De Vorsterman Bijbel

§ Dat .xiij. Capittel.

1

⁺ENde die oude Tobias dede sinen mont open, ende gebenedijde den HERE, ende seyde, ⁺ HERE, ghi zijt groot inder eewicheyt, ende v rijck is vander eender tijt totten anderen,

+ A

+ i.Reg. ij.a. Sa. xvi.b.

2

want ghi geesselt ende behout, ghi leyt ter hellen, ende leyt daer weder wt, ende daer en is niemant die v hant ontulie.

3

Belijt den HERE ghi kinderen van Israel, ende louet hem in die te-[kolom]ghenwoordicheyt der Heydenen,

4

daer om heeft hi v verstroeyt onder die heydenen, die hem niet en kennen, dat ghi sine wonderlijke daden sout vercondigen, ende hen doen weten, datter gheen ander almachtich God en is, dan hi

5

⁺Hi heeft ons gecastijt om onse ongerechticheden, ende hi sal ons behouden om sine ontfermherticheyt,

+ B

6

Daerom aensiet die dinghen, die hi met v ghedaen heeft, ende belijt hem met vreesen, ende beuen, ende verheft den Coninck der werelden in uwen wercken.

7

Maer ick sal hem belijden inden lande mijnder geuanckenissen, want hi heeft sine grootheyt ghethoont in dat sondighe volck,

8

Hierom ghi sondaers wort bekeert, ende doet rechtuaerdicheyt voor Gode, gheloouende dat hi zijn ontfermherticheyt met v doen sal.

9

Maer ick ende mijn ziele sullen ons in God verblijden,

10

Gebenedijt den HEERE alle zijn wtuercorene, Hout daghen der blijscapen, ende belijt hem.

11

⁺Ierusalem stadt Gods die HERE heeft v ghecastijt inden wercken uwer handen,

+ C

12

Belijdet den HERE in uwen goeden, ende gebenedijt God der tijden, op dat hi sine wooninghe weder in v tymmere, ende dat hi alle die geuangen weder tot v roepe, ende dat ghi muecht verblijden eewelijc ende ymmermeer,

13

Ghi sult met eenen schijnenden licht blincken ende alle eynden der aerden sullen v aenbeden.

14

Daer sullen gheslachten van verre tot v comen, ende si sullen v gauen brenghen, ende sullen den HERE in v aenbeden, Ende si sullen uwe lant voor heylichmakinge houden,

15

want si sullen den grooten naem in v aenroepen,

16

ende si sullen vermaledijt zijn die v versmaden, ende si sullen al verdoemt zijn, die v lachteren, ende si sullen gebenedijt zijn die v tymmeren.

17

Maer ghi sult v verblijden in v kinderen, want si sullen al ghebenedijt worden, ende totten HERE vergadert worden,

18

⁺Salich zijn si, alle die v liefhebben, ende die hen verblijden ouer uwen vrede,

+ D

19

Mijn ziele ghebenedijt den HERE, want die HERE onse God heeft Ierusalem zijn stadt van allen haeren drucke verlost,

20

Ick sal salich zijn, ist dat die ouerblijuingen mijns zaets zijn om te sien die claerheyt van Ierusalem,

21

Die poorten van Ierusalem sullen van Saphyren ende Smaragden worden getymmert, ende al den omganck haerder mueren van costelijken ghesteente,

22

Alle haer straten sullen met witten blinckenden ende reynen steenen worden gheplaueyt, ende door haer straetkens sal ^* Alleluya) gesongen worden.

* Louet den HERE.

23

Ghebenedijt si die HERE diese verheuen heeft, dat zijn rijc si eewelijc, ende ymmermeer ouer haer, Amen.

[p. Ee3r]

§ Hoe lange dat Tobias leuede.