De Vorsterman Bijbel

§ Dat .ix. Capittel.

1

⁺ENde Esdras stont op ende is van voor den voorhof des tempels wech gheghaen, in die camer Ionathe des zoons Nasabi,

+ A

2

ende daer ter herberghen zijnde, en proefde hi broot noch en dranc watere, ouer die ongherechticheyt der menichten,

3

Ende die vercondinghe is in allen den ioedtschen landen ende Ierusalem gheschiet, allen den ghenen die wtder geuanckenissen te Ierusalem vergadert waren,

4

op dat alle die ghene die niet en ontmoetede, binnen twee oft drie dagen [kolom] na dat oordeel der besittender ouderen, haere goeden souden wech ghenomen worden, ende hi soude vremt gheoordeelt worden, vander menichte der geuanckenissen,

5

Ende si zijn alle verghadert die wt den gheslachte Iuda ende Ben iamin zijn, binnen drie daghen, in Ierusalem, Dese maent is die negenste, den dach der maent, den twintichsten,

6

Ende alle die menichte sadt inden vloer des tempels beuende, om den tegenwoordigen winter.

7

Ende Esdras stont op, ende hi seyde tot hen, Ghi hebt onrechtuaerdelijcken gedaen dat ghi v vremde gheborene huysfrouwen te houwelijcke hebt ghenomen, ⁺ op dat ghi totten sonden van Israel toe soudet doen,

+ B

8

ende nv gheeft belijdinghe, ende grootmakinghe, den HEERE onser vaderen Gode

9

ende volbrenghet sinen wille, ende scheyt v vanden heydenen der aerden, ende van vremden gheboren huysfrouwen,

10

Ende alle die menichte riep, ende si seyden met luyder stemmen, Wi sullen doen ghelijc ghi gheseyt hebt,

11

Maer want die menichte groot is, ende het winter tijt is, ende wi en mogen niet sonder hulpe staen, ende dit werck, en is ons gheen werck van eenen ofte twee daghen, want wi hebben in desen veel ghesondicht,

12

soo laet die ouerste der menichten staen, ende alle die met ons inwoonen, ende al de vremde gheboren huysfrouwen bi hen hebben,

13

ende laet daer in gesetter tijt wt allen plaetsen priesters ende rechters bi staen, tot dat si die gramschap des HEEREN in deser saken ontbinden,

14

Ionathas die sone Ezeli, ende Ozias, ende Thecam, si ontfingen dese dinghen, Ende Bozoramus, ende Leuis, ende Sabbatheus hebben te gader met hen gewrocht

15

Ende alle die wt der geuanckenissen waren, stonden na alle dese dinghen.

16

Ende Esdras die priestere vercoos hem mannen groote ouerste van haeren vaderen, naer die namen, ende si saten tsamen in die nieuwe mane der tiender maent, om dese sake te ondersoekene,

17

⁺Ende daer is gesloten vanden mannen die vremde geboren huysfrouwen hadden totter nyeuwer manen, der eerster maent,

+ C

18

Ende daer zijnder geuonden wt den priesters gemenghet, die vremde gheboren huysfrouwen hadden,

19

Wt den kinderen Iesu des soons Iosedech, ende sinen broeders, Maseas, ende Elizerus ende Ioribus, ende Ioadeus,

20

ende si sloeghen die handen aen, dat si haer huysfrouwen souden wt driuen, ende om te offeren ter verbiddinghe, eenen Ramme voor hae-

[p. Cc2r]

re onwetentheyt,

21

Ende wt den kinderen Semmeri, Maseas, ende Esses, ende Ieelech, Azarias,

22

ende wt den kinderen Fosore, Limosias, Hismaenis, ende Nathanaee, Iussio, Ieddus, ende Talfas.

23

Ende wt den Leuiten Iosabdus, ende Semeis, ende colius, ende Calitas, ende Facteas, ende Coluas, ende Elionas.

24

Ende wt den heylighen sanghers Eliarib, Zaccarus,

25

Ende wt den duerwachters Sallumus, ende Talbanes,

26

ende wt Israel Ende wt den kinderen Sorozi, ende Remias, ende Geddias, ende Melchias, ende Michelus, ende Eleazarus, ende Iemmebias, ende Bannas.

27

Ende wt den kinderen Iolaman, Chamas, ende Zacharias, ende Iezrelus, ende Ieddius, ende Erimoth, ende Helias,

28

Ende wt den kinderen Zatholim, eliadas, ende Liasmus, Zochias, ende Larimoth, ende Sabdis, ende Tebedias

29

Ende wt den kinderen Zebes, Ioannes, ende Amaias, ende Zabdias, ende Emeus,

30

Ende wt den kinderen Banni, Olammus, ende Malluchus, ende Ieddeus, ende Iasub, ende Asabus, ende Ierimoth.

31

Ende wt den kinderen Addin, Naathus, ende Moosias, ende Caleus ende Raanas, ende Maaseas, Mathathias, ende Beseel, ende Bannus ende Manasses,

32

⁺Ende wt den kinderen Nuae, Noneas, ende Afeas, Melchias, ende Sameas, ende Simon, Beniamin, ende Malchus, ende Marras,

+ D

33

Ende wt den kinderen Asom, Carianeus, Mathathias, ende Bannus, ende Eliphalach, ende Manasses, ende Semei,

34

wt den kinderen Banni, Ieremias, ende Moadias ende Abramus, Iohel, ende Baneas, ende Pelias, ende Iona, ende Marimoth, ende Eliasib, ende Mathaneus, ende Eliasis, ende Orizas, ende Dielus, ende Semedius, ende Zambris, Iosephus,

35

ende wt den kinderen Nobei, Idelus, ende Mathathias ende Sabdus, ende Zecheda, Sodini, ende Iessei, Baneas.

36

⁺Alle dese hadden hen vremde gheboren huysfrouwen toegheuoecht, ende si lietense gaen metten kinderen,

+ E

37

Ende die priesters ende Leuiten, ⁺ ende die wt Israel waren, woonden in Ierusalem, ende in een heel lantscap, indie niewe mane der .vij. maent, Ende die kinderen van Israel waren in haer wooninghen,

+ ij.Esdre. viij.a.

38

Ende alle die menichte is tesamen verghadert opden vloer, die vanden Oosten der heyliger poorten is,

39

Ende si seyden Esdre den biscop ende den leser, dat hi den wet Moysi soude halen, die gegeuen is vanden HEERE Israels God,

40

Ende Esdras die bischop haelde die wet, alle haerder menichten, vanden man totten wiue toe, ende alle den Priesters, om die wet te [kolom] hooren alst nieuwe mane der .vij. mant was,

41

Ende hi lasse op den vloer die voor die heylighe poorte des tempels is, vanden eerste lichte totten auont toe, voor die mannen ende vrouwen, Ende si gauen haeren sin alle totter wet,

42

Ende Esdras die priester ende die leser der wet stont op eenen houtenen rechterstoel, welcke ghetimmert was,

43

⁺Ende Matathias, ende Samus, Ananias, Azarias, Vrias, Ezechias, ende Balsamus stonden bi hem ter rechter handt,

+ F

44

ende tot zijnder slincker hant, Faldeus, Misael, Malachias, Abustas, Sabus, Nabadias, ende Zacharias,

45

Ende Esdras nam dat boeck, voor alle die menichte want hi sadt voor, in eere int aenschouwen alre menschen,

46

Ende als hi die wet had wt ghelesen, soo stonden si alle opggerecht, ende gebenedide den HEERE den alderhoochsten God ^* den almachtighen God den almoghenden,)

* oft den geweldighen Godt des heyrs.

47

Ende alle het volck antwoorde, Amen. Ende si hieuen die handen opwaerts ende nedervallende opter aerden, ende aenbaden den HEERE,

48

Iesus ende Bananeus, ende Sarabias ende Cadimus ende Accubus ende Sabbatheus, ende Calithes, ende Azarias, ende Ioradus, ende Ananias, ende Philias, ende die Leuiten,

49

die die wet des HEEREN leerden si lasen des HEEREN wet, in die menichte, ende si setteden elck voor die ghene die de lesse verstonden. ⁺

+ Neem. viij

50

Ende Atharathes seyde Esdre den biscop ende lesere ende Leuiten, die de menichte leerden,

51

segghende, ⁺ Desen dach is den HERE heylich, ende si weenden alle, als si die wet ghehoort hadden,

+ G

52

Ende Esdras seyde, Aldus gaet henen, ende etet die alderhande vetste dinghen, drincket, dat alderhande soetste, ende seyndet hen ghauen, diet niet en hebben,

53

Want desen is den heylighen dach des HEEREN, ende en wilt niet truerich wesen, Want die HEERE sal v verclaren

54

Ende die Leuiten vercondichdent allen int openbaer, seggende, Desen dach is heylich en wilt niet droeue zijn,

55

Ende si ginghen al wech eten, ende drincken, ende te brassen, ende ghauen te gheuen, den ghenen, diet niet en hadden, op dat si mochten eten, Want si zijn grootelijck verheuen metten woorden, waermede si gheleert waren,

56

Ende si zijn alle verghadert in Ierusalem, om blijschap te houden, naer dat Testament des HEEREN Gods van Israel.

§ Hier eyndet dat derde boeck Esdre.