De Vorsterman Bijbel

§ Dat .v. Capittel.

1

⁺ENde Salomon bracht daer inne, al dat Dauid zijn vader geheylicht hadde, ⁺ siluer ende gout, ende alderhande gereetscap, ende hi leyde dat in die schatten vanden huyse des HEREN.

+ A

+ iij.re. vij.g. iij.re. viij.a

2

Na desen vergaderde Salomon alle die ouders van Israel, al die princen der geslachten, ende die hoofden der huysghesinnen onder die kinderen van Israel te Ierusalem, dat si die arcke des verbonts des HEREN op souden brengen wt Dauids stadt, die welcke is Zion,

3

Hierom quamen alle die mannen van Israel totten coninc inden heerliken vierdach der seuenster maent,

4

Ende als alle die ouders van Israel gecomen waren, so droegen die Leuiten die arcke,

5

ende brachtense opwaerts met die gereetschap des tabernakels des getuygenis, Maer alle die heylige ghereetschap der heyligher plaetsen, ⁺ die inden tabernacule was, droeghen dye priesters metten leuiten,

+ B

6

Maer die Coninc Salomon, ende die geheele gemeynte van Israel die tot hem vergadert was, ende alle die

[p. bb2r]

daer omtrent waren voor die Arcke, offerden rammen ende runderen sonder getal, want dye menichte der beesten dier ghedoot werden, was so vele.

7

Ende die priesters brochten die arcke des verbonts des HEREN op haere plaetse, ⁺ in die plaetse der antwoorden des tempels, int alderheylichste der heyligen, onder die vlogelen der Cherubim,

+ C

8

also dat die Cherubim haer vlogelen wt breyden ouer dye plaetse in die welcke de arcke geset was. Ende die Cherubim bedecten die arcke, ende haer hantboomen van bouen.

9

Die hantboomen daer de Arcke mede gedragen wert, om dat si een weynich langher waren, so verthoonden haer die knoppen buyten die plaetse, Maer die een weinich buyten was, en constese niet gesien. Ende was aldaer tot op desen daghe.

10

Ende daer en was niet in die Arcke, dan de twee steenen tafelen, die Moyses in Horeb daer inne gedaen hadde, doen die HEERE ^* die wet gaf den) kinderen van Israel, doen si wt Egipten trocken.

* th. een verbont maecte met die

11

Ende doen die priesters ⁺ wt ghingen wt den heyligen (want alle dye priesters die voorhanden waren zijn geheilicht gheweest, ende noch en waren in dien tijden die behoorten, ende doordinancie der diensten onder haer niet gedeylt)

+ D

12

so waren de Leuiten ende de sangers met alle die onder Asaph, Heman, Idithun, ende haeren kinderen ende broederen waren gecleet met costelijcke witte lynen cleederen, ende maecten gelijc gheluyt met cymbalen, psalteren, ende harpen, ende stonden tegent oosten des outaers, ende bi hen hondert ende twintich ^* sangers) die met trompetten bliesen.

* th priesters

13

Ende als si aldus allegader tsamen ende met trompetten ende met stemmen op cymbalen ende orgelen, ende met versceyden musijcspelen te gader songen, ende die stemme int hooge op voerden, So hoordemen dat gheluyt van verre, Ia doen si den HERE begonsten te louen, ende te seggen. Belijdt ende dancket den HERE, want hi is goet, want zijn ontfermherticheit duert inder eewicheit. So is dat huys des HEREN veruult met eender wolcken,

14

also dat die priesters niet en consten gestaen, om te dienen, om dier ^* duysternissen wille, Want die heerlicheit des HEEREN veruulde dat huys Gods.

* th. wolcken

§ Van Salomons woorden totten volcke, Ende van Salomons ghebet tot God.