De Vorsterman Bijbel

§ Dat .iiij. Capittel.

1

⁺ENde die engel die tot mi ghesonden is, wiens naem Vriel was, antwoorde mi

+ A

2

ende seyde mi, Wtgaende is v herte te buyten zijn verstandt gegaen in deser werelt, ende ghi denct des alderhoochsten wech te begripen?

3

Ende ic seyde, Ia ic mijn HEERE, Ende hi antwoorde mi, ende seyde, Ic ben gesonden, v te toonen, drie weghen, ende drie gelijckenissen voor v te stellen,

4

van welcken, ist dat ghi mi een van desen vercondicht, so sal ick v den wech ooc thoonen, dien ghi begheert te sien ende ic sal v leeren, waer af dat boose herte si,

5

Ende ic seyde mijn HEERE, spreect, ende hi seyde tot mi, gaet ende weget mi tgewichte des viers, oft meet die waijnghe des wints, oft roept mi den dach weder, die voorbi is ghegaen,

6

Ende ic antwoorde, segghende. Wie der gheborender soudt connen gedoen, ghelijck ghi mi van desen vraecht?

7

Ende hi seyde tot mi, Vraechde ic v, seggende, Hoe veel wooningen in dat herte dee zee zijn? oft hoe vele aderen int beghin des afgronts zijn? oft hoe veel aderen bouen tfirmament zijn? oft welcke die wtghanghen des Paradijs zijn?

8

Ghi soudt misschien segghen, Ick en ben in den afgront niet ghedaelt, noch in die helle oock niet, noch ic en ben ooc niet inden hemel geclommen,

9

Maer nv en heb ic v niet geuraecht dan vanden viere, ende wint, ende vanden dage, daer ghi door zijt geghaen, ende van welcken ghi niet gescheyden en moecht worden, ende ghi en hebt daer niet op geantwoort,

10

Ende hi seyde mi, Dat uwe is ende met v opghewassen is, en kont ghi niet ghekennen,

11

ende hoe soude uwe vat, des alderhoochsten wech moghen begripen, ende nv van buyten nv die werelt verualst is, verstaen, die openbaerlijcke ghebreckelijcheyt in minen aensichte?

12

Ende ic seyde hem, Het waer beter gheweest, dat wi niet en waren, dan noch leuende in ongodlicheden leuen, ende te liden, ende niet te verstaen van wat dinghe.

13

Ende hi antwoorde tot mi segghende, ⁺ Reysende ben ic gereyst totten wout der houten des velts, ende si dachten een ghedachte,

+ B

14

ende seyden, Coemt, ende laet ons gaen, ende laet ons aen die zee oorloghe maken, op dat si, voor ons wech gae, ende dat wi andere bosschen maken,

15

Ende des gelijcs die vloeden der zee, ende si dacht-

[p. Cc4v]

ten ooc een gepeys, ende seyden, Coemt opclimmende laet ons die bosscagien des velts beoorlogen, op dat wi onsseluen daer een ander lantschap maken,

16

Ende tghepeyse des wouts is ydel geworden, want dat vier quam ende verslinde dat,

17

Desgelijcs oock tgepeys der zee vloeden, want tsant stont ende verboot hem,

18

Waert dat ghi deser rechter waert, welcken sout ghi beginnen te rechtuaerdigen, oft welcken te verdoemen? Ende ic antwoordede, ende seide,

19

Warachtelic si hebben een ydel gedachte gepeyst, want daerde is den woude ghegeuen, ende der zee, een plaetse haer vloeden te dragen,

20

Ende hi antwoorde mi, ende seyde, Ghi hebt wel geoordeelt, ende waerom en hebdi voor v seluen niet geoordeelt,

21

Want gelijc daerde den woude is gegeuen, ende die zee haeren vloeden, alsoo moghen die ghene die opter woonen, alleen verstaen, die dingen die op der aerden zijn, ende die bouen die hemelen zijn, die dingen die bouen die hoocheyt der hemelen zijn.

22

Ende ick antwoordede, ende seyde, Ick bid v HEERE, dat mi den sin worde gegeuen, om te verstaen,

23

⁺want ick en wil niet vragen van uwe opperste saken, maer van desen die dagelijcs door ons gaen, Waerom dat Israel, den heydenen tot lachter is gegeuen, tvolck dat ghi lief hadt is den ongodliken geslachten gegeuen, ende die wet onser vaderen is tot verderuinge gebrocht, ende die gescreuen ghesteltenissen en zijn niewers,

+ D

24

ende wi zijn door gegaen vander werelt gelijc sprinchanen, ende onse leuen is verbasinge, ende scroeminghe, ende wi en zijn ooc niet waerdicht ontfermherticheyt te vercrigen,

25

Maer wat sal hi sinen name doen, die ouer ons aengeroepen is, Ende van desen vraechde ick,

26

Ende hi antwoorde tot mi, segghende, Ist dat ghi vele ondersoect, soo sult ghi dicwilen verwonderen, want die werlt haest al haestende, door te gaen,

27

ende si en begrijpt niet te dragen, die dingen die in toecoemende tijden den rechtuaerdigen belouet zijn, want dese werelt is vol ongerechticheits ende brooscheden,

28

Maer daer ghi afvraecht sal ic v seggen, Want dat quaet is gezaeyt, ende zijn verderuinge en is noch niet ghecomen

29

Hierom ist dattet niet omgekeert en wort datter gezaeyt is, ende die plaetse wech en ghae, daert quaet gezaeyt is, soo en sal niet comen daer dat goede gezaeyt is,

30

Want tgras des quaden zaets, is in Adams herte ghezaeyt, vant beginne, Ende hoe veel ongodlics heuet ghebaert tot nv toe, ende baert, tot dat den dorschtijt coemt,

31

Rekent bi v seluen, hoe groote [kolom] vruchte der ongoddelijcheyt, dat gras des quaden zaets ghewonnen heeft,

32

wanneer die aren gheclouen zijn, der welcker gheen ghetal en is, hoe groote dorschvloeren sullen si beghinnen te maken?

33

Ende ic antwoorde, ende seyde, Hoe ende wanneer sullen dese dinghen geschieden? waer om zijn onse iaren luttel ende quaet,

34

Ende hi antwoorde mi, segghende, Ende haest ghi niet bouen den alderhoochsten, Ghi haestet ydelijcken bouen hem te zijn, want uwe ouertredinge is vele,

35

Hebben die zielen der rechtuaerdigher oock van desen geuraecht in haeren bereydingen, segghende, Hoe lange hope ic aldus, ende wanneer sal die vrucht des dorschtijts ons loons comen?

36

Ende Hieremiel die opperste enghel, antwoorde tot desen saken seggende, Wanneer dat getal der zaden in v volbrocht is, want hi heeft die werlt in een wage gewegen,

37

ende die tijden heeft hi met een mate gemeten, ende met eenen getale heeft hi die tijden ghetelt, ende hi en heeft niet beroert noch opgewect, ⁺ tot dat die voorseyde mate volbrocht worden,

+ D

38

Ende ick antwoorde ende seide O heerscapper HEERE, maer wi zijn ooc alle vol ongdlicheyts,

39

Ende misschien, om onsent wille, en worden der rechtuaerdigher dorschvloeren niet veruult, om die sonden der der inwoonders opter aerden.

40

Ende hi antwoorde mi, ende seyde, Ghaet, ende vraecht die beuruchte, Wanneer si volbracht heeft haer negen maenden, oft haer kinderstede noch mach die vruchte binnen haer behouden,

41

Ende ic seide, HEERE, si en machse dan niet houden Ende hi seyde tot mi, Die scapprayen der zielen inder hellen zijnder kinderstede geleken,

42

want gelijc, die baert haestet te ontulieden, den noot der baringen, also haestet dese ooc weder te geuen, die ghene die haer beuolen zijn,

43

Vant beghinne sal v van desen die ghi begheert te sien gewesen worden,

44

Ende ic antwoorde, ende seyde, Heb ic genade voor uwen oogen geuonden ende ist mogelijc, ende ben ic bequaem,

45

so wijst mi ofter meer te comen hebben, dan voorleden is, oft datter meer door zijn gegaen, bouen dan toecomende is,

46

Ic wete mat voor bi is ghegaen, maer ic en weet niet wat toecomende is.

47

Ende hi seyde tot mi, Staet ouer die rechte side, ende ic sal v wisen die bediedenis der gelijckenissen,

48

Ende ic stont, ende ick sach, ende siet, eenen bernenden ouen, ghinc door voor mi, Ende het is geschiet, als die vlamme doorginc sach ick, ende siet, den rooc ginc te bouen,

49

Hier na ghinck een wolcke vol waters door voor mi, ende bracht grooten reghen met eenen storm

[p. Cc5r]

ende doen den storm des reghens door was gegaen, so gingen die druppelen daer inne te bouen,

50

Ende hi seyde tot mi Denct bi v, Gelijc den regen meer wasset dan die druppelen, dat vier dan den roock, also oueruloede, die mate die voorby is gegaen, Maer die druppelen ende den roock gingen te bouen

51

Ende ic badt ende seyde Meyndi dat ic leue tot in dien dagen? Oft wat sal in dien daghen wesen?

52

Hi antwoorde mi ende seyde, Vanden teekenen daer ghi mi af vraecht, mach ic v eens deels seggen, Maer ick en ben niet gesonden, v te seggen van uwen leuen, want ic en weets niet.

§ Hoe die propheet Esdras ontwaecte als hem die Enghel veel droeffenissen hadde vercondicht, ende was zeer verueert.