De Vorsterman Bijbel

§ Dat .xvi. Capittel.

1

⁺WEe v Babilonien ende Asia, wee v Egipten, ende Syrien.

+ A

2

Omgordet v met sacken, ende harighe hemden, ende bescreyt v kinderen, ende hebt smerte, want uwe vernielinghe is ghenaect,

3

Het swaert is onder v ghesonden, ende wie is dat diet afkeren sal?

4

Het vier is in v ghesonden, ende wie ist diet wtblusschen sal?

5

V zijn quade dinghen toe ghesonden, ende wie ist diese verdriuen sal?

6

Sal ooc yemant veriaghen den hongerigen leeu int bossche? oft sal wt blusschen dat vier in die stoppele, terstont ast begint te branden?

7

Sal ooc yemant dat ghescut van eenen stercken scutter gheschoten veriaghen?

8

Die stercke HEERE seynt quaet toe, ende wie ist, diet verdriuen sal?

9

Daer is vier wt zijnder gramschappen ghegaen, ende wie ist diet wtblusschen sal?

10

Hi sal blixemen, ende wie en sal niet vreesen? Hi sal donderen, ende wie en sal niet scroomen?

11

Die HEERE sal dreyghen, [kolom] ende wie en sal niet grondelijc te stucken gewreuen worden van sinen aensichte?

12

Die aerde beefde, ende haer fundamenten, die zee vloeyt vander diepten, ende haer vloeden sullen verstoort worden, ende haer visschen vanden aensichte des HEEREN, ende vander heerlicheit zijnre cracht,

13

want zijn rechte hant is stercke, die den boghe spant, zijn pilen scarp, die van hem gheschoten worden, en sullen niet ontbreken als si beghinnen geschoten te worden in die eynden der aerden,

14

Siet die quade dinghen worden ghesonden, ende en sullen niet wederkeeren tot datsi op die aerde comen.

15

Het vier wort ontfunct, ende ten sal niet wtgheblust worden tot dattet die fundamenten der aerden verslindt heeft

16

Ghelijck als tghescutte gheschoten van eenen vromen schutter nyet weder en keert, alsoo en sullen nyet weder keeren dye quade dinghen die welcke opter aerden ghesonden sullen zijn.

17

Wee my, wee mi, wie sal my verlossen in dien daghen.

18

Dat beghinsel der smerten ende veelder suchtinghen, dat beghinsel des honghers ende veels vernielinghens, Dat beghinsel der oorloghen, ende die machtighe sullen scroomen, dat beghinsel der quader dinghen,

19

ende si sullen alle beuen. Wat sal ic in desen doen, als die quade dingen comen?

20

Siet hongher ende plaghe, ende lijden, ende banghicheden ghesonden, zijn geesselen ter beteringhe,

21

ende in allen desen en sullen si niet bekeeren van haeren ongherechticheden noch si en sullen der gheesselen altoos nyet ghedachtich zijn,

22

⁺Siet den lijfcost sal goede coop zijn opter aerden, also dat si sullen meynen, dat hen den vrede ghesonden si, ende dan sullen die quade dinghen groeyen opter aerden, dat swaert, hongher, ende grote bescaemtheyt,

+ B

23

Want daer salder vele die de aerde bewoonen, van hongher verghaen, ende dat swaert sal die andere verdoen die ouer blijuen vanden honghere,

24

ende die dooden sullen als vuylnisse wech gheworpen worden, ende daer en sal niemant zijn diese vertrooste Want die aerde die sal woest gelaten worden

25

ende haere steden sullen af gheworpen worden, ende daer en sal niemant achter gelaten worden die die aerde winne, oft diese bezaeye

26

Die houten sullen vruchten gheuen, ende wye salse af plucken, ende vergaderen?

27

Die wijndruyue sal rijpe worden, ende wie sal dien treden? want den plaetsen sal grote verlatinge zijn,

28

Die mensche sal eenen mensche begheren te sien, oft zijn stemme te hooren,

29

Want

[p. Dd6r]

daer salder thien achter ghelaten worden vander stat, ende twee vanden acker, die hen gheborghen sullen hebben inden dicken bosschen, ende in die spleten der herder steenen,

30

gelikerwijs als achtergelaten worden inden olijfboomgaert, ende in elcken boom drie oft vier oliuen,

31

oft ghelijc inden afgelesenen wijngaert, wijndruyuen worden gelaten vanden ghenen die den wijngaert naerstelijc doorsoecken,

32

also sullender in die daghen drie oft vier gelaten worden den gheenen, die haer huysen doorsoecken mettten zweerde.

33

Ende die aerde sal woest ghelaten worden, ende haer ackers sullen verouden, ende haer weghen, ende alle haer paden sullen doornen voort brenghen, om datter gheen menschen ouer en sullen gaen.

34

Die maechden sullen weenen gheen bruyghommen hebbende, dye wiuen sullen weenen geen mans hebbende, haer dochteren sullen weenen geen hulpe haers bruygoms hebbende,

35

In die oorloge sullen si verslindt worden, ende haer mans sullen in honger verghaen.

36

Hieromme hoort dese dinghen, ende bekentse ghi knechten des HEREN,

37

Siet dat woort des HEEREN, ontfanghet dat, op dat ghy den goden nyet en ghelooft, vanden welcken die HERE seyt.

38

⁺Siet die quade dinghen ghenaken, ende en vertraghen niet.

+ C

39

Ghelijck een beuruchte vrouwe als si in die neghenste maent haeren sone baert, als nv dye vre haerder baringen ghenaket, twee ofte drie vren te voren, weedommen haeren buyck omme ghaen, ende als dat kindt voort coemt van haeren buycke, dan niet eenen oogenblic en vertoeuen,

40

alsoo en sullen dye quade dinghen nyet eenen ooghenblicke verthoeuen om voort te comen ouer dye aerde, ende dye werelt sal suchten, ende weedommen sullense alomme houden.

41

Hoordt dat woordt mijn volck, bereyt v totten crijghe, ende totten quaden, zijt ghelijck als vremdelinghen opter aerden,

42

Dye vercoopt si als dye vluchtet, ende die coopt als dye verliesen sal,

43

Die comenschapt, als die gheen vruchte en ontfanghet, ende dye timmert, als diet niet bewoonen en sal,

44

Die zaeyet, als dye dat nyet maeyen en sal. Also oock, die den wijnghaert snoeyet, als dyes niet af lesen en sal,

45

Die trouwen als die ghene kinderen winnen en sullen, ende die nyet en trouwen, so als weduwers,

46

Waerom die arbeiden, die arbeiden sonder zake,

47

Want die vremde gheborene sullen haer vruchten maeyen ende sullen haer goet roouen, ende die huy-[kolom]sen ommekeeren, ende haer sonen sullen si vanghen, want inder gheuanghenisse, ende in honghere winnen si haer kinderen,

48

Ende die comenschappen inden rooue, hoe lange vercieren si haer steden, ende haer huysen, ende haer besittinghen, ende haer personen,

49

alsoo vele te meer sal ick hen wantrouwen, de beniden ouer haer sonden, seyt die HEERE,

50

Ghelijc een hoere wantrouwende benidet een bequame ende zeer goede vrouwe,

51

alsoo sal dye rechtuaerdicheyt dye onrechtuaerdicheyt wantrouwenende beniden, als si haer verciert, ende beschuldichtse int aensichte, als hy coemt, dye verantwoorden sal den versoeckende alle zonde opter aerden.

52

Hieromme en wilt dien niet ghelijc worden, noch sinen wercken,

53

want noch een weinichsken, ende die ongerechticheit sal vander aerden worden ghenomen, ende die gherechticheyt sal in v regneeren,

54

Die sondaer en segge niet, dat hi niet ghezondicht hebbe, want hi sal colen viers op sine hooft verbranden, die seyt, Ick en hebbe niet ghezondicht voor den HEERE God, ende zijn heerlicheyt,

55

Siet, dye HEERE sal alle der menschen wercken, ende haere vonden, ende haere herten bekennen,

56

Want hi seyde, Die aerde worde, ende si is ghemaeckt, Den hemel worde, ende hy is ghemaeckt,

57

Ende in sinen woorde zijn dye sterren ghefundeert, ende hy weet der sterren ghetal,

58

Die dye afgronden ende haere schatten ondersoeckt, die die zee ghemeten heeft, ende haer begrijp.

59

Dye die zee int middel der wateren heeft besloten, ende dye aerde op die wateren ghehanghen met sinen woorde.

60

Dye den hemel recket als een camere ouer die wateren, hy heeft dien ghefundeert.

61

Die in dye woestine water fonteynen heuet gheset, ende op dye toppen der berghen cuylen, om dye stroomen wt te laeten, vanden hooch wtschijnenden steene, op dat hy dye aerde nat soude maken.

62

⁺Die den mensche schiep, ende sette zijn herte int middel des lichaems, ende seynde hem gheest, leuen, ende verstandenisse,

+ D

63

ende den ademtocht des almachtighen Gods, die alle dingen ghemaect heeft, ende ondersoect alle verborghen dinghen, in die verborgentheden der aerden,

64

dese weet uwen vont, ende dwelc ghi denct in uwe herten sondighende ende willende v sonden verbergen.

65

Waeromme die HEERE alle uwer wercken ondersoeckende heeft ondersocht, ende hy sal v al-

[p. Dd6v]

le betijen,

66

ende ghi sult beschamet zijn, als v zonden te voorschijn comen voor die menschen ende die ongerechticheden sullent zijn, die als besculdigers sullen staen in dien dage.

67

Wat sult ghi doen, oft hoe sult ghi v sonden verbergen voor God ende sine enghelen?

68

Siet, god is die rechter, vreest hem. Laet af van uwen sonden, ende verghetet uwe onrechtuaerdicheden die nv te doene inder eewicheit, ende God sal v wtleyden, ende verlossen van alle lijden,

69

Siet ouer v is ontfunckt die hitte, ghi oueruloedighe scharen, ende si sullender sommige van v wech rucken, ende sullen die ledighe met afgoden spisen,

70

ende die hem consenteren, sullen hen tot spotttinghe, ende tot lachter, ende tot vertredinge zijn

71

Want den plaetsen, sal plaetse zijn, ende inden biliggenden steden vele opstanighe zijn op die ghene die den HEERE vreesen,

72

Si sullen zijn als ontsinnighe, niemanden sparende om te beroouen, ende te verwoestene die noch den HERE vresende zijn

73

want si sullen verwoesten ende die goeden roouen, ende si sullense wt haeren huysen worpen

74

Dan sal die prouinghe mijnder wtuercorender blijcken, gelijck dat gout dat vanden viere geproeft wort,

75

Mijn beminde hoort, seyt die HEERE, Siet, die daghen des lijdens zijn hier na bi, ende van dien sal ic v verlossen.

76

En vreeset, noch en wankelt niet, want Godt is uwe leytsman.

77

Ende die mijn gheboden ende beuelingen hout, seyt die HERE God, op dat v uwe sonden niet en verwegen, op dat uwe onrechtuaerdicheden hen niet ouer en heffen

78

Wee den ghenen die van haeren sonden gebonden worden, ende worden van haer onrechtuaerdicheden ouerdect, ghelijckerwijs als den acker wort betuynt vanden bossche, ende sinen padt met doornen wort bedect, ouer welcken gheen mensche en ghaet, ende wort wt ghesloten, ende gesonden tot verslindinghe des viers.

§ Hier eyndet dat vierde ende laetste boeck Esdre.