De Vorsterman Bijbel

[p. cc8v]

[kolom]

§ Hier beghint Manasses ghebet des Conincks van Iuda, doen hi in Babilonien gheuanghen wert ghehouden, Dat welcke niet int hebreus en is, Noch en is oock niet vanden text des ouden testaments.

1

HEERE Almachtich God onser vaderen, Abrahams, Isaacs ende Iacobs, ende haeren rechtuaerdigen zade,

2

die hemel ende aerde met alderhande vercieringen, hebt gemaect,

3

die de zee metten woorde ws gebots gheteekent hebt, die den afgront besloten hebt, ende geteekent met uwen veruaerlijcken ende loflijcken name,

4

den welcken si alle ontsien, ende beuen van dat aensicht uwer cracht,

5

ende die gramscap uwer dreyginge ouer die sondaers is onuerdrachghelijck,

6

maer die ontfermherticheyt uwer beloften, is onghemeten, ongrondeerlijc,

7

Want ghi zijt die alderhoochste HERE die God, ouer alle aertrijc, lancmoedich ende zeer ontfermhertich, ende berou bewisende ouer die boosheyt der menschen.

☞ Maer ghi HERE, na uwer goetheyt, hebdi beloeft berou in vergiffenisse der sonden,

8

Ende ghi God der rechtueerdigher, en hebt geen berou geset den rechtueerdigen Abraham, Isaac ende Iacob, desen die v niet gesondicht en hebben,

9

Want ic gesondicht hebbe, bouen dat ghetal des zandts der zee, mijn ongherechticheden zijn vermenichfuldicht,

10

Ic ben ghecromt met eenen grooten bant des ysers, ende ick en hebbe geen verhalinghe mijns adems, Want ic heb uwe gramscap verwect, ende ic heb quaet voor v gedaen, settende afgriselicheden, ende vermenichfuldigende die vertoorningen.

11

☞ Ende nv buyge ic die knyen mijns herten, biddende tot uwer goetheyt HERE,

12

Ic heb ghesondicht, HEERE, ic heb gesondicht, ende ic bekenne mijn ongerechticheyt,

13

Ic beghere, biddende v HEERE, Vergeuet mi vergeuet mi, ende en wilt mi niet tesamen met mijn ongerechticheden verdoemen, noch en hout mi mijn quaet niet na, inder eewicheyt

14

Want ghi sult mi, die onweerdich ben, behouden, na uwe groote ontfermherticheyt,

15

Ende ic sal v altijt louen, alle die daghen mijns leuens, Want alle crachten der hemelen louen v, ende v is eere inder eewicheyt Amen.

§ Hier eyndet des Conincks Manasses ghebet.