De Vorsterman Bijbel

§ Dat .xi. Capittel.

1

⁺ENde als si weder keerden, quamen si opten elfsten dach te Charram, die inden haluen weghe teghen Niniue is,

+ A

2

Ende die Enghel seyde, Tobia broeder, ghi weet hoe ghi uwen vader ghelaten hebt,

3

daerom ist dat v behaecht, so laet ons voorgaen, ende dat ghesinne met uwer huysvrouwen ende dyeren, laetse onsen wech met langsamen ganck nauolghen,

4

Ende doen hem dat behaechde, dat si ghinghen, so seyde Raphael tot Tobiam, Neemt met v vander gallen des vischs, want si sal van noode zijn, Tobias nam van dier gallen, ende si ghinghen wech,

5

Maer Anna sadt daghelijcs biden weghe opter hoochten des berghes, daer van si van verre mocht sien,

6

Ende als si zijn toecoemst verwachtede vander seluer plaetsen, so sach si van verre, ende terstont bekende si haeren sone comende, ende si liep, ende bootscaptet haeren manne, segghende, Siet v sone comet.

7

⁺Ende Raphael seyde tot Tobiam, Als ghi in v huys sult comen, so aenbidt terstont den HEERE uwen God, ende hem louende, gaet tot uwen vader, ende cust hem,

+ B

8

ende terstont smeert op sinen ooghen vander gallen des vischs, die ghi met v draecht, Want weet dat zijn ooghen terstont open sullen worden gedaen, ende v vader sal dat licht des hemels sien, ende hi sal hem in v aensien verblijden,

9

Doen liep den hont voor die mede inden wech was, ende als een bode toecomende verblijde hi hem metten wispelen zijns steerts,

10

Ende zijn blin-[kolom]de vader mede opstaende begonst, zijn voeten stootende te loopen, ende den knape die hant gegeuen hebbende, liep hi sinen sone te gemoet,

11

Ende hem ontfangende, heeft hi hem gecust met zijnder huysvrouwen, ende si begonsten te weenen van blijscapen.

12

Ende als si God aenghebedet, ende danc geseyt hadden, zijn si geseten.

13

⁺Doen nam Tobias vander gallen des vischs, ende smeerde die oogen zijns vaders,

+ C

14

Ende hi leet bi na een half vre, ende een wit schelleken als het velleken eens eys beghonst van zijn ooghen te gaen,

15

ende terstont ontfinck hi tghesichte,

16

ende si presen God, te weten, hi ende zijn huysvrouwe, Ende alle die hem kenden,

17

Ende Tobias seyde, Ick ghebenedije v HERE Israels God, want ghi hebbet mi ghecastijt, ende ghi hebtmi ghenesen, Ende siet, ick sie Tobiam minen sone.

18

Ende na seuen daghen is Sara zijns soons huysvrouwe oock inghecomen, ⁺ ende alle dat ghesin, ende beesten ghesont, ende die kemelen, ende veel gelts der huysvrouwen, ende oock dat gelt dat hi van Gabelo ontfangen hadde,

+ D

19

Ende hi vertelde zijn ouders alle die weldaden Gods, die hi bi hem ghedaen hadde door den mensche die hem gheleyt hadde,

20

Ende Achior, ende Nabath Tobie suster sonen, quamen verblijdende tot Tobiam, met hem vrolijck zijnde van allen dien goeden, die God bi hem ghethoont hadde,

21

Ende alle seuen daghen brassende zijn si alle met grooter blijscapen verblijt

§ Hoe Tobias ende zijn sone wouden dat halue deel haers goets Raphael gheuen, ende hoe die Engel hem openbaerde ende van hen scheyde.