De Vorsterman Bijbel

§ Dat .iij. Cap.

1

⁺INt dertichste iaer dat de stat bederfelic geuallen was, was ick te Babilonien, ende ic wert verscrict op mijn bedde, nederliggende, ende mijn gedachten clommen op ouer mijn herte,

+ A

2

want ic sach die verwoestinge Sions, ende haer oueruloedicheyt die in Babilonien woonden,

3

ende minen gheest is altezeer opgescut inden wint, ende ic begonste beureest te worden totten alder hoochsten te spreken,

4

Ende ic seyde, O heerschapper HEERE, ghi hebt geseyt van tbeginne, doen ghi die aerde plantede, ende dat alleene, ende gheboot den volcke,

5

ende gaeft Adam een doot lichaem maer dat was ooc dat scepsel uwer handen ende ghi inbliest in hem den geest des leuens ende hi is leuende gheworden voor v,

6

ende ghy leydet hem int paradijs, dat v rechte hant hadde geplant, eer dat die aerde toequam.

7

⁺Ende desen beuaelt ghi uwen wech lief te hebben ende hi ginc dien voorbi ende terstont insettede ghi die doot in hem, ende in zijn geslachten ende daer zijn verscheyden menschen, ende afcomsten, ende volcken, ende maechscappen geboren der welcker gheen getal en is,

+ B

8

ende elc volc wandelde na sinen wille, ende si deden wonderlijcke dingen voor v gesichte, ende si versmaden v geboden,

9

maer weder, ghi brocht die diluuie ouer die ghene die de werelt bewoonden ende ghi verdeetse,

10

ende in elcken van hen ghesciede, gelijc Adame, dat steruen, also desen die diluuie,

11

Maer ghi liet achter eenen van desen, Noë met sinen huyse, ende wt hem alle rechtueerdighe,

12

Ende tis geschiet, doen si begonsten vermenichfuldicht te worden die opter aerden woonden, vermenichfuldichdeden si die kinderen, ende die volcken, en veel heydenen, ende si begonsten weder ongodlicheit te doen, meer dan die eerste,

13

Ende tis ghesciet, als si boosheyt voor v deden, soo vercoort ghi eenen man wt desen, wiens naem was Abraham,

14

Ende ghi hadt hem lief, ende ghi vertoondet hem alleen uwen wille,

15

ende ghi beschicte hem een eewich testament, ende ghi seyt hem, dat ghi zijn zaet nimmermeer verlaten en soudt, Ende ghi gaeft hem Isaac Ende Isaac gaeft ghi Iacob ende Esau,

16

Ende ghi sceydet v Iacob, maer Esau verscheydet ghi

[p. Cc4r]

Ende Iacob is tot een groote menichte geworden,

17

Ende het is gheschiet, doen ghi zijn zaet wt Egypten leydet, ⁺ so brocht ghijt opten berch Sina,

+ C

18

Ende ghi neychdet den hemel, ende steldet die aerde, ende ghi beroerdet die aerde, ende ghi dedet de afgronden beuen, ende ghi verschrictet die werelt,

19

ende uwe heerlicheyt doorghinc vier poorten des viers, ende aertbeuinge ende den wint, ende den vorst, op dat ghi Iacobs zade die wet soudt gheuen, ende den gheslachte Israels naersticheyt,

20

Ende ghi en naemt dat quade herte niet wech van hen, op dat v wet in hen soude vrucht doen?

21

Die eerste Adam dragende dat quade herte, ouertrat, ende wert verwonnen, ia ende oock alle die van hem geboren zijn.

22

Ende daer is een bliuende broosheyt gheworden, ende die wet met des volcs herte, metter boosheyt des wortels, ende dat goet is, dat is wech gegaen, ende dat boose is gebleuen,

23

Ende die tijden zijn door gheghaen, ende die iaren zijn geeyndt, ende ghi verwecte v eenen knecht, geheeten Dauid,

24

ende ghi seyt hem, te timmeren die stadt ws naems ende daer te offeren in die selue, wieroock, ende offerhanden,

25

Ende dat is veel iaren geschiet, ende si misdeden allegader, die die stadt bewoonden,

26

in allen dinghen doende, ghelijc Adam dede ende alle sine leden, Want si besichden selue ooc een boos herte,

27

ende ghi leuerdet uwe stadt inden handen uwer vianden.

28

Doen si ooc beter dingen die te Babilonien woonen? Ende daerom sal Syon heerschappen.

29

⁺Het is gebuert als ic hier quam, ende sach die ongodlicheden, der welcker gheen getal en is, ende mijn ziele sach veel misdoende, dit dertichste iaer, ende mijn herte ghinc wt,

+ D

30

want ic sach hoe ghise sondighende lijdt, ende ghi spaerdet die ongodlijck deden, ende ghi verdeet v volck, ende ghi behielt uwe vianden, ende ghi en ghaues niet te kennen,

31

ic en ghedencke niet, hoe desen wech gelaten sal worden. Doet Babilon ooc beter dinghen, dan Syon,

32

oft heeft v ander volc ghekent, dan Israel? Oft welck gheslachte heeft uwen testamenten gelooft gelijck Iacob?

33

Der welcker loon niet ghecomen en is, noch den arbeyt en heeft gheen vrucht ghedaen, Want doorgaende ghinc ic door in die heydenen, ende ic sachse oueruloeyende, ende uwer gheboden niet gedenckende,

34

Nv dan weecht onse ongerechticheyt in een schale, ende der ghenen die inder werelt woonen, ende uwen name en sal niet geuonden worden, dan in Israel,

35

Oft wanneer en hebben si niet geson-[kolom]dicht die de aerde bewoonen? oft welc volc heeft v geboden also gehouden?

36

Dese suldy bi namen vinden v geboden gehouden te hebben, maer die heydenen en sult ghi niet vinden.

§ Hoe die Propheet Esdras, ende die engel die tot hem ghesonden was inden ghesichte, onder malcanderen woorden hadden.