De Vorsterman Bijbel

§ Dat .vi. Capittel.

1

⁺ENde hi seyde tot mi, Int beghinne der aertscher werelt, ende eer dat de wtganghen der werelt stonden, ende eer dat die tsamencominge der winden waeyden,

+ A

2

ende eer dat de stemmen der donderen geluyt gauen ende eer dat die blinckinghe der blixemen scheen, ende eer die fundamenten des paradijs beuestiget waeren,

3

ende eer dat die fraeye bloemen ghesien werden, ende eer dat die beweechde crachten beuestighet werden, ende eer dat die ontellike heyren der Enghelen verghadert werden,

4

ende eer die hoocheden der lucht verhoocht werden, ende eer dat die maten des firmaments genaemt werden ende eer die scouwen te Zion heet werden,

5

ende eer dat die teghenwoordighe iaren ondersocht werden, ende eer dat die vonden der ghenen die nv sondighen veruremt werden, ende eer dat si beseghelt waren die dat gelooue tot scatten vergaderden

6

doen gedacht ict, ende zijn door mi alleen gemaect, ende nyet door eenen anderen,

7

Ende ick antwoorde, ende seyde, Welcke sal die afscheydinghe der tijden zijn? oft wanneer sal dat eynde der eerster zijn, ende, der nauolghender beghinsele?

8

Ende hi seyde tot mi, Van Abraham tot

[p. Cc6r]

Isaac, doen Iacob ende Esau van hem gheboren zijn, so hielt Iacobs hant vant beginne die hiele Esaus.

9

Esau is deynde deser werelt, ende Iacob der nacomender,

10

Des menschen hant tusschen die hiele ende de hant Esdra, en wilt anders niet vraghen.

11

Ende ic antwoorde ende seyde, O heerscapper ende HEERE, ist dat ic gracie voor uwe oogen heb vonden,

12

so bid ick, dat ghi uwen knechte wilt toonen deynde uwer teekenen dewelcke een deel ghi mi den voorgaenden nacht vertoont hebt,

13

Ende hy antwoorde ende seide tot mi staet op uwe voeten, ende hoort die alder volste stemme des geluyts,

14

Ende tsal gelijc een beroeringe zijn, nochtans die plaetse en sal niet beweecht worden in dewelcke ghi daer ouer staet,

15

⁺Hierom alst spreect so en verscrict v niet, want dat woort vanden eynde ende dat fundament der aerden wort verstaen

+ B

16

want die reden beeft daer af ende wort beroert want si weet dat haer eynde verwisselt moet worden,

17

Ende het is gesciet als ict hoorde, so stont ic op, op mijn voeten, ende ic hoorde, ende siet een sprekende stemme ende haer geluyt als een geluyt van veel wateren,

18

Ende seide siet die daghen comen ende het sal zijn, als ick sal beghinnen te ghenaken, om te besoeckene die op daerde woonen,

19

ende als ick van hen sal beginnen te versoeken die onrechtuaerdelijc gehindert hebben met haerder ontrechtueerdicheit, ende als die vernedertheit Sions veruult sal zijn,

20

ende als die werelt ouer geteekent sal worden dwelc sal beginnen door te gaen sal ic dese teekenen doen, Die boecken sullen open gedaen worden voor dat aensichte des firmaments, ende si sullen altesamen sien,

21

ende kinderkens van eenen iare sullen met haer stemmen spreken, ende die beuruchte sullen ontijdige kinderen baren, van drie oft van vier maenden, Ende si sullen leuen ende verwect worden

22

Ende die ghezaeyde plaetsen sullen onuerhoets ongezaeyt bliken, ende volle schappraien sullen onuerhoets ydel geuonden worden,

23

ende die trompet sal met eenen gheluyde luyden, die welcke als sise al gehoort sullen hebben, so sullen si onuersiens verscricken, ende het sal zijn,

24

In dien tijden sullen die vrienden de vrienden beoorlogen, als vianden, ende dye aerde sal verscroemen met desen, Ende de aderen der fonteynen sullen staen ende en sullen niet afloopen in drie vren,

25

ende het sal zijn alle die achter ghelaten sal worden wt allen dezen, die ic voren geseit heb, die sal behouden worden ende sal mijn salicheyt sien, ende dat eynde ws tijts,

26

Ende dye menschen die ontfanghen zijn sullen sien, die [kolom] de doot niet gesmaect en hebben van haerder geboorten aen, ende dat hert der inwoonders sal verandert worden, ende tsal in eenen anderen sin bekeert worden,

27

want dat quaet sal wtghewischt worden, ende dat bedroch sal wtghebluscht worden,

28

Maer dat ghelooue sal bloemen, ende die gheualsctheyt sal verwonnen worden, ende die waerheyt die so wter maten vele dagen sonder vrucht gheweest heuet sal vertoont worden,

29

Ende het gheschiede doen hi tot mi sprac, ende siet ic sach allenskens op hem voor wien ic stont,

30

ende hy seyde dit tot my, Ic ben ghecomen om v te toonen den tijt der toecomender nacht,

31

Hierom ist dat ghi weder bidt, ende weder vastet seuen daghen so sal ic v weder grooter saken vercondigen dan dese, door den dach, dan als icse ghehoort heb,

32

want v stemme is biden alder hoochsten gehoort, want de stercke heeft v schickinge gesien, ende hi heeft v suyuerheyt gesien die ghi van uwer ioncheyt op hebt ghehadt,

33

ende daerom heeft hi mi ghesonden v alle dese dingen te vertoonen ende v te seggen, Betrout ende en wilt niet vreesen,

34

ende en wilt niet haesten, met de eersten tijden te dencken ydele dinghen, ende en haest niet vanden laetsten tijden.

35

Ende hier na ist geschiet, ende ic weende weder, ende ic vaste des ghelijcs seuen daghen op dat ick drie weken soude vullen die mij gheseit zijn,

36

Ende het geschiede opten achtsten nacht, ende mijn herte wert weder beroert in mi ende ic begonste te spreken voor den alderhoochsten,

37

Want minen gheest wert zeer in mi ontsteken, ende mijne ziele werdt beanxt,

38

ende ic seide, O HEERE, sprekende hebt ghi gesproken, ⁺ vant beghin der creatueren inden eersten dach segghende, Het worde hemel ende aerde, ende uwe woort is een volmaect werck

+ C

39

Ende doen was die gheest ende die duysternissen werden omgedragen ende dat swighen ende dat gheluyt der stemmen des menschen en was noch niet van v,

40

Doen seide ghi dat van uwen scatten dat licht, dat vol lichts was voort gehaelt te worden, mids welcken, v werc soude blijcken,

41

Ende inden tweeden dage schiept ghi den gheest des firmaments, ende ghi geboodt hem dat hi soude deelen, ende dat hi een deelinge soude maken tusschen de wateren, dat het een deel opwaerts soude gaen, ende een deel beneden soude bliuen,

42

Ende opten derden dach geboot ghi den wateren vergadert te worden int .vij. deel der aerden, maer .vi. deelen hebt ghi gedroocht ende behouden, op dat wt desen die gezaeit zijn van God, ende gebout voor v dienende soude zijn,

43

want v woort ginc voort ende tgesciede

[p. Cc6v]

ter stont,

44

want onuersiens ginc die vrucht der menichten voort ongemeten, Ende die smaet der begeerlicheyt, ende die menigerhande bloemen met onuerandelike verwe, ende ruecken des ongrondeliken geruecs, Ende de dese zijn opten derden dach ghemaect.

45

⁺Maer opten .iiij. dach geboot ghi te worden tschijnsel der sonnen, ende dlicht der manen, ende die gesteltenissen der sterren

+ D

46

ende ghi geboot hen, dat si den toecomenden gescapenen mensce souden dienen,

47

Op den .v. dage seyt ghi den seuensten deele daer dat water was vergadert, dat voort soude brengen dieren ende geuogelten, ende visschen, ende tgheschiede also,

48

Dat stomme water dat sonder ziele was maecte die dieren die met Gods wille gheboden werden, op dat die geslachten, daer wt, uwe wonderlicheden souden vertellen,

49

Ende doen behielt ghi twee zielen, Den eenen hiet ghi Enoch, ende den anderen hiet ghi Leuiathan,

50

ende ghi verschietse van malcanderen, want dat seuenste deel daer dat water was vergadert en mochtse niet ontfaen,

51

Ende ghi gaeft enoch een deel dat opten .iij. dach gedroocht is, op dat hi daer in woonen soude daer duysent berghen zijn,

52

maer Leuiathan gaeft ghi dat vij. vochtige deel, ende ghi hielt dat, op dattet tot een verslindinge soude worden, den welcken ghi wilt, ende als ghi wilt,

53

Maer opten vi. dach geboot ghi der aerden, dat si voor v soude scheppen vee ende beesten, ende cruypende dieren,

54

ende hier ouer Adam dien ghi tot eenen hertoge hadt gestelt ouer alle wercken die ghi gemaect hebt, ende wt hem worden wi alle gebracht, ende welcke volc ghi vercoren hebt

55

Alle dese dingen heb ick HEERE, voor v geseyt, want om onsent wille sciept ghi de werelt,

56

maer die ander heydenen van Adam geboren seyde ghi niet te wesen, ende want si den speecsel geleken zijn, ende ghelijc een druppe vanden vate hebdy haer oueruloedicheyt ghelijct.

57

Ende nv HEERE siet, dese heydenen die voor niet geacht zijn, hebben ons begonst te verheeren ende te verslinden,

58

maer wi uwe volck dwelcke ghi geheeten hebt uwen eerstgeboren uwen eenigen, uwen neerstighen liefhebber wi zijn in haer handen gheleuert,

59

Ende is die werelt om onsent wille geschapen, waerom en besitten wi die erffenisse niet metter werelt, Hoe lange sullen dese dinghen zijn?

§ Hoe die Engel den proghete E dras op die vraghen antwoordet die Esdras int voorgaende capittel vraecht.