De Vorsterman Bijbel

§ Dat .xxxv. Capittel.

1

⁺ENde Iosias heeft gehouden thoochtijt van Paesscen in Ierusalem, ende dat paeschlam is gheoffert opten veerthiensten dach der eerster maent,

+ A

2

Ende hi stelde die priesters in haer diensten, ende vermaendese dat si dienen souden inden huyse des HEEREN,

3

Ende den Leuiten, na wiens leeringe alle Israel den HERE geheylicht wert, heeft hi geseyt, Stelt die Arcke, in die heylige plaetse des tempels die Salomon Dauids sone die Coninc van Israel ghetimmert heeft, Ghi en sultse in gheender manieren voortaen meer ^* dragen) Aldus dient nv den HEERE uwen God ende sinen volcke van Israel,

* the op die schouderen draghen

4

ende bereyt v door v huysghesinnen ende gheslachten uwe deylinge, als Dauid die coninc van Israel, ende Salomon zijn sone bescreuen heeft,

5

ende dient in die heylige plaetse na die ^* huysgesinnen ende scaren der) Leuiten,

* theb. oordininghe der vader huysen onder uwe broederen, Ooc die oordininge der vaderhuysen onder die

6

Ende als ghi geheylicht zijt, offert die offerhande des hoochtijts van Paesschen Ende bereyt v broeders oock, dat si doen [kolom] mogen, na alle die woorden, die die HERE ghesproken heeft door Moyses handen.

7

Ende voort meer heeft Iosias gegeuen alle den volcke datter geuonden was int hoochtijt van Paeschen, lammeren, ionghe bocken, ende vanden cudden ander dieren, int getal dertich duysent, ende drie duysent runderen, ende dit alle van des conincs goede.

8

Sijn hertogen gauen wt vryen wille dat si geloeft hadden, also wel den volcke als den priesters ende den Leuiten, te wetene, Helchias, Zacharias, ende Iehiel princen des huys Gods, gauen den priesteren om te maken Paesschelike offerhande ^* verscheyden beestkens onder een), twee duysent ende ses hondert, daer toe driehondert runderen.

* Ten is niet int hebr.

9

Maer Chonanias, Semeias, Nathanael, ende zijn broeder Hasabias, Iahiel, ende Iosabad, der Leuiten princen, gauen den anderen Leuiten totten Paesschen te vieren, vijfduysent offerbeesten, ende daer toe vijfhondert ossen.

10

⁺Also wert den dienst Gods bereyt, ende die priesters stonden in haer plaetse, ende die Leuiten in haer oordine na dat gebot des conincs.

+ B

11

Ende dat Paeschlam wert geoffert, ende die priesters besprengden haer selfs handen metten bloede, ende die Leuiten trocken die huyt af, vanden brantofferen,

12

ende scheyden die om te geuen door die huysen ende huysgesinnen van eenen yegeliken bisondere ende om den HEERE te offerern, gelijct gheschreuen staet inden boeck Moysi. Also deden si metten runderen ooc.

13

Ende si brieden dat Paeschlam aent vier, alsoot inder wet gheschreuen is, Maer die vreedsame offerhanden coocten si in potten, ketelen ende pannen, Ende si deyldent haestelijc voor dat gemeyn volc,

14

Maer daer na bereyden si oock voor hen seluen ende voor die priesters, Want die priesters Aarons kinderen waren onledich aen den brantoffer ende vette tot inder nacht, Daeromme bereyden die Leuiten voor hen seluen, ende voor die priesters Aarons kinderen alderlaetste.

15

⁺Ende die sangers Asaphs kinderen stonden in haer plaetse, naer die gheboden Dauids, ende Asaphs, ende Hemans, ende Idithums der propheten des conincks, ende die poortiers wachteden aen allen poorten Ia dat si niet eenen cleynen tijt wech en ginghen van haeren dienste, Daeromme bereyden Leuiten haer broeders spijse voor hen.

+ C

16

Ende alle den dienst des HEEREN is aldus wettelijcken, naer der gewoonlijcker manieren volbracht, in dien daghe, dat si hielden dat hoochtijt van Paesschen, ende offerden brantofferen op den outaer des HEREN, naer Iosie des conincs geboden.

[p. cc8r]

17

Also hielden die kinderen van Israel die daer geuonden waren tegenwoordich thoochtijt van paesschen, in dien tijt, ende die feeste der ongeheefder brooden seuen dagen,

18

Daer en was geen feeste, van Paesscen in Israel gehouden, gelijc dien, van Samuels des propheten tijt aen, Ende geen coninc van Israel en hadde sulcken Paesschen gehouden, als Iosias hielt, ende die priesters, Leuiten, ende geheel Iuda, ende wat van Israel geuonden tegenwoordich was, ende ⁺ die inwoonders van Ierusalem.

+ D

19

Inden achtiensten iaer des conincrijcs Iosie, wert dat hoochtijt van Paesschen gehouden.

20

Ende als Iosias den tempel vernieut hadde, is opgeclommen Nechao die coninc van Egypten, om te striden ^* in) Carchamis, omtrent Euphraten, Ende Iosias troc wt hem tegen,

* the. teghen

21

Maer hi sandt boden tot hem ende dede hem seggen, Wat heb ic met v te doen, coninc van Iuda? Ic en come huyden niet tegen v, maer ic stride tegen een ander huys, daer mi God geboden heeft haestelijc te ghaen, Houdt op te doen tegen God, die met mi is, op dat hi v niet en doode.

22

Maer Iosias en wilde niet wederom keeren, maer hi stelde hem, om tegen hem te striden, ende en was niet onderdanich den woorden Nechao wten monde Gods, ende quam om tegen hem te striden, op die pleyne int veldt Mageddo,

23

Ende daer is hi gewont vanden schutters, Ende die coninc sprack tot sinen knechten, Leyt mi wten strijt, want ic ben zeer gewont,

24

Ende zijn knechten deden hem van dien wagen, ende voerden hem op sinen anderen wagen ^* die hem nauolchde nader conincliker maniere) ende brachten hem te Ierusalem, ende hi sterf, ende hi wert begrauen in zijnder vaders grauen.

Ende geheel Ierusalem ende Iuda beweenden den coninc Iosias,

* Ten is niet int hebr

25

ende Ieremias ^* aldermeeste, wiens) sangers ende sangersen haer claech liedekens ouer Iosias tot op desen dach wederhalen, ende si maecten een gewoonte, als een wet daer wt in Israel, Siet, het is gescreuen onder den claechliedekens.

* the. beweende Iosiam ende alle die

26

Wat meer van Iosia te seggen is, ende zijn ontfermherticheyt nae die scrift in die wet des HEEREN,

27

ende zijn gheschiedenisse, beyde die eerste ende die laetste, Siet, dat is ghescreuen in dat boec der coninghen van Israel ende Iuda.

§ Van Ioachas den coninc gheuanghen in Egipten, ende van Eliachim zijn broeder, hoe hem die Coninc van Babilonien vinck, Ende van zedechia, Ende hoe Ierusalem verdoruen wert.