende hi sloot haer ooghen, ende hi ontfinck Raguels erffenisse, ende hi sach dat vijfste geslachte, ende die kinderen zijnder kindren,

16

Ende .xcix. iaer veruult hebbende inder vreesen des HEEREN, heeft hem alle zijn maechscap met blischapen begrauen,

17

Ende al zijn geslacht bleef in goeden leuen, ende in heylighe wandelinge, also dat si also wel Gode, als den menschen aengenaem waren, ende allen den ghenen die daer woonden opter aerden.

§ Hier eyndt dat boec Tobie.