De Vorsterman Bijbel

§ Dat .x. Capittel.

1

⁺ENde doen Tobias vertoefde, om der bruyloften wil, soo was zijn vader Tobias sorchfuldich, segghende, Waeromme meynt ghi, dat mijn sone vertoeft, oft waerom is hi daer gehouden?

+ A

2

En meynt ghi niet dat Gabelus doot si, ende dat hem niemandt tgelt weder en sal geuen?

3

Ende hi selue begonste zeer droeue te worden, ende Anna zijn huysurouwe met hem, Ende si beghonsten beyde tsamen te weenen, om dat haer sone opten ghesetten dach niet weder en keerde tot hen.

4

Sijn moeder weende met ontroosteliken tranen, ende seyde, ⁺ Wee mi mijn sone, waerom hebben wi v inden vremden landen laten reysen, ghi licht onser ooghen, ende stoc ons ouderdoms, ghi troost ons leuens, ghi hope ons nacomenden gheslachts?

+ B

5

Alle dingen in v eene hebbende, en souden v nyet van ons hebben laten gaen,

6

Tobias seyde tot haer, Swijcht, ende en wilt niet ghestoort worden, onse sone is gesont, Die man is getrou ghenoech, daer wi hem mede ghesonden hebben,

7

Maer si en mocht in geender manieren ghetroost worden, maer si ghinc daghelijcs wt, ende sach al om, ende omme ginck alle die weghen, waer dore hope des wedercomens was, ⁺ op dat sy hem (waert moghelijck) van verre mochte sien.

+ C

8

Ende Raguel seyde tot zijnen behouden sone, Blijft hier, ende ic sal eenen bode der

[p. Ee2r]

weluaert van v tot Tobiam uwen vader seynden,

9

Tot welcken Tobias sprack, Ick weet dat mijn vader ende mijn moeder nv die daghen tellen, ende hueren gheest wort in hen seluen ghedruct,

10

Ende als Raguel Tobiam met veel woorden badt, ende hi hem gheensins en wilde hooren, so leuerde hi hem Saram ouer, ende die helft zijns goets aen knechten, aen dienstmaechden, aen beesten, aen kemelen ende coeyen, ende veel gelts, ende liet hem weluarende, ende vrolijck van hem,

11

seggende ⁺ Die heylighe Enghel des HEEREN si in uwen wech, ende brenghe v ghesont, ende dat ghi alle dinghen recht bi v ouders moet vinden, ende mijn ooghen moeten v kinderen sien, eer ick sterue,

+ D

12

Ende die ouders grepen haer dochter, ende custense, ende lietense gaen,

13

haer vermanende ter eeren haers mans ouders haeren man lief te hebben, haer ghesinne te regeren, dat huys te bestieren, ende haer seluen onberispelijck te houden.

§ Hoe Tobias weder quam tot sinen ouders, ende sinen vader maecte siende, doort ingheuen van Raphael.