De Vorsterman Bijbel

§ Dat .ix. Capittel.

1

⁺DOen riep Tobias den engel tot hem, den welcken hi meynde eenen mensch te wesen, ende seyde hem, Azaria broeder, ic begere dat ghi mijn woorden hoort,

+ A

2

Al ghaue ic mi seluen v tot eenen knecht ouer, ick en soude uwer voorsienicheyt nyet waerdich zijn,

3

⁺Nochtans bid ic v, dat ghi voor v neemt de dieren oft die diensten, ende dat ghi ghaet tot Gabelum in Rages der Meden stadt, ende geeft hem zijn hantscrift weder, ende ontfangt tghelt van hem, ende dat ghi hem bidt tot mijnder bruiloften te comene,

+ B

4

Want ghi weet selue wel, dat mijn vadere die daghen telt, ende ist dat ic eenen dach langer vertoeue, soo is zijn ziele bedroeft,

5

Ende sekerlijc ghi siet, hoe mi Raguel besworen heeft, wiens besweringhe ic niet en mach versmaden.

6

⁺Doen nam Raphael tot hem vier van Raguels knechten, ende twee kemelen, ende reysde tot Rages der Meden stadt, Ende Ga-[kolom]belum vindende, gaf hi hem zijn hantscrift, ende ontfinc alle dat ghelt,

+ C

7

Ende hi gaf hem te kennen van Tobia, den sone Tobie, alle die dinghen die ghedaen waren, ende hi dede hem met hem ter bruyloft comen,

8

Ende doen hi in was gegaen in Raguels huys, so vant hi Tobiam ter tafelen sitten, ende hi spranc op, ende si custen malcanderen, Ende Gabelus weende, ende hi gebenedide God,

9

ende sprac Die HEERE Israels God ghebenedie v, ⁺ Want ghi zijt een sone des alder besten ende rechtuaerdighen, ende God vreesenden mans, ende des die aelmoesen doet,

+ D

10

ende die gebenedijnge worde geseyt ouer v huysfrouwe, ende ouer v ouders,

11

ende dat ghi moecht sien v kinderen, ende die kinderen uwer kinderen, totter derder ende vierder gheboorten toe, ende v zaet si gebenedijt van Israels God die regneert inder eewicheyt,

12

Ende als si alle Amen hadden gheseyt, soo gingen si totter maeltijt, Maer si oefenden die maeltijt der bruyloft oock metter vreesen Goods.

§ Hoe doude Tobias ende Anna bedroeft waren, dat die ionge Tobias zijn toecoemste vertrect, ende hi coemt met zijnder huysfrouwe.