De Vorsterman Bijbel

§ Dat .viij. Capittel.

1

⁺ENde na dezen als Artaxerxes der persen coninc regneerde, ginck Esdras de soon Asarie, des soons Helchie, des soons Solome,

+ A

2

des soons Sadoch, des soons Achitob, des soons ameri, des soons Azahel, des soons Bocci, des soons Abisue, des soons Phinees, des soons Eleazari, des soons Aaron de eersten priesters.

3

Dese Esdras ghinc op van Babilonien, als hi scriuer was, ende vol natuerlijcx begrijps, in die wet Moysi die vanden HEERE Israels God ghegeuen is voort te leeren ende te doen,

4

Ende die coninc gaf hem eere, dat hi gracie hadde gheuonden in alle weerdicheyt ende begeerten, in zijn aenscouwen

5

Ende si ghinghen tsamen op met hem, ende den kinderen Israels, ende priesters, ende metten Leuiten, ende den heyligen sangers des tempels, ende den duerwachters, ende den knechten des tempels in Ierusalem.

6

Inden .vij. iare als Artaxerxes [kolom] regneerde in die vijfste maent dits dat .vij. iaer des rijcx, wtgaende van Babilonien inde nieuwe mane der vijfster maent

7

quamen si te Ierusalem na zijn ghebot, na die voorspoedicheyt des weghes, hen van haeren god ghegeuen.

8

In desen vercreech Esdras een groot onderwijs, dat hi der dinghen gheen achter laten en soude, die wt die wet des HEEREN ende gheboden waren. Ende leerende geheel Israel alle rechtueerdicheyt ende oordeel

9

Maer si opgaende die de scriften des conincx Artaxerxis screuen, leuerden dat gescrift dat van Artaxerxe den coninc gecomen was, tot Esdram den priester ende den leser der wet des HEEREN, wiens copie hier na ghestelt is

10

Die coninc Artaxerxes wenschet Esdre den priester ende lesere der wet des HEEREN salicheyt.

11

⁺Ic beleefdeliker oordelende in weldaden heb ic hen geboden, die wt den volcke der ioden begheren van haer seluen, ende wt den priesters ende Leuiten, die in mijn rijc zijn met v te ghane tot Ierusalem.

+ B

12

Aldus ist datter eenige met v begheren te gane, si comen mede ende reysen, alsoot mi behaecht heeft, ende mijnen seuen vrienden mijnen raetsheeren,

13

op dat si die dinghen besien, die ghedaen worden na Iudeam ende Ierusalem, onderhoudende al so ghi inde wet des HEEREN hebt,

14

ende laetse den HEERE van Israel gauen draghen welcke ic ende die vrienden Ierusalem beloeft hebbe, ende alle het gout ende siluer dat geuonden is in dat rijck van Babilonien, den HEERE in Ierusalem

15

met den genen dat gegeuen is voor dat selue volc inden tempel haers HEREN, het welc in Ierusalem is, op dat dat gout vergadert worde ende dat siluer, tot verren rammen, ende lammeren, ende bocken, ende die desen bequaem zijn,

16

op dat si den HEERE offeranden moghen offeren op den outaer haers HEEREN welck in Ierusalem is.

17

ende also wat ghi met v broeders wilt doen met gout ende siluer, dat volbrenghet naer uwen wille na dat ghebot des HEEREN ws gods,

18

ende die heylige vaten die v gegeuen zijn totten wercken des huys des HEEREN ws Godts, het welcke in Ierusalem is,

19

ende die ander die v dienen totten wercken des tempels ws Godts, sult ghi vander conincliker schatcamer gheuen,

20

als ghi wilt met uwen broeders doen in gout ende siluere volbrenghet na den wille des HEEREN.

21

Ende ick (het is waer) coninck Artaxerxes hebbe den bewaerders der schatten van Syrien ende Phenicien gheboden, ende so wat Esdras priester ende leser der wet des

[p. Bb8v]

HEEREN scrijft, salmen hem neersteliken gheuen, tot hondert pont siluers toe, ende des ghelijcks gout,

22

⁺ende tot hondert mud corens toe, ende hondert ghelten wijns, ende andere so wat daer oueruloeyt sonder weerderinghe.

+ C

23

Laetse alle na Gods wet, den alderhoochsten God ghescieden, op dat die gramscappe niet op en stae in des conincx rijcke, ende zijns kints ende zijnder kinderen.

24

Maer v wort gheseyt dat alle die priesters ende Leuiten, ende den heylighen sanghers ende dienaers des tempels, ende den scriuers des tempels,

25

gheenen tribuyt noch gheen ander oplegginghe aenghedaen en worde, noch nyemant en sal machte hebben hen yet teghen te worpen.

26

Maer ghi Esdras stelt na die wijsheyt Gods, rechters ende sceydtsmannen, in alle Syrien ende Phenicien ende allen die de wet ws Gods niet en weten, dien leertse,

27

op dat so vele daer die wet ouertreden neerstelijck ghecastijt worden, het si metter doot oft met pijninghe, oft ooc met schattinghe des ghelts oft wechuoeringhe.

28

Ende Esdras de scriuer seyde Ghebenedijt si die HEERE onser vaderen, die desen wille in des conincx hert heeft ghegheuen zijn huys te verclaren, welc in Ierusalem is,

29

ende heeft mi gheeert int aenschouwen des conincx, ende zijnder raetsheeren ende zijnder vrienden, ende zijnder edelen die purpur draghen.

30

Ende ick ben stantuastich van moede gheworden, nae die helpinghe des HEEREN mijns Gods, ende ic vergaderde mannen wt Israel, dat si tsamen met mi op souden gaen.

31

Ende dese zijn die ouerste na haren vader landen, ende deelijcke prinschappen der ghenen die met mi opghinghen van Babilonien in Artaxerxis rijcke,

32

Ende wt den kinderen Phares Gersonus, wt den kinderen Siemarith Amenus. Der kinderen Dauid Acchus cecilie,

33

wt den kinderen Phares Zacharias, ende met hem zijn weder gekeert hondert ende vijftich mannen,

34

Wt den kinderen Ductoris moabilionis Zaraei, ende met hen twee hondert ende vijftich mannen,

35

Wt den kinderen Zachnes, Iechonias, Zechoeli ende met hem twee hondert ende vijftich mannen,

36

Wt de kinderen Salamaasias gotholie, ende met hem tseuentich mannen,

37

Wt den kinderen Zaphacie, zarias miheli, ende met hem tachtentich mannen,

38

Wt den kinderen Iob Abdias Ieheli, ende met hem tweehondert, ende tweelf mannen,

39

wt Banies kinderen Salimoth, Iosaphie soon, ende met hem hondert ende tsestich mannen,

40

Wt den kinderen Bear [kolom] Zacharias, Bebei, ende met hem twee hondert ende acht mannen,

41

Wt den kinderen Esead Iohannes Ezecham, ende met hem honderd ende thien mannen,

42

wt den kinderen Adonicam, si die leste zijnde, Ende dit zijn haer namen Eliphalam, die sone Gebels ende Semias, ende met hen tseuentich mannen.

43

Ende ic vergaderde totter riuieren die Thia heet, ⁺ ende wy legherden daer drye daghen, ende ick monsterdese,

+ D

44

Ende ick en vant daer niemant wt der priesters ende Leuiten kinderen,

45

Ende ick seynde tot Eleazarum, ende Eccolom, ende masinam, ende Molobam, ende Enaatha, en de Samea, ende Ioribum, Nathan Ennagam, Sachariam ende Mosollamum, si selue waren leyders ende besochte,

46

Ende ick seyde hen, dat si tot Loddeum souden comen die bi die plaetse der scatcameren was,

47

Ende ic geboot hen, dat zijt Loddes ende sinen broederen souden seggen, ende die bi die scatcamer waren, dat si ons deghene souden seynden, die dat priesterscap mochten bedienen in dat huys des HEREN ons Gods,

48

ende si brochten tot ons na die moghende hant des HEEREN ons Gods geleerde mannen, Wt de kinderen Mooli des soons Leui des soons Israel. Sebebiam ende kinderen ende broeders, der welcker achtien was

49

Asbiam ende Amin: Wt den kinderen der kinderen Chananei: ende haer kinderen waren twintich mannen:

50

Ende wt den ghenen die inden tempel dienden: die Dauid hadde ghegheuen ende si selue princen totter verweckingen der Leuiten die den tempel dienende waren tweehondert ende twintich. Alle die namen zijn in die scriften gheteekent.

51

Ende ic beloefde daer een vasten: den ionghen int aenschouwen Gods, op dat ic eenen goeden wech van hem soude soecken: ende die met ons waren: ende den kinderen ende den beesten: om der laghen wille:

52

Want ic scaemde mi vanden coninck voetknechten ende reysers te eysschen: tot gheleye opten weghe teghen onse vianden:

53

Want wi hadden den coninck gheseyt: dat des HEEREN cracht met hen soude zijn: die hem in alder begeerten soecken:

54

Ende wi baden den HEERE onsen God weder na ditte: den welcken wi ooc genadich hadden, ende wi zijn mede machtich geworden door onse god:

55

Ende ic verscheyde wt den luyden: wt den ouersten: ende wt den priesteren des tempels: tweelf mannen: ende Sedebiam: ende Adsannam: ende met hen wt haeren broeders thien mannen:

56

Ende ic woech hen dat gout ende dat siluer ende die prie-

[p. Cc1r]

sterlijcke vaten des huys ons HEEREN ons Gods, welcke die coninc gesconcken hadde ende sine raetsheeren ende princen, ende alle Israel

57

Ende als ict gheweghen hadde, soo leuerde ick .c. ende .l. pont siluers, ende silueren vaten van .c. pont, ende .c. ponts gouts,

58

ende seuenmael twintich gulden vaten, ende eerene vaten van goeden eerenen wercke blinckende twaelue, gheuende die ghedaente des ghouts,

59

Ende ic seyde hen, Ende ghi zijt den HEERE heylic, ende die vaten zijn heylich, ende dat gout ende siluer is den HEERE den God onser vaderen belouet,

60

Waect ende bewaeret tot dat ghijt leuert, wt den volcken, ouersten, den priesteren, ende den Leuiten, ende den ouersten der steden van Israel, in Ierusalem, in die camer des huys ons Gods.

61

Ende dese priesters ende Leuiten ontfinghen dat gout ende dat siluer, ⁺ ende die vaten droegen si in Ierusalem, inden tempel des HEEREN,

+ E

62

Ende wi toghen voort vander riuieren Thia, den twaelfsten dach der eerster maent, tot dat wi in Ierusalem gingen,

63

Ende alst den derden dach was gheworden, so is dat gout ende siluer opten vierden dach gewegen, geleuert in dat huys des HEEREN, ons Gods, Marimoth den sone Iori den priestere,

64

Ende met hem was Eleazar Phinees soon ende met hen waren Iosabdus die sone Iesu, ende Medias, Ende Bani sone Leuiten, alle tot tgetal, ende tot gewichte,

65

Ende inder seluer vre, wert haer gewichte geschreuen,

66

Maer die wt der gheuanckenissen quamen offerden offerhanden den HEERE Israels Gode, twaelf verren voor alle Israel, Ses ende tachtentich rammen

67

.lxxij. lammeren .xij. bocken, vore die sonde, ende voor die salicheyt .xij. coeyen, altemale tot offerhande des HEEREN

68

Ende si ouerlasen die geboden des conincs, den conincliken rentmeestere, ende den onderconingen van Celosyrien ende Phenicien, ende si eerden dat volck, ende den tempel des HEEREN,

69

Ende dese dingen voleynt hebbende, so quamen die prouoosten tot mi seggende. Dat geslachte Israel, ende die priesters, ende die Leuiten,

70

ende vremdelingen, ende heydenen, ende nacien des lants, en hebben niet afgescheyden van haeren onreynicheyden, vanden Cananeen, ende Etheen, ende Pherezeen, ende Iebuzeen, ende Moabiten, ende Egyptenaers, ende Idumeen,

71

Want si zijn haeren dochteren toegeuoecht, si selue ende haer sonen, ende dat heylighe zaet, is vermenget met den vremden geborenen heydenen des lants, Ende die prouoosten, ende Wethouders waren deelachtich haerder [kolom] boosheyt vanden beghinne des rijcs.

72

⁺Ende terstont als ic dese dingen hoorde, so schoorde ic mijn cleederen, ende den heylighen rock, ende ic troc die haren van mijnen hoofde wt, ende wt mijnen baert, ende ick sadt droeuich wesende, ende truerich,

+ F

73

Ende also vele alser doen beweecht werden inden woorde des HEEREN des Gods Israel, quamen tot mi, die daer weenende was ouer die boosheyt, Ende ick sadt droeue totter auont offerhande toe

74

Ende opstaende vanden vastene, hebbende gheschoorde cleederen, ende den heylighen rock knielende, ende mijn handen wtstreckende, totten HEERE

75

seyde ick, HEERE, ick ben beschaemt, ende ontsiende voor uwe aensicht,

76

Want onse sonden zijn vermenichfuldicht ouer onse hoofden, ende onse boosheden zijn totten hemel toe verhoocht,

77

Want vanden tijden onser vaderen aen, zijn wi in groote sonden, tot desen dach toe.

78

Ende om onse, ende om onser vaderen sonden, so zijn wi met onsen broederen, ende met onsen priesteren, den coningen der aerden geleuert totten swaerde ende totter geuanckenisse, ende tot beroouingen met beschaemtheden, tot op den dach van huyden,

79

Ende nv hoe groot ist dat, dat ons ontfermherticheyt mocht gheschieden van v HEERE God, Ende laet ons achter doch eene wortele, HEERE, Ende eenen naem in die plaetsen uwer heylichmakinge,

80

onse licht te ontdecken int huys des HEREN ons Gods ons spijse te gheuene inder tijt onser slauernien,

81

Ende als wi dienden, en waren wi niet verlaten vanden HEERE onsen God, Maer hi stelde ons in ghenaden, settende ons die coninghen van Perssen, te gheuen spijse,

82

ende te verclaeren den tempele des HEEREN ons Gods, ende die verwoeystheden Syons te timmeren, ons vasticheyt te geuen inden Ioetschen landen ende in Ierusalem.

83

Ende nv wat sullen wi segghen HEERE, ⁺ hebbende dese dinghen? Want wi hebben uwe geboden ouer getreden, die welcke ghi ons ghegheuen hebt, inden handen uwer knechten der propheten,

+ G

84

segghende, Want dat lant daer ghi in gegaen zijt, om te besitten zijn erffenisse, dat lant is besmet metten beuleckingen der vremdelingen des lants ende haere onreynicheden hebben si al te mael veruult met haerder onreynicheyt,

85

Ende nv en sult ghi uwe dochteren niet toeuoeghen haeren sonen, ende ghi en sult haere dochteren uwen sonen niet ontfangen,

86

Ende ghi en sult in gheender tijt soeken met hen vrede te hebben, op dat ghi sterck wordende, dat al-

[p. Cc1v]

der beste der aerden etet, ende dat ghi uwen kinderen die erffenisse wtdeelt tot inder eewicheyt,

87

Ende die dinghen die ons gheuallen die gheschieden ons alle, om onser booser wercken wille, ende om onse groote sonden,

88

Ende ghi hebt ons alsulcken wortel ghegheuen, dat wi zijn weder omgekeert ouer te treden uwe wetlichheyden, also dat wi ghemenget zijn gheworden der onreynicheyt der vremder gheborenen heydenen des lants,

89

Ende ist niet alsoo, dat ghi op ons gram zijt, om ons te verdoen, alsoo lange, tot dat onse wortele ende onsen name niet ghelaten en worde?

90

HEERE Israels God, ghi zijt warachtich. Die wortel is ghelaten tot op desen dach van huyden,

91

Siet, nv zijn wi in uwe aenschouwen in onse ongherechticheyden, Want ten is noch niet te staen voor v in desen.

92

Ende als Esdras aenbiddende beleedt, weenende, neder ghestrect ter aerden voor den tempele, so is voor hem verghadert wt Ierusalem, een zeer grote schare, mannen ende vrouwen, ionge gesellen, ende ionge meyskens, Want die weeninge was groot in die selue menichte,

93

Ende als geroepen hadde Ieconias Ieheli wt Israels kinderen, soo seyde hi Esdre, Wi hebben teghen den HEERE ghesondicht, dat wi ons vremde geboren vrouwen wt den heydenen des lants te houwelick ghenomen hebben,

94

Ende nv zijt ghi ouer alle Israel, Hierom so si in desen eenen gesworen eedt vanden HEERE, alle onse huysfrouwen die wt den vremden geboren zijn, met haeren kinderen wt te driuen,

95

ghelijct v ingheset is, vanden ouders, naer die wet ons HEEREN, staet op ende rechtet wt,

96

die sake ghaet v aen, ende wi zijn met v, doet manlijcken,

97

Ende Esdras stont op, ende hi dwanc ten eede die ouerste der priesteren ende die Leuiten, ende alle Israel, te doene naer dese dinghen, ende si swoeren.

§ Hoe Esdras dat volck liet veghaderen, ende straftese om die vremde vrouwen die si te houwelijcke ghenomen hadden ende hi vertelde die wet des HEEREN.