De Vorsterman Bijbel

§ Dat .v. Capittel.

1

⁺ENde daer verhief een groot gecrijssche des volcs ende haerder wiuen, tegen haer broeders die ioden.

+ A

2

Ende daer warender sommige die daer seiden, onse sonen ende dochteren [kolom] zijn te veel, laet ons tarwe nemen om tgelt, van haeren prijs ende eten, dat wi leuen.

3

Maer sommige spraken. Laet ons onse ackers, wijnbergen, huysen versetten, ende coren nemen in de dierte.

4

Sommige seyden. Laet ons gelt ontleenen, op die tzijnsen des Conincs op onse ackers, ende wijngaerden,

5

Want onse broeders lijf is als ons lijf, ende haer kinderen als onse kinderen. Siet wi onderworpen onse sonen ende dochteren in eygendom, ende dus geringe zijn zommige van onse dochteren dienstmaerten ende wi en hebben niet waer mede si verlost mogen worden, ⁺ ende ons ackeren ende wijnbergen besitten andere,

+ B

6

ende ic ben wtermaten toornich geworden doen ic gehoort hadde haer geroep ende gecrijsch na dese woorden,

7

ende mijn herte heeft ouerdacht ende ic strafte die ouerste ende wethouders ende seyde tot hen. Wilt ghi deen aen den anderen woecker bedriuen? Ende ic vergaderde een grote schaer tegen hen,

8

ende sprac tot hen. Wi (so ghi weet) hebben onse broeders de ioden gelost die den heydenen vercocht waren nae ons vermogen. Ende ghi sult uwe broeders ooc vercoopen ende wi sullense verlossen? Doen swegen si, ende si en vonden niet te antwoorden.

9

⁺Ende ic seide tot haer, Ten is niet goet dat ghi doet, waerom en wandelt ghi niet in de vreese gods, op dat ons vanden heidenen onse vianden niet verweten en worde?

+ C

10

Ic ende mijn broeders ende knapen hebben hen ooc gelt gedaen ende coren, maer laet ons dat achter laten int gemeyn ende die scult diemen onsculdich is laet ons noch borgen.

11

Dus geeft hen nv weder haer ackeren wijnbergen, olijfhouen ende huisen, maer ooc dat honderste deel vanden gelde, wijn, tarwe, ende olie dat ghi pleecht te eyschen van hen, geeft dat voor hen,

12

doen seiden si, wi sullent al weder geuen, ende en willen van hen niet eyscen, ende willen doen so ghi geseit hebt, ende ic riep die priesters ende ic beswoerse, dat si also doen souden na dat ic ghesproken hadde,

13

ooc scudde ic minen scoot wt, ende sprac. Also scudde God wt elcken man van sinen huyse, ende van sinen arbeit die dit woort niet en onderhout, dat hi wt si gescuddet ende ydel, ende die geheele gemeynte sprack Amen, ende loefde den HERE, ende dat volc dede also alst gesproken was.

14

Ooc van dier tijt aen doen mi die coninc had beuolen een prince te zijn inden lande Iuda, te weten, vanden .xx. iaer tot in dat .xxxij. iaer des conincx Artaxerxis, ⁺ dat zijn .xij. iaren, so en voede ic mi ende mijn broeders niet van des princen coste,

+ D

15

want de voorleden princen die voor mi geweest waren hadden dat volc beswaert, ende hadden van hen ghenomen broot ende wijn, daer toe ooc alle daghe .xl.

[p. Aa7r]

sikulen siluers, Oock hadden haer knapen met gewelt dat volck verdruct, maer ick en dede also niet, om der vreesen Gods wille.

16

Ooc arbeyde ic aenden arbeyt der mueren, ende en cocht geenen acker, Ende alle mijn knechten moesten aldaer aen dien arbeyt te samen comen

17

Daer toe waren der ioden ende ouersten .c. ende .l. aen mijn tafel ende ooc die tot mi gecomen waren wt den heydenen, die ronts om ons zijn,

18

⁺ende men bereide mi sdaech eenen osch ende .vi. wtghecoren rammen, behaluen die vogelen, Ende binnen .x. dagen alderhande wijns planteyt, ende ic scanc noch veel ander ghiften, Nochtans en eyschte ic der lant grauen cost niet, Want dat volc was seer arm ende bijster,

+ C

19

Gedencket mijns mijn god ten besten, alle dat ic desen volcke gedaen hebbe.

§ Hoe Sanaballath met sinen aenhangers Neemie laghen stelden, ende tot hem screuen, ende hoe hy hen antwoorde.