De Vorsterman Bijbel

§ Dat .vi. Capittel.

1

⁺ENde het is gesciet doen Sanaballath tobias ende Gosem die Arabite, ende onse ander vianden vernamen dat ic die mueren getimmert hadde, ende datter gheen scaert meer aen en ware, hoe wel dat ic die dueren tot dier tijt noch niet gehangen en hadde in die poorten

+ A

2

seynde Sanaballath ende Gosem tot my, ende lieten mi seggen, Coemt laet ons te samen comen, inden dorpe in eene plaetse, Maer si dachten my quaet te doen,

3

Maer ic seynde boden tot hen, ende liet hen segghen, Ick hebbe een groot werc te beschicken, ic en can niet af comen, Dat werck mocht achter bliuen, waert dat eck die hant af dede, ende tot v af trocke,

4

Si seynden wel viermael op dese maniere, Ende ic antwoorde hen op die eerste maniere.

5

⁺Doen seynde Sanaballat ten vijftenmael tot mi sinen knape nader voorleden reden met eenen brief in zijn hant, daer in was gescreuen,

+ B

6

Het is voor die heyden comen in deser manieren, dat ghi ende die Ioden denct wederspannich te zijn, daer om timmerdi die mueren, ende ghy wilt v verheffen om haer coninc te zijn, om dese saken

7

hebt ghi v propheten gestelt, die van v wt roepen souden te Ierusalem, ende seggen Int Iuetsche lant is een coninck, Nv sal die coninc dese woorden hooren, so coemt nv, ende laet ons met malcanderen raet houwen,

8

Maer ic seynde tot hem, ende liet hem segghen, ende Gosem heuet geseit, ende ten is niet gesciet na die woorden die ghi segt, Ghi hebbet wt uwer herten versiert,

9

Want si alle wouden ons verueren ende dachten, Wi souden dye hant af doen vanden werc ende rusten, mer ic stercte mijn hant dieste meer

10

⁺Ende ic quam in dat huys Samaia des zoons Dalaia, des soons Mehetabeel heymelick [kolom] ende sprac, Laet ons te samen comen in dat huys Gods midden inden tempel, ende die dueren des tempels toe sluyten, Want si sullen comen om v te dooden, ende te nacht sullen si comen om v te verslaen,

+ C

11

Ic sprac, Soude een sulcken man vluchten? Soude een sulcken man vluchten als ic ben, inden tempel gaen dat hi leuende bleue? Ic en wilder niet ingaen,

12

Want ic mercte dat hem god niet gesonden en hadde, Want als hi propheterende sprac tot mi, maer Tobia ende Sanaballath hadden hem gehuert,

13

want hi had gelt genomen op dat ic mi veruaeren soude, ende also doen ende sondigen dat si eenen quaeden roep souden hebben, daer mede si mi verwijten mochten,

14

Gedenct mijn God om Tobia ende Sanaballath na dese zijn wercken, ooc des propheets Noadia, ende der andere propheten die mi veruaerden.

15

⁺Ende die muere is volmaect inden vijfentwintichsten dage der maent Leelul in tweenvijftich dagen,

+ D

16

Ende doen alle onse vianden dat hoorden vreesden alle heyden, die rontsom ons waren, ende den moet ontuiele hen, want si mercten dat dit werc van God was,

17

Ooc inden seluen tijden waren vele ouerste in Iuda, wiens brieuen gingen tot Tobiam, ende van Tobia tot hen,

18

Want daer wasser veel in Iuda, die hem ghesworen waren, want hi was een swager Sechania des soons Arah, ende sine sone Iohannan hadde die dochter van Mosollan des soons Barachie

19

ende seyden goet van hem voor mi, ende droegen mijn woorden ouer tot hem, So sandt dan Tobia brieuen om mi te veruaren.

§ Hoe Neemias wakers stelt, ende tvolc dat wter geuanckenis gecomen was, heeft getelt.