De Vorsterman Bijbel

§ Dat .v. Capittel.

1

⁺Maer vanden teekenen, Siet die dagen sullen comen in welcken gegrepen sullen worden, die de aerde bewoonen in veel tzijns ende den wech der waerheyt sal verborghen worden, ende dat lantschap sal onuruchtbaer zijn van ghelooue,

+ A

2

ende die onrechtueerdicheyt sal vermenichfuldicht worden ouer dit lantschappe dat ghi selue siet, ende ouer die ghi voortijts ghehoort hebt

3

ende tsal den voetstappe een settinge inden lantscap dat ghi nv siet regneren, ende si sullent woest sien,

4

Maer ist dat v die alderhoochste geeft te leuen, so suldi na die derde trompet sien, die sonne sal onuersiens weder snachts lichten, ende die mane driemael inden daghe,

5

ende vanden houte so sal bloet druppen, ende den steen sal zijn stemme gheuen, ende die volcken sullen beroert worden,

6

ende hi sal regneren dien si niet en hopen die de aerde bewoonen, ende die vogelen sullen tsamen ouerreysinge doen,

7

ende de Sodomijtsce zee sal haer visscen wech worpen, ende sal snachts een stemme geuen, die niet vele menscen bekent en hebben, Maer si sullen alle zijn stemme hooren,

8

ende een beroeringhe sal in veel plaetsen gescieden, ende dat vier sal dicwils weder gesonden worden, ende de wilde beesten sullen ouerreysen, ende die maencrancke wijuen sullen vremde vruchten baren,

9

ende in soete wateren sullen soute wateren worden geuonden, ende alle die vrienden sullen hen seluen wtuechten, ende dan sal den sin verborgen worden ende dat verstant sal afgesceyden worden in zijn celle,

10

ende sal van vele gesocht worden maer niet geuonden worden Die ongerechticheyt ende oncuysheyt sal vermenichfuldicht worden opter aerden,

11

Dat lantscap sal sinen naesten vragen ende segghen, En is die rechtueerdicheyt niet door v doorgegaen die rechtueerdich maect? Ende dat salt loochnen,

12

ende het sal in dien tijt zijn, dat die menscen [kolom] sullen hopen, ende en sullen niet verweruen, si sullen arbeyden ende haer wegen en sullen niet geuoorspoet worden.

13

Mi is toe gelaten v dese teekenen te seggen, ende ist dat ghi weder bidt ende screyt gelijc ghi nv doet, ende vast seuen dagen, so suldi weder noch meerder dingen hooren dan dese,

14

⁺Ende ick ontwaecte, ende mijn lichaem verscricte alte zeer, mijn ziele arbeyde dat si soude ontbreken,

+ B

15

ende dengel die tot mi comen was die in mi sprac, hielt ende stercte mi stellende mi op de voeten

16

Ende het gesciede in den tweeden nacht, dat Salathiel die leytsman des volcs quam tot mi seggende, Waer waert ghi, ende waerom is v aenscijn droeuich?

17

Oft en weet ghi niet dat v Israel gelooft is, in dat lantscap haerder ouerreysinge

18

Hierom staet op ende smaect broot, ende en verlaet ons niet gelijc een herder zijn cudde in de handen der booser woluen,

19

Ende ic seyde hem, Gaet van mi, ende en genaect mi niet Hi hoordet also ict seyde, ende hi ginc van mi,

20

ende ic vastede seuen dagen hulende ende screyende, gelijc mi Vriel de engel geboden hadde.

21

Ende het ghesciede na seuen dagen, ende die gedachten mijns herten waren mi weder alte moeylijc

22

ende mijn ziele nam weder den geest der verstandenisse, ende begonst weder redenen te spreken voor den alderhoochsten,

23

ende ic seyde, heerschapper HEERE wt alle bosschagie der aerden, ende wt alle haren boomen hebdi eenen wijngaert wtuercoren,

24

ende wt alle die aerden der werelt hebdi v eenen gracht vercoren, ende wt alle den bloemen der werelt, hebt ghi v een lelie vercoren,

25

ende wt allen afgronden der zee hebt ghi v een riuiere veruult, ende wt alle getimmerde steden hebt ghi v seluen Sion geheylicht,

26

ende wt allen gescapen gheuogelten hebt ghi v een duyue genoemt ende wt allen geschapen beesten hebt ghi v een scaep voorsien,

27

ende wt allen vermenichfuldichden volcke, hebt ghi v een volc vercreghen, ende een wet van allen ghepresen hebt ghi desen volck, dwelck ghi begheert hebt ghegheuen,

28

Ende nv HEERE waerom hebdy eenen in vele handen gheleuert, Ende hebt op een wortele ander bereydt, ende hebt uwen eenighen in veel volcken verstroyt,

29

ende si vertraden hen, si die tegen uwe beloften seyden, ende die uwen testamente niet en gheloofden

30

⁺Ende al haddi v volck hatende ghehaet, so betaemdet met uwen handen gecastijt te moeten worden,

+ C

31

Ende het gesciede als ic redenen gesproken hadde, so is die engel tot mi gesonden, die den voorledenen nacht tot mi gecomen was

32

ende seyde mi, Hoort mi, ende ic sal v onderwisen, ende aenmerct mi, ende ick sal voor v

[p. Cc5v]

daer toe doen,

33

Ende ick seyde, mijn HEERE spreect, Ende hi seyde tot mi, Ghi zijt alte zeer in uwe ghedachten ouerghetreden om Israel, Oft ghi hem lieuer hebt ghehadt, dan denghenen die hem gemaect heeft?

34

ende ic seyde tot hem, Neen ic HEERE, maer smert lidende heb ic ghesproken, want mine nieren pinigen mi alle vren, soeckende te begripen den wech des alderhoochsten, ende te ondersoecken dat deel zijns oordeels,

35

Ende hi seyde tot mi, Ghi en vermoghes niet, Ende ick seyde, Waerom HEERE? waer toe ben ic geboren oft waerom en werdt die kinderstede mijnder moeder my niet een graf, dat ic Iacobs arbeyt niet en saghe, ende die vermoedinghe des geslachts van Israel?

36

En hi seyde tot mi Telt mi de dinghen die noch niet gecomen en zijn, ende vergadert mi die verstroyde druppelen, ende maect mi die dorre bloeme weder groene,

37

ende doet mi open de gesloten scappraeien, ende brenct mi die winden die daer in besloten zijn, Toont mi dat beelt der stemmen, ende dan sal ic v den arbeyt toonen dien ghi begeert te sien

38

Ende ic seyde, heerscapper HEERE, wie ist die dese dingen weten mach, dan die metten menschen geen wooninge en heeft,

39

Maer ic ben onwijs, ende hoe soude ic mogen segghen daer ghi mi af geuraecht hebt?

40

Ende hi seyde tot mi Also ghi niet een en condt gedoen, vanden dingen die gheseyt zijn, also en moecht ghi mijn oordeel niet vinden, oft int eynde mijn liefde, die ic minen volc belouet hebbe,

41

Ende ic seyde Maer siet, HERE ghi zijt bi den genen die int eynde zijn, ende wat sullen si doen, die voor mi geweest zijn? oft wi, oft die gene die na ons sullen zijn?

42

⁺Ende hi seyde tot mi, Ic sal mijn oordeel der croonen geliken, Gelijc niet der laetster traecheyt, also noch der eerster snelheyt,

+ D

43

Ende ick antwoorde ende seyde, Noch en conste ghi die niet gemaken, die gemaect zijn ende die zijn, ende die toecomende zijn in een, op dat ghi v oordeel te haestelijker toonen mocht?

44

Ende hi antwoorde mi seggende Die creatuere en mach niet haesten bouen haren schepper, noch die werelt niet geliden die daer inne gescapen sullen worden in een?

45

Ende ic seyde, ghelijkerwijs ghi uwen knechte gheseyt hebt, dat ghi leuendich makende, hebt leuendich gemaect, de creatuere van v gescapen in een, ende die creatuere gedoochde dat, so mach sise nv ooc tegenwoordich in een dragen

46

Ende hi seyde, vraecht der kinderstede des wijfs ende ghi sult tot haer seggen, Ende ist dat ghi baret, waerom baert ghy bider tijt? Hierom bidt haer dat si thien in een geue

47

Ende [kolom] ic seyde, Si en vermachs niet, dan na den tijt.

48

Ende hi seyde tot mi, ende ic heb die kinderstede der aerden ghegeuen, die ouer haer ghezaeyt zijn bider tijt,

49

Want ghelijck dat sprakeloos kint niet en baert tgene dat den ouden toebehoort, alsoo heb ic die werelt bestelt, die van mi gescapen is,

50

Ende ic vragede ende seide want ghi mi nv den wech hebt gegeuen, so sal ic voor v spreken Want onse moeder daer ghi mi af gheseyt hebt, is noch ionc, ende nv ghenaect si der outheyt,

51

Ende hi antwoorde tot mi seggende, vraget haer die baert ende si salt v seggen

52

Ghi sult haer seggen Waerom en zijn si nv niet die ghi ghebaert hebt, gelijc den genen die voor v waren maer minder van lengden?

53

Ende si selue sal v ooc seggen, Daer zijn somige die inder cracht der ioncheyt geboren zijn ende andere die inder tijt des outheyts, als de kinderstede begonst te ontbreken, geboren zijn

54

Aldus merct ooc ghi, dat ghi minder van lengden zijt, dan die voor v waren, ende die na v sullen wesen, van minder dan ghi,

55

als nv out worden de creatueren ende die stercheyt der ioncheyt voorbi ghaen Ende ic seyde, HEERE ic bidde, ist dat ic genade voor uwen oogen heb geuonden, vertoont uwen knechte, door den welcken ghi uwe creatuere sult besoecken.

§ Hoe die propheet Esdras hem noch meer vraechde ende die Engel hem onderwees.