De Vorsterman Bijbel

§ Dat .iiij. Capittel.

1

⁺MAer doen die vianden Iuda ende BenIamin hoorden dat die kinderen des gheuangenissen den HERE, den God Israhel den tempel timmerden,

+ A

2

quamen si tot Zorobabel, ende totten ouersten vaderen, ende seyden tot hen. Laet ons met v timmeren, Want wi soecken uwen God, gelijc als ghi. Ende wy [kolom] en hebben niet geoffert sint ter tijt, Assar Hadon die coninc van Assur, dye ons hier heeft gebrocht,

3

Maer Zorobabel ende Iosue, ende die andere ouerste der vaderen onder Israel, antwoorden hen. Het en betaemt ons ende v niet dat huys des Gods te timmeren, maer wi sullen alleene timmeren den HERE den God Israhel, soo ons Cyrus die Coninc van Persen geboden heeft.

4

Doen belette dat volc des lants die handen des volcs Iuda, ende verstoorden daer af int timmeren,

5

ende huerden raet geuers tegen hen, ende beletten haeren raet, also langhe als Cyrus die Coninc van Persen leefde totten coninrijc Dari des Conincs van Persen,

6

Maer inden tiden des Conincs Assweri (dye ooc genoemt was Artarxerzes) int beghinsel zijns conincrijcs, screuen si een besculdinge tegen die van Iuda ende Ierusalem.

7

⁺Ende inden tiden Artharxerzes screef Bisella mithridatis ende Thabeel, ende die andere haers raets tot Arthaxerxzen den Coninc van Persen. Dat scrift des briefs was in Sirischer talen ghescreuen, ende wert in Siriscer wtgeleyt,

+ B

8

Rehum ^* beelteem ende Samsai die scriuer, screuen desen brief te Ierusalem tot Artharxerzes den Coninc in deser manieren.

* die cancelier

9

Wi Reum ^* Beelteem ende Samsai de scriuer, ende die andere des raets Dinai ende Arphasateen, Terpharleem, Arphaseen, Hercueen, Babilonien, susanechaneen, dyei, ende elamiten,

* die cancelier

10

ende dat ander volc, dwelc die groote ende eerweerdichste Asenaphar ouerbracht ende hadse geset in die steden Samaria, ende andere aen dese side des waters, ende in Canaen.

11

Ende dit is dat inhout des briefs, dien si sonden Artharxersi den coninck.

⁺ Vwe knechten die mannen aen dees side des waters scriuen gruet ende salicheit,

+ C

12

Den coninc si kenlic, dat die Ioden die van v tot ons opgeclommen zijn, gecomen zijn te Ierusalem, in die opruerighe boose stat, ende timmeren die selue, ende maken haer mueren, ende timmeren haer huysweghen.

13

Hier om si nv den Coninc kenlic, ist dat dese stat getimmert wort ende die mueren weder gemaect, so sullen si v schot, tolle, ende iaerlike renten (oft chijsen) niet gheuen. Ende dese schade sal totten coninghen comen,

14

hierom wi ghedachtich des souts, dat ^* wi geten hebben in dat palays ende om dat wi die quetsinghe des Conincs seer onbehoorlijcke ende onredelijcke soude achten. Daeromme seynden wi, ende laten den Coninck dye wete doen.

* th. Wi dye den tempel verstoort hebben

15

Dat ghy ouer soect inden historien uwer vaders, soo suldy

[p. Aa2v]

vinden inder seluer ^* registeren der cancelrien ende beuinden dat dese stat oploopich, ende scadelic is den coningen ende landen, ende dat daer zijn verwect oorloghen van outs. Daer om die stat ooc verdoruen is.

* th. croniken

16

Daerom laeten wy den coninc weten, dat ist dat dese stat ghetimmert wort, ende haere mueren weder ghemaect so en suldi voor haer niet behouden op dese side des waters.

17

Doen seynde die coninc een antwoort tot Rehum ^* Beelteem, ende Simsai den scriuer, ende den anderen haers raets die in Samaria woonden, ⁺ ende den anderen ouer gheen side des waters. Vrede ende gruete.

* th. den cancelier

+ D

18

Die ^* besculdighen die ghi ons ghesonden hebt is opentlijck voor my ghelesen,

* th. den brief.

19

ende het is van my beuolen, datmen soecken soude, ende men heeft gheuonden dat dese stadt van outs teghen die coninghen op staet, ende oplopen ende afuallinge daer inne geschiet,

20

Want seer machtige ende stercke coningen zijn te Ierusalem geweest, die heerscappie gehadt hebben ouer al dat aen ghene side des waters is, ende dat hen tolle, schotte, iaerlike renten gegeuen werden,

21

So hoort nv na dit beuel, Verbiet den seluen mannen dat die stat niet getimmert en worde, tot dat ter auontueren van mi dat beuel ghegheuen wordt,

22

Dus siet nv toe, dat ghi niet onachtsaem hier in en zijt, op dat allenskens het quaet niet meerder en worde tegen den Coninc.

23

Hierom is dit wtscrift des mandaments vanden coninc Artaxerzes gelesen voor Rehum Beelteem, ende Samsai den scriuer, ende haeren raetsluyden, ende si trocken haestelic op te Ierusalem totten Ioden, ende si belettent hen metten arme ende gewelt.

24

Doen is achter gelaten dat werc des huys des HEREN in Ierusalem, ende en wert niet ghemaect tot int tweede iaer Dari des Conincs van Persen.

§ Hoe die Ioden weder begonnen den tempel Gods te maken, ende hoe dat van haerder tegen partie den coninc Dario gescreuen wert.