De Vorsterman Bijbel

§ Dat .xxxiij. Capittel.

1

⁺MAnasses was twaelf iaer oudt doen hi Coninck wert, ende regeerde vijf ende vijftich iaer te Ierusalem,

+ A

2

ende dede quaet dat den HEERE mishaechde, na die afgrijselicheden der Heydenen, die die HERE voor die kinderen van Israel verdreuen hadde,

3

ende keerde hem om, ende tymmerde die hoochten

[p. cc6v]

die zijn vader Ezechias afgebroken hadde, ende stichte Baalim outaren, ende maecte boskens, ende aenbadt alle dat heyr des hemels, ende diende hen,

4

Hi timmerde ooc altaren int huys des HEEREN, daer die HEERE af gesproken hadde, Te Ierusalem sal minen naem eewelijck zijn.

5

Ende timmerde altaren den geheelen heyre des hemels, ☞ in beyde die voorhouen aen thuys des HEEREN.

6

Ende dede sine sonen door tvyer gaen, int dal der kinderen Hennon, ende vercoos dagen, ende achtede op vogelen sanc, ende toouerde, ende hadde by hem waerseggers, ende teeken bedieders, ende tooueraers, ende dede veel quaets dat den HEERE mishaechde, om hem te verwecken tot gramschappen.

7

⁺Hi settede oock gehouwen beelden ende gegoten afgoden die hy liet maken int huys Gods, daer die HEERE af gesproken hadde tot Dauid, ende tot Salomon sinen sone, in desen huyse ende te Ierusalem die ic vercoren hebbe wt allen geslachten van Israel, sal ick minen naem eewelijck setten,

+ B

8

ende en sal den voet van Israel niet meer doen wijcken vanden lande dat ic haeren vaderen gegheuen hebbe, alsoo verre nochtans, als si hen houden, dat si doen al wat ick hen geboden hebbe, in al die wetten, zeden, ende rechten, door Moisen,

9

Maer Manasse verleydede Iuda ende die inwoonders van Ierusalem, dat si arger quaet souden doen dan die heydenen die die HEERE voor die aensichten der kinderen van Israel verdreuen hadde,

10

Ende die HEERE sprac tot ^* hem) ende tot sinen volcke, maer si en wildens niet aenmercken.

* th. Manasses

11

⁺Ende daer omme liet die HEERE ouer hen comen die ouersten des heyrs des coninx van Assirien, die namen Manassen geuangen met boeyen, ende bonden hem met ketenen, ende brachten hem tot Babilonien.

+ C

12

Ende doen hi inder benautheyt was, badt hy den HEERE sinen Godt, ^* ende bewees zeer groot berou) voor den Godt zijnder vaderen.

* th. verootmoedichde hem zeere.

13

Ende hi badt hem, ende badt door vermaningen, Doen verhoorde hi hem, ende bracht hem weder te Ierusalem tot sinen conincrijck. Ende doen bekende Manasses, dat die HEERE Godt is.

14

Daer na timmerde hi die buytensti mueren aen Dauids stadt, van westwaerts aen Gihon in die ^* valleye) daermen ter vischpoorten in ghaet, ende rontsomme tot Ophel toe, Ende maectese zeer hooghe, Ende legherde hooftluyden in die vaste steden van Iuda,

* thebr. beke

15

ende dede wech die vremde goden, ende die afgoden [kolom] wt den huyse des HEEREN, ende alle die altaren die hi getimmert hadde opten berch des huys des HEEREN, ende te Ierusalem, ende werpse al wt buyten die stat,

16

Ende hi vernieude wederom den altaer des HEEREN, ende offerde daer op offere ende vreedsamige offerhanden, ende ^* danc,) ende beual Iuda, dat si den HEERE den Godt van Israel dienen souden,

* the. danckoffer,

17

Nochtans offerde tvolck op die hoochten, den HEERE haeren Gode.

18

⁺Wat meer van Manasse te seggen is ende zijn gebet tot sinen Godt, ende die redenen der sienderen, ende haer woorden die si met hem spraken inden naem des HEEREN des Godts van Israel, die zijn gescreuen onder die gesciedenissen ende woorden der coningen van Israel

+ D

19

ende zijn gebet ende verhooringe, ende alle sine sonden ende misdaet, ende die plaetse daer hi op die hoochten timmerde, ende boschkens ende afgoden stichtede, eer hi ^* berou hadde) Siet, die zijn gescreuen onder die woorden ^* Ozai)

* th. verootmoedicht wert

* th. der sienders.

20

Ende Manasses ontsliep met sinen vaderen, ende si begroeuen hem in zijn huys, Ende sine sone Amon wert coninck in zijn plaetse ende regeerde voor hem.

21

Amon was .xxxij. iaer out doen hy coninc wert, ende regeerde twee iaer te Ierusalem,

22

ende dede quaet dat den HEERE mishaechde gelijc zijn vader Manasses gedaen hadde. Ende Amon offerde alle den afgoden die zijn vader Manasses gemaect hadde, ende diende hen,

23

Maer hy en ontsach hem niet met vreesen voor dat aensicht des HEEREN, ghelijc zijn vader Manasses verootmoedicht hadde, Ende hy dede noch veel grooter sonden.

24

Ende als zijn knechten een verbont tegen hem gemaect haddeen, doodeden si hem in zijn huys.

25

Maer dat ander deel des volcs doen si verslagen hadden die ghene die Ammon verslagen hadden, maecten si Iosiam sinen sone coninck ouer hen.

§ Hoe Iosias regeerde, ende van zijnder goedertierenheyt. Ende hoe Deuteronomium gheuonden wert.