De Vorsterman Bijbel

§ Dat .xxxiiij. Capittel.

1

⁺IOsias was acht iaer out doen hi coninc wert ende regeerde .xxxi. iaer in Ierusalem, ⁺

+ A

+ iiij.re. xxij.

2

ende dede dat recht was int aensien des HEEREN, ende wandelde inden wege Dauids zijns vaders, ende hy en weeck noch ter rechter noch ter slincker hant,

3

Want inden achtsten iare zijns conincrijx, doen hy noch een kint was, begonste hi den God zijns vaders, Dauids te soecken, Ende inden twaelfsten iaer na dat hi begonste te regeren, reynichde hi Iuda ende Iersusalem, vanden hoochten

[p. cc7r]

ende boschkens ende afgoden ende gesneden beelden,

4

Ende liet voor hem afbreken die outaers Baalim, Ende die gelijckenissen die daer bouen op stonden, sloegen si in stucken ende wierpense van bouen neder, Ende die boschkens ende afgoden hieu hi af ende bracse in stucken, ende maectese tot stof ende stroydese op die grauen der geenre die hen plegen te offeren,

5

Ende hierenbouen verbernde hi die gebeenten der priesteren op ^* die outaren der afgoden) ende reynichde also Iuda ende Ierusalem.

* th. haer altaren

6

Daer toe inden steden Manasse, Ephraim, Simeon, ende tot Nephthalim verwerp hijt al rontsomme,

7

Ende doen hi die outaers afgebroken, ende die afgoden cleyn instucken gemalen, ende alle die beelden afgehouwen hadde int geheele lant van Israel, so quam hi weder tot Ierusalem.

8

⁺Int achtienste iaer zijns conincrijcs, doen hi dat lant, ende dat huys gereynicht hadde, sant hi Saphan ^* Helchie) sone, ende Manasiam den stadthouder, ende Ioas Ioachas sone den cancelier, te vermaken dat huys des HEREN zijns Gods,

+ B

* the. Azalie

9

Ende si quamen totten hoogen priester Helchiam, ende als si ontfangen hadden van hem dat ghelt dat totten huyse Gods ingebracht was, ende tgene dat die Leuiten ende die duerwachters vergadert hadden, van Manasse, Ephraim, ende van al die ouergebleuene van Israel, ende van geheel Iuda ende Beniamin, ende van dien die te Ierusalem woonden,

10

so gauen zijt onder die handen der meesteren, die gestelt waren ouer die arbeyders, die bestelt waren aent huys des HEREN, dat si den tempel vermaken souden ende dat waer dat cranck was, dat si dat souden reken,

11

Die selue gauent voor den constenaren timmerluyden ende den metsers om gehouwen steennen, ende gescaeft hout te coopen, totten balcken aenden huyse, dwelcke die coningen van Iuda verdoruen hadden,

12

Ende die mannen arbeyden aent huys ^* zeer getrouwelijc.)

Ende ouer hen waren geoordineert die ouerste Iahath, ⁺ ende Abdias die Leuiten wten kinderen Merari, Sacharias ende Mosollam, wt Kahaths kinderen, om dat werc te driuen, ende waren alle Leuiten die op muysijcspelen consten spelen.

* the. inden ghelooue

+ C

13

Maer ouer die last dragers tot alderhande arbeyt in alle ambachten waren wten Leuiten, die schriuers, officiers, ende die poortiers.

14

Ende als si dat ghelt wt droeghen, dat gebrocht was inden tempel des HEEREN, vandt Helchias dat boeck der wet des HEEREN door Moysis handen ghegheuen.

15

Ende Helchias sprack tot Saphan den schriuer, Ick hebbe dat wetboeck geuonden inden huyse des HEREN ende hi ghaf hem dat boeck.

16

Saphan bracht [kolom] toten Coninck, ende bootschaptet den Coninck, segghende, Siet, alle dat ghi in dye hant uwer knechten gegeuen hebt, wort volbracht,

17

Dat siluer dat gheuonden is inden tempel, hebben si ^* ghesmolten), ende is ghegheuen den meesteren der wercluyden, ende den genen die smeden versceyden wercken

* the. vergadert.

18

Ende daerenbouen Helchias die priester heuet mi desen boeck ghegheuen.

⁺ Ende als hi dien ouerlesen ende vertelt hadde voor den, Coninck.

+ D

19

Ende doen die Coninck die woorden der wet hoorde, scoerde hi zijn cleederen.

20

Ende die Coninck gheboot Helchie ende Ahikan Saphans sone, ende Abdon Michas sone, ende Saphan den scriuer, ende Asaia des Conincs knecht, ende sprack,

21

Ghaet, ^* bidt) den HEERE voor mi, ende voor die ouerbleuene in Israel, ende voor Iuda, van alle die woorden des boecks datter gheuonden is, Want die verbolgentheyt des HEREN is groot gedropen op ons, om dat onse vaders niet gehouden en hebben dat woort des HEREN dat si al ghedaen hadden, dat in desen boec gescreuen staet.

* th. vraecht

22

⁺Doen ginc Helchias metten anderen vanden Coninc gesonden, totter propheterssen Holdam Sellums wiue des soons Thakohath des soons Hasaredes cleederen bewaerders die tot Ierusalem woonde int tweede deel, Ende spraken met haer, die woorden die wi voor v vertrocken hebben.

+ E

23

Ende si sprac tot hen, Dit spreect die HERE die God van Israel, Segt den man die v tot mi gesonden heeft,

24

Dit spreect die HERE, Siet, ic sal quade dingen laten comen ouer dese stat, ende ouer haer inwoonders, alle die vermaledijngen, die geschreuen staen inden boec, datmen voor den coninck van Iuda gelesen heeft,

25

Om dat si mi verlaten hebben ende vremde goden gheoffert, om dat si mi tot gramscap souden verwecken in alderhande wercken haerder handen, Daeromme sal mijn verbolgentheyt nederuallen op dese plaetse ende niet wtghedaen worden.

26

⁺Maer totten Coninc van Iuda die v ghesonden heeft, om den HEERE te verbidden, segget aldus, Dit spreect die HEERE die God van Israel, want ghi gehoort hebt die woorden des boecs

+ F

27

ende uwe herte is vermorwet, ende ghi zijt verootmoedicht voor Gods aensichte, om dese dingen die ghesproken zijn teghen dese plaetse, ende tegen ^* die inwoonders van Ierusalem) ende ontsiende mi, hebt ghi uwe cleederen gheschuert, ende voor mi geweent.

Alsoo hebbe ick v ooc verhoort, seyt die HEERE,

* th. haer inwoonders

28

ende ick sal v nv vergaderen tot

[p. cc7v]

uwen vaderen, ende ghi sult in uwe graf met vreden vergadert worden, ende uwe ooghen en sullen niet sien, alle dat quaet dat ic ouer dese plaetse ende haer inwoonders brengen sal, Ende si seydent den coninc weder ^* al dat die prophetisse gesproken hadde.)

* Ten is niet int hebr.

29

Doen sant die coninc ende liet te samen comen alle die ouders van Iuda ende Ierusalem,

30

⁺Ende ginc op int huys des HEEREN, tesamen alle mannen van Iuda ende de inwoonders van Ierusalem, die priesters die Leuiten, ende alle tvolc vanden minsten totten meesten, ^* ende doen zijt hoorden, las die coninc int huys des HEEREN alle die woorden des boecs),

+ G

* th. ende daer wert voor haer ooren ghelesen al die woorden des boecks des verbonts, dat int huys des Heeren geuonden was

31

Ende ^* hi) stont in sinen rechter stoel, ende heeft gemaect een verbont voor den HEERE, ^* dat hi) na den HERE wandelen soude om zijn geboden, getuygenissen, ende zeden te houden wt zijnder geheelder herten, ende wt zijnder gheheelder zielen, te doen na die woorden des verbonts, die gescreuen stonden in desen boecke ^* die hi gelesen hadde.)

* the. die Coninck

* the. datmen

* ten is niet int hebr.

32

Ende ^* hi beswoer op dese sake) alle die te Ierusalem ende in Ben Iamin geuonden waren Ende die inwoonders van Ierusalem deden na dat verbont Gods, haerder vaderen God,

* the. si stonden daer

33

Hierom heeft Iosias wechgenomen alle afgriselicheden wt allen landen die den kinderen van Israel toebehoorden, ende dede dat alle die in Israel geuonden werden den HEERE haeren God dienden, Also lange als Iosias leefde, en zijn si niet afgekeert vanden HERE haerder vaderen God.

§ Vanden Paesschen den welcken Iosias hielt, Ende hoe Iosias sterf, ende hoe hi beweent wert.