De Vorsterman Bijbel

§ Dat .xiiij. Capittel.

1

⁺ENde het gheschiede opten derden dage, ende ick sadt onder die eycke.

+ A

2

Ende siet, die stemme ghinck wt teghen my, vanden doornen bossche, Ende seyde, Esdra, Esdra, Ende ic seyde, Siet ic HEERE, Ende ic stont op, op mijne voeten, Ende hi seyde tot my.

3

Openbarende ben ic gheopenbaert ouer den doornen, ende ick sprack Moysi, doen mine volc in Egipten diende,

4

ende ick seynde hem ende leyde mijn volck wt Egipten, ende ick brocht hem opten berch van Sina, ende ick hielt hem veel daghen by my,

5

ende ick vertelde hem veel wonderlijcheden, ⁺ ende ic verthoonde hem dye heymelicheyden der tijden, ende dat eynde, ende ick gheboodt hem segghende,

+ Exo. iij.b.

6

Dese woorden sult ghy int openbaer doen, ende dese sult ghi verborghen.

7

Ende nv segghe ick v

8

dese teekenen, die ick verthoont hebbe, ende die droomen die ghi ghesien hebt, ende die bediedinghe die ghy ghesien hebt in v herte setse op,

9

want ghy sult van allen ontfaen worden, ghy sult be-[kolom]keert worden, ouer ghebleuen met minen rade, ende met ws gheliken, totter tijt toe, dat die tiden geeynt worden.

10

Want die werelt heeft haer ioncheit verloren, ende die tiden ghenaken out te worden,

11

Want die werelt is in tweelf deelen gedeylt, ende haer thienste,

12

ende die helft des thiensten deels zijn door gegaen, ⁺ maer zijns sciet daer noch ouer na dat halue des thiensten deels.

+ B

13

Aldus soo beschict v huys nv, ende straft v volc, ende vertroost haere vernederde ende laet varen verderflike manieren,

14

ende laet van v sterffelijcke ghedachten, ende worpt van v menschelike ghewichten, ende doet v nv wt die broosche natuere, ende sedt wech aen deen side die ghepeysen die v aldaer moeyelicste zijn, ende haest v ouer te reysen van desen tijden,

15

want si sullen noch argher dinghen doen, dan die quade dingen die ghi nv hebt ghesien,

16

also veel als die werelt onuermoghender sal worden van outheit, alsoo veel sullen ouer die inwoonders, die quaden worden vermenichfuldicht,

17

Want die waerheit heuet haer meer verlenghet, ende dye lueghen is ghenaect, Nv haest dat ghesicht te comen, dat ghi gesien hebt.

18

Ende ic antwoorde, ende seyde voor v HEERE,

19

Siet, ick sal wech ghaen, ghelijc ghi mi gheboden hebt, ende ic sal dat teghenwoordighe volck straffen, Maer dye weder gheboren sullen zijn, wie salse beweghen?

20

Daerom is dye werelt in duysternisse gheset, ende die daer in woonen sonder licht,

21

Want uwe wet is verbrant waer om niemant en weet, welcke van v gemaect zijn, oft welcke wercken si beghinnen sullen,

22

Ist dat ic ghenade in v hebbe geuonden, seynt den heyligen geest in my, ende ick salt al scriuen dat in die werelt gheschiet is, vant beginne, welcke in uwe wet waren ghescreuen, op dat die menschen den pat mogen vinden, ende die inden wtersten leuen willen dat si leuen.

23

⁺Ende hy antwoorde tot mi, segghende. Gaet vergadert dat volck, ende ghi sult tot hen segghen, dat si v binnen veertich daghen nyet en soecken.

+ C

24

Maer vergadert v veel bercken schorssen, ende neemt met v Saream, Dabriam Selemiam, Echanum, ende Asiel, dese viue die bereyt zijn om snellick te scriuen.

25

Ende ghi sult hier comen, ende ic sal in v herte een licht des verstants ontfuncken, welcke niet wtgedaen en sal worden, tot dat gheeyndt zijn die dinghen, die ghi sult beghinnen te scriuen.

26

Ende dan volbrocht zijnde, sult ghi sommige openbaer maken, sommige sult ghi den wi-

[p. Dd4v]

sen verborgentlic leueren, Want morghen te deser vren sult ghi beghinnen te scrijuen

27

Ende ic ben gereyst also hy mi gheboot, ende ic vergaderde allet volck, ende seyde,

28

Hoort Israel dese woorden,

29

Onse vaderen zijn in vreemden landen gereyst, vant beghin in Egipten ende si zijn van daer verlost,

30

ende si ontfingen dye wet des leuens, die si niet bewaert en hebben, die ghi oec na hen ouergetreden hebt,

31

Ende het lant is v te deelen gegeuen, ende dat landt Sion, ende v vaders ende ghi hebt ongerechticheyt gedaen, ende ghi en hebt die wegen niet gehouden, die v die alderhoochste heeft gheboden,

32

Ende want hi een rechtuerdich rechter is, so nam hi weder van v inder tijt dat hi gheschenct hadde,

33

Ende nv zijt ghi hier ende uwe broeders zijn binnen onder v,

34

Hierom ist dat ghi uwen sinne bedwinct, ende v herte onderwijst, leuendich so sult ghi behouden zijn ende nae dye doot sult ghi ontfermherticheyt vercrigen,

35

Want dat oordeel sal na die doot comen, als wi weder leuende sullen worden, ende dan sullen der rechtuerdiger namen bliken, ende der ongodliker namen sullen metter daet getoont worden,

36

Aldus en come nv niemant tot mi, noch en soecke mi tot .xl. dagen toe.

37

⁺Ende ic nam vijf mannen, also hi mi geboden had, ende wi gingen int velt, ende bleuen daer,

+ D

38

Ende ic ben totten anderen dach ghecomen, ende siet een stemme riep mi segghende, Esdra doet uwen mont open, ende drinct daer ic v mede drencken sal,

39

Ende ic dede minen mont open, ende siet, een volle drincuat wert mi gelanct, dat was vol als watere, ende zijn veruwe was gelijc als vier,

40

Ende ic namt ende dranct, ende als ic daer wt gedroncken hadde, so wert mijn herte met verstandenisse gepijnicht, ende in mijn borste groeyde wijsheyt, Want mijnen geest wert bewaert mits der ghedachtenisse,

41

Ende minen mont wert open ghedaen, ende en is niet meer gesloten,

42

Die alder hoochste gaff den vijf mannen verstandenisse, ende si screuen dye wtgangen des nachts, die si niet en wisten, welcke geseyt werden

43

Snachts aten si broot, maer tsdaechs sprac ic, ende snachts en swege ic niet

44

Ende binnen veertich dagen zijn twee hondert ende vier boecken ghescreuen,

45

Ende het geschiede, als si .xl. dagen veruult hadden, so sprac die alderhoochste, seggende, Die eerste die ghi ghescreuen hebt, die sedt int openbaer, so datse die werdige ende onwerdige mogen lesen,

46

mer die tseuentich laetste suldi bewaren, op dat ghise den wisen vanden volcke leuert

47

Want in desen is die adere der verstandenisse, ende dye fonteyne der wijsheyt, ende [kolom] den stroom der kennissen, Ende ic dede alsoe.

§ Hoe den propheet Esdre geseet wert, dat hi niet vreesen en soude, mer seggen dese woorden totten volcke, dat hem beuolen wort