De Vorsterman Bijbel

§ Dat .iij. Capittel.

1

⁺NV dye seuenste maent gecomen was, ⁺ ende dye kinderen van Israhel waren nv in haeren steden, Soo quam dat volck te samen, als een man te Iherusalem,

+ A

+ ij.Es. viij.a

2

Ende Iosue die sone van Iosedech is op gestaen, ende zijn broeders die priesteren, ende Zorobabel die sone van Salathiel, ende sine broeders ende timmerden outaer des Godts Israhel, ⁺ om brantoffer daer op te offeren, soo het gescreuen staet in die wet Mosi des mans Gods

+ B

3

Ende si stelden den outaer op zijn ^* fundamenten, want daer was een veruaernisse onder hen vanden volcken des landts, ende offerden den HEERE brandtoffer daer op, des morghens ende des auonts.

* oft basen

4

Ende si hielden der tabernaculen een feeste so het gescreuen staet, ende deden brantoffer alle dage, na ordinancie so hen geboden was, het werc Gods op sinen dach,

5

Daer na oock die dagelicse brantoffers ende der ^* kalenden) nieuwer maenden, ende alle der feest dagen des HEREN die gheheylicht waren, ende in alle daghen in welcke vriwillighe offeranden den HEERE ghiften geoffert werden.

* Ten is niet in theb.

6

Inden eersten dach der seuenster maent begonsten si den HEERE brantoffer te doen

[p. Aa2r]

Maer dat fundament des tempels des HEREN en was noch niet gheleyt,

7

Maer si gauen gelt den timmerluyden ende metsers, ende spijse ende dranc, ende olie dien tot Zido ende te Tyro, dat si cederen hout van Libanon op die zee tot Ioppen souden brengen na den beuele Cyri, des Conincs van Persen aen hen.

8

⁺Inden anderen iare haerder toecoemste totten huyse Gods te Ierusalem der tweder maent, begonst Zorobabel die sone Salathiel, ende Iosue die sone Iosedech, ende die ander mede van haeren broeders priesters ende leuiten, ende alle die vander geuangenisse ghecomen waren te Ierusalem, ende stelden de leuiten van twintich iaer ende daer ouer, om te driuen dat werc aen den huyse des HEEREN,

+ C

9

ende Iosue stont met sinen sonen ende broederen, ende Kadmiel met sinen sonen, ende die kinderen Iuda, als een man om te dienen die arbeyders aen den huyse Gods, te weten die kinderen Henadad met haeren kinderen ende broederen die leuiten.

10

Ende doen die metsers dat fundament leyden aen den tempel des HEEREN, ⁺ so stonden die priesters gegaruwet (oft gecleet) metten trompetten, ende die leuiten die kinderen Asaph met cymbalen, om den HERE te louen, met den ghedichte Dauid des Conincs Israels.

+ D

11

Ende songhen deen na dander met louen ende dancken den HERE, dat hi goet is, ende dat zijn ontfermherticheit eewelick duert ouer Israel, ende allet volc riep luyde met den HERE te louen, om dat dat fundament aen den tempel des HEERN geleyt was.

12

Maer veel der ouder priesteren, ende Leuiten, ende die ouerste der ouder vaders, die dat voorleden huys gesien hadden in zijn fundament, ende dit huys voor haeren oogen was, weenden si met luyder stemmen.

13

Veel riepen met bliscappen, dat dat gecrijsch hooch clanc, Also dat dat volc niet onderkennen en conste, dat geluyt met bliscappen, voor dat ghecrijsche des weenens int volc, Want dat volc riep luyde, also datmen dat ghecrijsch verde hoorde.

§ Hoe die Ioden door brieuen besculdicht werden voor den coninc van Persen, ende hoe die coninc weder screef niet voort te timmeren.