De Vorsterman Bijbel

§ Dat .xv. Capittel.

1

⁺SIet spreect inden ooren mijns volcs, dye redene der prophetien, welke ic in uwen mont sal seynden, seyt die HEERE,

+ A

2

ende doet dat si in eenen brief gescreuen worden, want si zijn ghetrowe ende waractich,

3

En vreest niet vanden gedachten tegen v, noch die ongelouicheden der seggender, en laet v niet verscricken,

4

want alle ongelouige sal in zijn ongelouicheyt steruen,

5

Siet ic brenge ouer dat aertrijck, seyt die HERE, quade dingen, tsweerde ende honger, ende de doot ende die verderffenisse,

6

Daerom heeft dye boosheyt ouer beulect alle dye aerde, ende haer scadelike wercken zijn veruult,

7

daerom seyt die HEERE,

8

Nv en sal ic niet swigen van hueren ongodlicheden, welcke si ongeestelic doen, noch ic en sal niet verdraghen in desen, die welcke si ongerechtelic oeffenen, Siet dat onsculdighe ende droeue bloet roept tot mi ende der rechtuerdiger sielen roepen volherdelic,

9

Wrekende sal ic die wreken, seyt de HERE, ende ic sal alle onsculdighe bloet wt hen tot my nemen,

10

Siet mijn volc wort als een cudde totter doodinge geleyt, ⁺ nv en sal ic niet lijden dattet in Egypten woone,

+ Apoc. vi.d ende. ix.a

11

mer ic salt wtleyden in een machtige hant, ende eenen hoogen arme, ende ic sal metter plagen slaen ghelijc te voren, ende ic sal alle zijn landt scheynden,

12

Egypten sal weenen, ende zijn fundamenten metter plagen geslagen ende metter castidinge welcke hem God sal toe brengen,

13

Die winnaers die dat lant wercken sullen weenen, want haer zaden sullen ontbreken vanden brandenden winden, ende vanden hagel, ende van een veruaerlike gesterre,

14

Wee der werelt, ende die daer in wonen,

15

want het zweert is genaect, ende huer vernielinge, ende deen volc sal tegen dandere volc opstaen totten stride, ende een sweerdt in hueren handen,

16

Want die menichten sullen onstantachtich zijn, ende deen den anderen te machtich wordende, en sullen si hueren Coninck ende Prince niet achten, die weghen huerder daden in huere moghentheden.

17

⁺Een mensche sal in die stat begeren te gaen ende en sal niet mogen,

+ B

18

Want om huere houeerdicheyt sullen die steden verstoort worden, die husen sullen verscricket worden, dye menscen sullen vreesen

19

Die mensce en sal sinen naesten niet ontfermen, om te vernielen, huere huysen totten zweerde, om te roouen huer goeden, om den honger des broots, ende grooten druc

20

Siet, ic roepe tsamen seyt God, alle coningen

[p. Dd5r]

der aerden, om mi te ontsiene, die vant oosten zijn, ende vant zuyden, vanden noorden, ende van Libano om tot hen te bekeeren, ende weder te gheuen, welcke si hen ghegheuen hebben,

21

ghelijck si tot heden toe minen wtuercoren doen, also sal ic doen, ende weder geuen in haeren schoot, Dit seyt die HEERE God

22

Mine rechter handt en sal nyet sparen ouer die sondaers, noch dat swaert en sal niet ophouden, vanden ghenen die onsculdich bloet storten opter aerden,

23

Het vier is wt gegaen van zijnder gramschappen, ende heeft dye fundamenten der aerden verslint, ende dye sondaers ghelijc ontsteken stroo.

24

Wee hen die sondighen, ende en houden mijn gheboden niet, seyt die HEERE,

25

Ick en salse niet sparen, kinderen gaet wech vander macht, En willet mijne heylichmakinghe nyet besmetten,

26

want die HEERE kentse alle dye teghen hem sondighen, Daerom heeft hyse in die doot gheleuert, ende in die doodinge,

27

Want nv zijn dye quade dinghen ouer dat aertrijcke ghecomen, ende ghy sult daer in bliuen, Want Godt en sal v niet verlossen, om dat ghi teghen hem ghesondicht hebt.

28

Siet, een veruaerlijck ghesichte, ende dies aensichte vant oosten,

29

Ende die gheslachten der draken der Arabien, sullen wtgaen in vele waghenen, ende ghelijck blasinghe werdt haer ghetal opter aerden ghedragen, op dat alle Carmonien rasende in gramschappen vreesen ende beuen, diese hooren,

30

ende als wilde beeren wt den bosschen, sullen si wtghaen, ende sullen toecomen in groter cracht ende si sullen met hen inden strijdt staen, ende si sullen verwoesten dat deel des lants der Assyrien.

31

Ende hier na sullen dye draken douerhant nemen, ghedachtich haerder gheboorten, ende si sullen hen omkeeren in tsamen verbindinghe, met grooter crachte, om die te veruolghen,

32

Dese sullen verstoort worden ende sullen swijghen, ende si sullen haer voeten ter vlucht keeren,

33

ende die ondersitter vander Assirien voorlandekens salse beleggen, ende sal een van dien verslinden, ende in haer heyr sal vreese ende beuinghe zijn, ende stridinge tegen haer coninghen,

34

Siet veel wolcken vanden oosten, ⁺ ende vanden noorden, totten zuyden, ende haer aensicht zeer afgriselic, vol gramscappen ende onweders,

+ C

35

ende si sullen tsamen stooten ende si sullen een oueruloedighe ghesterte opter aerden, ende haer ghesterte tsamen stoten Ende dbloet sal zijn vanden sweerde totten buyc toe,

36

ende des menschen roocke tot des kemels [kolom] stroysele, ende daer sal groote beuinghe ende vreese opter aerden zijn,

37

ende si sullen vereysen die die gramschap sullen sien, ende beuinge salse beuaen, ende oueruloedige dicke wolcken, met reghene,

38

vanden zuyden ende noorden ende dat ander deel vant westen,

39

ende die winden sullen douerhant nemen vanden oosten, ende si sullense weder besluyten, ende die wolcke die hi in gramscap verwecte, ende dat ghesterte, om eene verscrickinghe te maken, ten oosten winde, ende ten westen salt gesceynt worden,

40

ende groote ende machtige wolcken vol gramscappen, ende tgesterte, sullen verhoocht worden, op dat si alle die aerde, ende die daer in woonen verscricken, ende si sullen instorten ouer alle hoghe, ende hooch wtscinende plaetse een eyselijcke ghesterte,

41

vier ende hagel, ende vliegende swaerden, ende vele wateren, also dat ooc alle velden veruult sullen worden, ende alle riuieren met veelheit der wateren,

42

ende si sullen steden ende mueren ende bergen ende houelen, ende houten der bosschen, ende thoy der beemden, ende haer coren bederuen,

43

Ende si sullen stantachich door gaen tot Babilonien toe, si sullense verscricken,

44

si sullen tot die selue tsamen comen, ende si sullense omgaen, ende si sullen tgesterte ende alle gramschap ouer haer wtstorten, ende tstof ende den rooc sal van onder opgaen, totten hemel toe, ende al die rontsomme ligghen, sullense beweenen,

45

ende die onder haer ouer bliuen, sullen den ghenen dienen, diese veruaert hebben.

46

Ende ghi Asia eendrachtich inder hopen van Babilonien, ende inder eeren haers persoons

47

Wee v ghi katiuighe, om dat ghi v haer gelijck hebt ghemaect, ende verciert hebt uwe dochteren in oncuysheden, om te behaghen ende te verbliden in v minnaers, dye altijt begeert hebben met v te hoereren.

48

⁺Ghi zijt die hatelike na geuolcht in allen haer wercken, ende haer vonden, daerom seit God,

+ D

49

Ic sal v quade dinghen inseynden, weduschap armoede, ende honger, ende tswaert, ende die pestilencie, om uwe huysen woest te maken, vander scheindinge, ende vander doot, ende die heerlicheit uwer cracht sal

50

ghelijck een bloeme verdroocht worden, als die hitte op sal gaen, die ouer v gesonden is.

51

Ghi sult cranck worden, gelijc als een arme vrouken, gheslagen ende ghecastijt vanden vrouwen, alsoo dat die machtighe ende minnaers v niet en sullen moghen ontfaen,

52

Ende en sal ick v also niet wantrouwelijck lief hebben, seydt dye HEERE?

53

Het en waer dat ghy mijn wtuercorenen haddet gedoot in alre tijt, verhoo-

[p. Dd5v]

ghende die slaginghe der handen, ende gheseit ouer haer doot, als ghi droncken waert,

54

vercierde ghi die ghedaente ws aenscijns?

55

Den loon uwer oncuysheyt in uwen schoot, daer om suldy betalinghe ontfaen.

56

Ghelijc ghi minen wtuercorenen sult doen, seyt dye HEERE, alsoo sal v Godt doen, ende sal v int quaet leueren.

57

Ende v kinderen sullen van hongher steruen, ende ghi sult midts den swaerde vallen, ende uwe steden sullen vernielt worden, ende alle die uwe sullen midts den swaerde int velt vallen.

58

Ende die in dye berghen zijn, sullen van hongher steruen, ende sullen haer vleesche eten, ende bloedt drincken, van hongher des broots, ende dorste des waters.

59

Ghi onsalighe sult door die zeen comen, ende sult weder quade dinghen ontfaen,

60

Ende inden door ghanc sullen si die ghedoode stadt gheweldelijc teghen een horten, ende si sullen eenich deel ws lants verwinnen, ende dat deel uwer eeren sullen si vernielen, Voort aen dye weder ghekeerde, wederkeerende,

61

Ende als ghi verdoruen zijt sult ghi hen voor stoppelen wesen, ende si sullen v voor vier wesen,

62

ende si sullen v verslinden, ende v steden, v lant, ende v berghen, alle uwe bosschagien, ende dat vrucht draghende hout, sullen si met vier verbranden.

63

Si sullen v sonen gheuanghen leyden, ende si sullen uwen tzijns tot eenen roof hebben, ende si sullen die heerlicheit ws aenscijns vernielen.

§ Hoe Esdras die prophete den boosen volcke Godt nyet vresende, vercondichde dat groote toecomende quaet, hongher, ende oorloghe, ende den thoorn Gods.